Satugiamata v Mesek [1987] VUSC 19; Land Appeal Case 01 of 1985 (27 May 1987)

	Home \| Databases \| WorldLII \| Search \| Feedback Supreme Court of Vanuatu

JUSTICES:-	Johnson SOPE Jif Waea TENENE Tom KALTAL
CLERK	Vake RAKAU
PARTIES:	Kenneth Jamos SATUGIAMATA - Claimant present in person Alfret Tom MESEK & brother Jif Albert SATUGIALIU - Defendant present in persons.

"Fas samting mi wantem expressem bigfala tankyu lo yufala blong mekem hemi possible blong Kot ia I sidaon dedei. Reason why mi makem Kleim ia from Village Kaosel blong Jif blong Pele Island i lukluk long hem be Defendant hemi no rispektem Disisen ia. So mi tekem i come long Efate Island Kot. Mi biliv strong se KIRIVATU hemi kraon blong family SATUGIAMATA."

Mi gat wetem mi wan statement we mi bin produsem finis long Village Kot long Pele island. Statement hemi rid olsem ...

Attached wetem statement ia hemi wan sketched map of the land re- KIRIVATU land dispute as marked (CLD NO3). Hemia nomo toktok blong mi Tankyu your Honour.

Q.1. Yu talem se ol Jif oli bin lukluk long keis mo talem se yu nao Kastom Ona long kraon ia. Wanem or who Jif nao givim Jasmen se kraon ia KIRIVATU i blong yu?
Ans: Name blong olgeta ia –
Jif Thompson TANGARASI
" MASEREI
" Kaloran TARILIU mo
" Seth TITOGOA

Q3: Taem ol Jifs oli givim Jasmen ia oli bin lukluk long side blong mekem PEACE bitwin mi wetem yu?

Q4: Olgeta kokonas ia we olfala blong yu i takem ol man blong planem oli takem wea?

Ans: Refer bak long statement we i talem se "long 1920 oli just planem kokonas" mo mi biliv se oli taken nomo long Pele island.

Ans: Since 1920 kasem 1966 Land ia KIRIVATU inogat dispute long em be afta bihaen igat dispute long em. From reason ia makem se mi biliv se kraon ia i blong SATUGIAMATA. So oli planem kokonas long kraon blong SATUGIAMATA.

Q7: James WALLACE we hemi papa blong yu. Olsem wanem long papa blong James WALLACE we hemi Bubu blong yu, hemi stap usum kraon ia fastaem bifo papa blong yu i usum?

Ans: KIRIVATU hemi Tabu kraon blong MALAPATI mo ol man oli stap frait blong wok long em, so grandpapa blong mi hemi no stap wok long hem kasem taem blong papa blong mi nao oli start blong wok long hem.

Ans: Bambae mi givim name blong Bubu afta from olgeta ia oli stap wantem save be oli no save be mi save name ia.

Q10: Olgeta names ia, SATUGIAMATA, SATUGIALIU, SATUGIAMARATA mo ol smolsmol names, I true se SATUGIAMATA hemi really name blong Pele island we hemi gat rait blong ownem KIRIVATU?

Q11: Sapos Satugiamata hemi base long Emae mo Satugialiu long Pele island, Satugiamata igat rait blong usum ol kraon blong Satugialiu or no?

Ans: Satugiamata inogat rait blong usum kraon blong narafala man be kraon blong hem nomo.

Ans: Mino save hamas be save blong mi, papa blong mi nao hem fas man blong usum, so ples ia nomo mi save be ol nara olfala mi no save long hem.

Ans: Sapos mi save se mi no stret man we blad blong mi i come aot long stret Ona long KIRIVATU bambae mi nosave go inside, be mi biliv se Yes, blad blong mi hemi come aot long stret Kastom Ona long kraon ia Kirivatu.

Q14 Who nao olgeta stret man we i stret man blong tufala name ia SATUGIALIU mo SATUGIAMATA?

Ans: Yu klaim Satugialiu mo mi klei Satugiamata. Tufala name ia SATUGIAMARATA mo SATUGIALIU tufala anda wan name nomo we hemi SATUGIAMATA.

Q15: Papa blong yu James WALLACE hemi putum wan samting insaet long KIRIVATU blong soem se hemi kraon blong hem?

Ans: Samting we hemi putum insaet hemi SNAKE nomo be nara samting minosave. Olgeta land marks hemia nomo we mi soem long yufala taem yumi visitim kraon ia Kirivatu mo istap long sketch map we mi produsem long Kot. (see CLD NO.2)

Ans: Yes, papa blong mi hemi blong Pele island mo ol witness blong mi oli save ansarem quistin ia taem oli come antap.

Q17: Yu gat nara kastom identiti apart from SNAKE, olsem NAKAMAL or NASARA we oli conect wetem Kirivatu? Sapos yes ol samting ia oli stap wea?

Ans: Yes, fas samting hemi SNAKE. Long saet long NASARA hemi MALAPATI. Long saet blong ordeinem wan man blong hemi Jif mifala igo long Emae island. MALAPATI hemi ples blong danis be Tabu samting hemi SNAKE we hemi life be ino stone we i ded samting.

Q1: Who nao i stret Ona long name SATUGIA; SATUGIALIU or SATUGIAMATA mo wea ples nao Nakamal blong hem?

Q3: Jif Thompson TANGARASI, Jif TAVINAWOTA, mo Jif TITONGOA oli lukluk finis long keis ia or nomo?

Ans: Yes, kopi blong Jasmen hemi stap long file blong yufala finis. (see CLD NO.1)

Ans: Name we mi takem (SATUGIAMATA) hemi blong Jif mo minosave takem until Kastom Ceremoni blong takem name ia i take ples.

Ans: Mifala istap anda long Jif T TANGARASI be hemi no save dividem kraon mo givim long ol man.

CLAIMANT CONCLUDED and states:- Mi nomo gat enimo toktok blong talem. Ol toktok blong mi i finis nomo long ples ia mo mi wantem singaotem olgeta five fala witness blong mi blong testify on my behalf. Thank yu your Honour.

Stori long kraon KIRIVATU mo histri blong hem mino save. Olgeta nomo oli save storian long em. Hemi true se tufala brata ia, papa blong tufala Tom Mesek SATUGIALIU i come lukim mi abaot kraon ia KIRIVATU. Hemi true se Tom Mesek SATUGIALIU i come blong askem sipos mi save helpem hem blong tekem aot kraon ia KIRIVATU, be mi talem long hem se minogat rait be igat stret man blong em. Mi talem tu se hemi kraon we yufala SATUGIA i should settlem bitwin yufala. Mi advisem papa blong tufala Tom M SATUGIALIU blong oli mas sitaon tugeta blong settlem problem ia. Hemi sabraisem mi tumas we oli no makem wan samting be oli gohed mo wok long kraon ia.

Long saet long QUICKLY COMPANY we oli bin come wok long KIRIVATU taem ia mi smol yet mo mi luk olgeta i wok long kraon ia. Papa blong Kenneth J SATUGIAMATA (Claimant) i bin pulum plante man blong wok long ples ia Kirivatu. Mi save rimemba wan long olgeta we name blong hemi BOUA mo hemi blong Luapukuti, Tongoa. Taem ia hemi yangfala nomo mo mifala istap pleiplei wetem hem.

Olgeta kokonas we oli planem oli takem long Pele island nomo even come long plantation blong papa blong mi.

Olgeta ia SATUGIA oli blong wan FAREA mo oli anda long mi, no long Kot ia we Kenneth J SATUGIAMATA i talem hemi true se mi nao mi Chairmen long em. Kot ia hemi sidao wan ful dei mo tufala side i strong tumas makem se mifala ino come long wan sakses. Mi traem blong makem se tufala famli i come long PEACE be i hard tumas, so mi just talem long tufala se bambae mifala Jifs i handelem keis ia sapos i come long Aelan Kot or wanen Kot hemi biones blong mifala. Mi traem blong finem wan wei blong tufala famli ia oli come tugeta from oli anda wan Nasara nomo be oli strong tumas makem se yumi come long Aelan Kot dedei.

Wantaem we mi bin lukluk long hole in mi traem splitim kraon in be tufala tugeta ino agri so mi feil blong handelem. Toktok blong mi i finis long plea in.

Q1: Long taem we yu Chairman long Kot we i Jasem keis ia, yu wetem who nao i sitaon long taem ia?

Ans: Taem ia mi wetem trifala Jif ia TITONGOA, MASEREI mo TARILIU mo long taem ia mifala ino bin givim wan stret Jasmen blong talem se who nao hemi stret Kastom Ona long KIRIVATU. Taem ia papa blong yutufala istap.

Q2: Hemi true se papa blong mitufala i askem yu se hemi go insaet long kraon ia KIRIVATU?

Ans: Mi nosave rimemba gud who nao i representem Jif TITONGOA long taem ia be oltaem we mifala i lukluk long Land dispute olsem i mas gat four (4) Jifs i lukluk long em mo taem wan i sik be i mas gat wan i representative blong hem so whoever i representem Jif TITONGOA mi nosave rimemba.

Q4. Taem James WALLACE i takem ol man blong come plan long kraon ia KIRIVATU, taem ia yu save se kraon ia i blong hem stret?

Ans: Mi talem finis se minosave ol histri long kraon blong yufala so ating Kenneth James SATUGIAMATA (Claimant) i save ansarem quistin ia.

Ans: Date hemi stap long Jasmen we yufala igat kopi long em finis. (See CLD No. 1)

Mi wantem makem i klia se olgeta toktok long statement blong Kenneth James SATUGIAMATA oli true. Long 1920 mi save se papa blong hem istap wok long kraon ia KIRIVATU. Mi luk long eye blong mi we hemi takem some men blong wok long em. I bin gat wan Kampani we oli kolem se QUICKLY COMPANY. Papa blong Kenneth James, James WALLACE i singaotem blong wok long kraon ia. Ino bin gat nara man i wok long kraon ia be James WALLACE nomo. Naoia mi kasem 78 years mo mi save gud storian long wanem istap happen long kraon ia. (Kirivatu) Hemia nomo toktok blong mi.

Ans: Name blong kampani ia papa blong Kenneth James i givim mo hemi kampani blong wan football team.

Q3: Long 1920 QUICKLY COMPANY igo wok inside long Kirivatu. Team ia ibin gat samsamting istap finis or hemi bush nomo taem kampani igo wok inside?

Ans: Mi luk James WALLACE wetem Kampani ia igo wok long Kirivatu mo mi harem plante man oli se kraon i blong hem (James WALLACE)

Mi wantem makem i klia se kraon ia KIRIVATU i blong Kenneth J SATUGIAMATA. Mi stap long Pele island fastaem bifo Alfred Tom MESEK wetem brata mo famli oli come. Taem we oli come papa blong mi hemi Jif mo wokem wan haus blong oli come stap long em, so oli come stap wetem mifala. Smol pis kraon we oli stap long em naoia hemi blong SATUGIA-MARATA. Reason why mi talem se kraon ia Kirivatu i blong Kenneth James SATUGIAMATA from papa blong mi i talem long mi. Hemia nomo toktok blong mi.

Ans: SATUGIAMARATA hemi Caleb be hemi ded finis. Hemi gat some pikinini be inogat wan long olgeta i takem name ia yet.

Ans: Stamba blong trifala names ia: SATUGIALIU, SATUGIAMATA mo SATUGIA-MARATA hemi wan nomo.

Q4: Wea ples nao Nakamal blong SATUGIAMATA istap long em from bifo kasem dedei ?

Ans: Mi nosave be papa blong mi i talem long mi se igat wan GRAVE be grave ia ino blong wan Jif.

Ans: Mi save se whoia istap long grave ia be mi nosave talem aot, mo man ia ino grandpapa blong mi or grandpapa blong Kenneth James (Claimant)

Q7: Hamas grandpapa blong James WALLACE finis we oli entitle long name ia SATUGIAMATA mo kraon ia KIRIVATU.?

Long side long Tom Mesek SATUGUALIU we i papa blong Alfred T MESEK wetem brata blong hem Albert SATUGIALIU, mi luk long eye blong mi. Mi big man finis bifo long 1932 mi luk papa blong tufala in SATUGIALIU hemi stap long Pele long village blong Jif TANGARASI. Oltaem taem papa blong Jif Tangarasi i talem wan wok hem Tom SATUGIALIU i neva come mifala nomo. Taem we mi lukim hem (SATUGIALIU) mi kasem 21 years finis.

Tom M. SATUGIALIU i come long Pele since 1932. Igat two pikinini nomo blong hem we i bon long Sake village, Pele be ol nara wan ia olsem tufala brata we istap long Kot naoia tufala i bon long Nguna. Since 1932 ia nao oli start blong settle long Pele mo wokem karen etc...

1946 kasem 1947 Tom M SATUGIALIU i startem problem wetem mi mo brata blong mi. Taem papa blong mi i ded papa blong tufala Tom M SATUGIALIU startem problem wetem mi.

Mi big man finis taem mi lukim we oli planen COTTEN, KOKONAS mo ol nara samting long em. Taem ol kokonas oli bigwan finis afta oli putum buluk mo horse inside.

Taem we papa blong Kenneth James i ded finis hem Kenneth J istap long skul yet. Taem Kenneth J SATUGIAMATA i come bak nao hemi start wok bakeken long same kraon ia.

Caleb taem hemi sik nao hemi handem ova kraon igo long Rolland KALNAGISU blong i lukaotem mo wait long Kenneth James. Hemia long 1966 and from taem ia nao dispute i start blong come aot from SATUGIALIU wetem famli come kasem naoia. Hemia nomo toktok blong mi.

Ans: Papa mo grandpapa blong mi i talem stret long mi se kraon ia Kirivatu hemi blong Kenneth James wetem famli blong em.

Q2: Taem Kirivatu hemi bush yet first man blong puruput long kraon ia hemi who mo wanem nao hemi putum inside long kraon ia ?

Ans: James WALLACE wetem QUICKLY COMPANY nao first man blong wok inside long Kirivatu.

Q3: Taem Kirivatu i bush yet mo James WALLACE igo wok long em, Kirivatu i minim wanem?

Q7: From we yu bin promes long Tabu Baebol finis se bambae yu talem true toktok, mi wantem askem bakeken se hemi true se name blong Snake ia hemi olsem we yu talem ?

Q8: Yu save gud se who nao stret blad Ona long SATUGIAMATA mo blad Ona long Kirivatu mo who nao i teachim yu ?

Ans: Mama blong hem long Nguna island mo papa blong hem long Sake village long Pele island.

Ans: No, inogat dispute kassem taem Tom Masek SATUGIALIU i come settle long Pele island.

Q2: Taem Tom H SATUGIALIU i come long Pele hemi gat kraon long Pele we hemi stap long em mo dispute same taem wetem Kirivatu?

Ans: Yes, hemi gat kraon long Pele be bihaen nao hemi stap dispute akensem Kirivatu.

Mi sapotem olgeta toktok blong Kenneth J SATUGIAMATA. Mi biliv se kraon ia Kirivatu hemi blong SATUGIAMATA. From kraon ia hemi go fass wetem kraon blong mi. From kraon ia, taem mi stap wok long kraon blong mi wetem grandmama LEIATU mo grandpapa TOMVATU tufala i talem long mi se mi nomas wok ova long kraon ia from hemi blong SATUGIAMATA. From kraon ia mi save histri long em mo mi save histri long famli blong James - WALLACE we i papa blong Kenneth James (Claimant).

Long histri blong James WALLACE hemi come from Efate. Name blong papa blong James WALLACE hemi MALASIKOTO. Malasikoto ia hemi gat two brata mi nosave name blong tufala. Name blong woman blong Malasikoto hemi LEIRIBU. Leiribu igat tri (3) pikinini we 1st bon James WALLACE, 2nd bon Caleb mo las bon we hemi gel name blong hem SEPORA.

Name ia SATUGIAMATA, Malasikoto nao i takem name ia. Satugiamata hemi head Jif long Satugiamarata mo Satugialiu. Satugiamata afta Malasikoto i ded hemi givim long James WALLACE mo afta James WALLACE ded hemi givim long Kenneth Kames we hemi Claimant naoia. SATUGIAMATA takem ol NAKAINAGA blong hem afta oli go long Emae island mo oli holem hed blong SATUGIA – MATA.

Long side long kraon ia mi witness long hem from uncle blong mi TITONGOA hemi talem long mi, wetem Willie KALOLO wetem Jif MASEREI TONGA.

Olfala ia TITONGA hemi talem histri long famli blong Tom Masek long mi. Hemi talem long mi taem mi stap wetem hem long Launamoa village long Pele island.

Taem Tom Mesek i sperem wan KARONG (fish) mo i takem i come sakem long village ia Launamoa mi stap long taem ia mo mi lukim fish ia afta mi askem long Jif Titongoa se who ia man ia mo hemi come wea? Jif Titongoa i talem long mi se, Tom Mesek ia mo hemi narafala uncle blong mi we hemi wan brata blong hem.

Mi askem ss olsem wanem hemi no come. Afta Jif Titongoa i se Tom Mesek i bon long Emau island long village oli callem se MABUA mostret ples we hemi bon long em hemi MALATONU. Tom Mesek i aot long Emau mo hemi go stap long Nguna. Uncle Titongoa i talem long mi se bambae wan dei Tom Mesek wetem famli blong hem i come long Pele island.

Tom Mesek istap long Nguna kassem taem hemi bonem tufala ia Alfred T MESEK (Defendant) wetem brata blong hem Albert SATUGIALIU. Tom - Mesek wetem famli oli stap long UNAKAP village Nguna mo ol man long ples ia oli finem se oli stap wokem wan fasin blong stil long Karen. Wan dei oli fainem pruv se famli ia nao se oli holem wan miting mo oli talem se Tom - Mesek wetem famli oli mas go bak long Pele island.

Taem Tom Mesek i come long Pele i come stap wetem uncle Jif Titongoa. Long taem ia hemi askem Jif Titongoa blong givim wan ples blong hemi stap long hem. Jif Titongoa i givim wan pis kraon mo hemi talem stret long hem (Tom Mesek) se kraon ia ino blong tufala be hemi blong SATUGIAMARATA. Kraon ia oli stap long hem kasem dedei. Famli SATUGIAMARATA wan long olgeta istap long Paunagisu village mo name blong hem emi Tom TASARURU we mama blong hem emi LEIKAS. Toktok blong mi hemi finis long ples ia.

Q1: Satugiamata we hemi base long Emae mo hemi boss long olgeta samting long Emae, hemi gat rait blong come long Pele mo boss long olgeta kraon we Satugialiu i lukaotem?

Ans: Evri Jif we oli stap long Shebhard group oli aot long Efate. Satugia – mata hemi aot from BUVA mo stret man ia nao hemi Malasikoto mo long Emae igat ples blong Satugialiu tu wetem kraon.

Q3: Hemi true se SATUGIAMATA blong Emae hemi putum hand long James WALLACE blong hemi come takem kraon long Pele island?

Q4: Malasikoto we hemi bonem James WALLACE hemi really blad line blong holem Satugiamata follem papa afta papa kasem Kenneth James?

Ans: Olgeta olfala we mi talem aot name blong olgeta long first toktok blong mi oli talem long mi se yes hemi stret man blong takem name ia.

Ans: Jif Titongoa no Jif Satugiamata tufala istap inside long bountri blong Thompson TANGARASI.

Q6: Jif Titongoa igat rait blong taken graon blong narafala man mo givim long nara man ?

Ans: Taem Jif Titongoa i takenm step blong givim kraon blong Satugiamarata long Tom Mesek hemi ordain finis mo tu tufala i wan famli nomo so from we hemi sori long hem nao hemi givim kraon ia we istap inside long bountri we hemi lukaotem. So hemi gat rait blong takem decision olsem.

Q7: Malasikoto we hemi papa blong James WALLACE hemi true native blong Pele island ?

Ans: Hemi stap long village blong Jif T.TANGARASI we hemi WARASIVIU we hemi new village be olfala villago hemi SUMANTAVA.

Ans: Papa blong Tom TASARURU hemi blong Nguna be mama blong hem long Pele mo from reason ia nao Tom TASARURU i entitle long name ia SATUGIAMARATA from hemi name blong famli we mama blong hem i come from long Pele.

Q10: Hemi Kastom blong yumi long Efate or ol smolsmol island aotsait Efate espesiali long North Efate blong Tom TASARURU hemi save takem name olsem SATUGIAMARATA follem blad line blong mama blong em be ino name blong papa blong hem we hemi Jif Tom TABAURIBU blong Nguna ?

Ans: TABAURIBU hemi takem wan woman Efate. Woman ia hemi gat plante kraon. Hemi talem long Tabauribu se naoia yu come stap wetem mi long Efate. Woman ia name blong hem MARERE we i blong Paunagisu village. Taem man blong Marere i agri blong go wetem woman blong em blong stap long Efate hemi takem aot name ia TABAURIBU mo givim long wan pikinini blong brata blong em mo name blong boy ia hemi TAPAU. Taem hemi takem aot name ia hemi come stap long Efate mo ino longtaem woman ia i ded mo bihaen hemi maretom nara woman LEIKAS we hemi mama blong Tom TASARURU blong Pele. So hemi Kastom blong Efate blong man i save takem name blong papa or mama.

Q1: Taem Malasikoto i aot from Efate (BUVA) mo igo long Pele, igat some Jif istap finis or nogat?

Ans: Taem ia ol Jif ia istap finis: Jif T. TANGARASI, TITONGOA, TARILIU mo MASEREI.

Q4: Malasikoto hemi gat rait blong givim name ia SATUGIAMATA long boy blong hem James WALLACE?

Q5: Igat tri SATUGIA ia e.g MATA, MARATA mo LIU. Satugia-LIU hemi givim long who?

Ans: SATUGIALIU hemi name blong Emae be SATUGIAMARATA mo SATUGIAMATA tufala name ia name blong Pele. Tufala names ia Satugia - MARATA mo LIU i foldaon yet no ino come antap yet olsem SATUGIAMATA.

Q7: Yu talem se Malasikoto hemi come from BUVA, Efate mo hemi go maretem woman Pele, Hemi gat rait blong Onem kraon long Pele?

Q9: Taem Malasikoto i come long Pele, hemi gat two sons wetem wan gel. Igat man istap long Kirivatu finis or nomo ?

Q1: How nao Tom Mesek i bon long Emau, afta hemi go stap long Nguna, oli ronem hem afta hemi go long Pele mo Jif TITONGOA i givim kraon long em?

Ans: Taem papa blong Tom Mesek hemi go teach long Habua village Emau, Tom Mesek mo Jif Titongoa tufala igat wan mama nomo. So taem papa blong Tom Mesek istap teach yet Tom Mesek ino bon yet, be Jif Titongoa nomo. Afta wan man Emau long Mabua village i stilim mama blong Tom Mesek nao hemi bonen Tom Mesek. Name blong man Emau ia hemi KALOMATA. Tom Mesek hemi bon long Emau mo olfala MASARAFIA i lukaotem Tom Mesek be mi nosave se hemi adobtem hem or nomo.

First samting, mi wantem talem tankyu long Klak mo Jastis we mi save gat janis ia blong tok long side long kraon ia KIRIVATU. Olsem mi nao main person we i makem se dispute istap long kraon ia. Mi bin preperem finis statement blong mi be mi gat problom long eye we taem mi rid long taem ol wora long eye blong mi istap ronron. So mi wantem passem Statement ia long Kot mo mi wantem sipos Klak i save ridin blong mi.

(Defendant's Statement read out in Court by the Clerk) see Defendant Dockument Number 1 as marked DFD NO. 1)

Mi wantem closem toktok blong mi olsem se lukluk long olgeta toktok blong mi we Klak i just ridim aot long Kot hemia nomo ol toktok blong mi no mi biliv se oli true toktok olsem we mi promes long Baebol long face blong ol Jastis blong Kot. Tankyu your Hona.

Q2: Sapos yu say Tom Mesek hemi rait man blong karem name ia SATUGIALIU mo rait Kastom Ona long KIRIVATU, yu save talem some names blong some olfala we istap long Pele naoia we oli save sapotem histri blong yu start from 1920 icome kassem 1987?

Ans: Mi bon long 1936 mo ol olfala we istap since 1920 kasem 1987 we oli save sapotem Histri we mi putum aot long Kot, mi save se igat some olfala blong yufala tu be mi no bin lukaotem Histri ia from olgeta or ol Jifs. Histri ia i blong mifala nomo long Famli SATUGIALIU.

Q3: Tom Mesek we hemi papa blong yu, hemi gat brata or sister we i stil life dedei?

Ans: Mi rikotem not from papa blong mi we Famli i passem i come daon kassem mifala.

Q5: Yu talem se Famli SATUGIALIU taem i come settle long Pele inogat wan man nating istap long Pele taem ia. Yu gat pruv long em ?

Ans: Yes, igat plante samting we i save pruv olsem we mi writen long statement blong mi.

Q6: Sapos statenment ia i true se Famli blong Tom Mesek fan wan blong arrive lung Polo long year we yu no talem aot mo from taem TANGARASI, TITONGOA, TARILIU mo MASEREI wetem ol pipol blong ol, taem oli stap wokabaot long ol bountri long Pele, Satugialiu hemi stap quistinim olgeta long em or nomo ?

Ans: Name ia SATUGIALIU hemi wan Chiefly name blong makem PEACE from tufala name ia SATUGIALIU mo MAUTAFILIU i man blong makem PEACE. Hemia toktok we papa i talem long mi. Long taem ia each Jif istap long own bountri blong hem. Long side long TANGARASI hemi Spokesman blong Jif SATUGIALIU, so ol famli SATUGIALIU oli blong wan Nakamal nomo.

Q7: Yu say taem igat rao bitwin ol Jif, Jif SATUGIALIU i makem PEACE. Wanem PEACE nao hemi makem ?

Ans: Itrue Peace Ceremoni istap takem ples we Jif SATUGIALIU istap organisem. e.g Mi rimemba wan PEACE Ceremoni we hemi sakem blong Jif TITONGOA taem ol pipol blong hem oli rao nao oli ronwei wanwan.

Q8: Refer long Statement mo toktok blong yu antap yu se TANGARISI hemi Spokesman blong Jif SATUGIALIU. Why nao hem, TANGARASI i putum hand long wan SATUGIALIU we humi stap dedei ?

Ans: Olgeta samting i jenis afta we papa blong mifala i ded. Blong Jif - Tangarasi i putum hand or ordeinem present Satugialiu hemi follem riqest blong famli SATUGIALIU. From name ia SATUGIALIU inosave slip nomo olsem istap, so hemia i wokem nomo olsem from hemi start bifo finis.

Q9: Refer long Statement blong yu, yu say taem wan man oli ordainem hem Jif igat Stone we man igo sidaon long em. From wanem nao Jif Albert – SATUGIALIU, taem Jif TANGARASI i putum hand long hem hemi no sidaon long Stone ia?

Ans: Mi ting ansa mi givim finis mo minosave ripitim bakeken from dispute hemi long side blong KIRIVATU.

Ans: SEREVAKALO mi save gud mining mo stori blong em be storian long em hemi long wan tunas. Sapos mi storian long em bambae mi takem long taem long em. So mining blong hem se "YUMI PASS LONG PLES WE YUMI TING IGAT FAIT LONG EM."

Q11: Yu say tufala SATUGIALIU fas taem, taem tufala i come shore long Pele inogat man, Afta yu say tufala istap wokabaot be same taem tufala istap frait long man. Yu save makem ples ia i klia?

Ans: First wokabaot blong tufala hemi wan quik luk nomo sapos igat man long Pele mo tufala i fainem se inogat, bihaen nao tufala igo bak takenm famli mo come bak bakeken long Pele blong stap.

Q12: Sapos Ton Mesek i save se SATUGIALIU nao i Kaston Ona long kraon ia Kirivatu, from wanem nao hemi no stopem SATUGIAMATA taem oli start blong wok long em ?

Ans: Inside long wan Statement blong mi hemi ansarem quistin ia finis. (see DFD NO.4 para.2)

Q14: Sapos Tom Mesek i save se Kirivatu i kraon blong hem, why nao hemi go stap long Nguna?

Ans: Hemi stap long Nguna from same wok ia we papa blong hem i wokem olsem Teacher. Hemi take ova long hem mo hemi holem wok ia long 11 years.

Q15: Sapos Satugialiu hemi fas famli blong come shore long Pele, why nao taem Tom Mesek i come bak long Pele hemi askem kraon bakeken long Elder Kenneth BILLY ?

Ans: Mi no agri long quistin ia from hemi tokabaot nara bisnes. Hemi no stap inside long Statement we mi makem.

Q16: Mi wantem save sapos Tom Mesek i stret man Pele hemi planem some kokonas we i stap kasem dedei ?

Ans: Tom Mesek hemi gat bigfala or plante kraon we plante man Pele nao oli life long em. Olgeta oli save gud be oli wantem hidem. Talolo - SATUGIALIU we hemi grandpapa blong mi, hemi planem plante kokonas finis istap long some smolsmol ples long kraon blong hem finis afta James - WALLACE hemi just come long Pele. So ansa blong quistin hemi yes.

Q18: Long Pele igat four Jifs wetem bountri blong olgeta. Jif TANGARASI, Jif MASEREI, JIF TITONGOA, mo Jif TARILIU. Olgeta nao mifala evriwan long Pele island i save bountri blong ol. Wea nao bountri blong Satugialiu ?

Ans: Hemi klia nomo. TASIRIKI area hemi bountri blong Jif SATUGIALIU from first landing blong olgeta long Pele tufala SATUGIALIU we Statement i tokabaot hemi area we tufala i wokabaot long em. Taem tufala i come bak namba 2 taem afta tufala (SATUGIALIU mo MAUTAFILIU) i putun olgeta nomo ia long each point blong marekem bountri: TAFALELE NO.1 point, KIRIVATU NO.2 point, SEREVAKALO NO.3 point, antap long hem we igat wan STONE we igat four corner long em hemi VATUKANASI NO.4 point mo last mark hemi FALEAKABU NO.5 point. Long ples ia tufala i planem wan NAGAU, hemi still stap dedei mo miting bambae i ded from mi luk we Elder Kenneth BILLY i bonen smol.

Ans: Mi nosave anserem quistin ia from mi nosave wea nao bountri blong Jif T. TANGARASI from mi nosave wea ples we hemi wokabaot long em, be bountri we mi talem fastaem hemi bountri we ol bubo blong mi oli wokabaot long em.

so tufala name ia i min se hemi WARRIOR mo same taem hemi holem wok blong Jif taem big brata blong hem i ded.

Q21: Yu agri long bountri we mi soem long olgeta Jastis wetem Klak blong Kot taem yumi go visitim ?

Ans: Mi agri long bountri ia, be smol ples nomo yu mestem, olsem yu soem tri (3) kokonas be stret mark nao hemi wan NAKARIE olsem we istap long sketch map we mi wokem. (see DFD NO.6)

Q22: Sapos grave blong Satugialiu istap inside long Kirivatu, why nao yu no soem taem yumi wokabaot long em?

Q23: Mi bin askem plante quistin we some long ol quistin Defendant i ansarem be some hemi no anserem so naoia mi nomo gat quistin blong askem.

Q1: Satugialiu mo Mautafiliu, tufala name ia i blong Efate mo tufala ia i blong Efate?

Ans: Yes, hemi true olsem taem tufala i stap long Efate yet tufala istap anda ol narafala Jif mo taem tufala igo long Pele tufala i takem names ia igo wetem tufala.

Q2: Yu save talem wea ples stret long Efate tufala brata ia i come aot long em mo go long Pele?

Ans: Papa i talem long mi se tufala i come aot from MALAFAU long Port - HAVANA antap long bush.

Q4: Satugialiu mo Mautafiliu, taem tufala i land long Pele olgeta four Jifs we istap long Pele naoia oli stap finis or nomo ?

Q5: Hemi true se fourfala Jif we istap naoia oli no stap taem tufala Satugialiu igo shore?

Ans: Taem mi talem se oli nostap mi stap refer long area we hemi bountri blong TASIRIKI.

DEFENDANT CONCLUDED:- mi wantem makem wan correction long toktok blong mi olsem, taem mi talem se fastaem we tufala SATUGIALIU mo MAUTAFILIU i go shore long Pele "OL JIF INOGAT YET" mo putum olsem se, taem tufala igo shore long Pele "INOGAT WAN JIF YET" inside long bountri blong Tasiriki. Hemia nomo. Tankyu your hona.

Mi bon long 14 July 1927. Mi stanap blong witessem long wanem hemi stap long pepa finis we istap finis long hand blong yufala. Hemi some i klia gud long trifala side we hemi dispute we yumi stap long em dedei.

Namba 1. hemi KIRIVATU, namba 2 hemi name ia SATUGIALIU mo namba 3 hemi name ia SATUGIAMATA.

Naoia mi stori abaut KIRIVATU. Land Kirivatu we hemi dispute bitwin famli Satugialiu mo Satugiamata mi biliv strong long name blong God se Kirivatu mifala nao SATUGIALIU i really Kastom Ona long kraon ia follem blood blong Bubu blong mifala come kasem mi we i namba six (6) generation mo Jif. Hemia Histri blong KIRIVATU.

Naoia mi wantem tokabaot name ia SATUGIALIU. Mi save gud se plante quistin igo finis long side long name ia. Mi biliv strong long name ia Satugialiu hemi blong mifala we mi Jif Albert SATUGIALIU i holem istap dedei. Evri Tabu samting blong hem olsem we mifala i some long yufala finis long taem blong wokabaot hemi soem se oli blong name ia SATUGTALIU follem famli Tree blad line blong mifala.

Naoia bambae mi givim ol name blong ol properti blong name ia SATUGIALIU. NO.1 Nakamal blong Satugialiu name blong hem emi FANUMAURUA. Igat Stone blong NAFUSAKEANA istap long em. Name blong em hemi VATU NINA-FUFUSAKEANA.

Malala blong Satugialiu we hemi ples blong danis name blong em hemi MALAPATI i mean se PATISIKOSIKONAWOTA. Malala ia hemi gat wan grave we hemi blong 1st SATUGIALIU we oli berem hem taem hemi life yet. Oli berem hem wetem ol NALIKAU (fighting weapons) blong hem blong witnessem bountri mo evri smolsmol properti inside long TASIRIKI. Ol toktok oli pass through six generation kam kassem mi we papa blong mi i talem long mi.

NO.3 smol stori long side blong SATUGIAMATA. SATUGIAMATA stori blong em we i stap long Statement finis i soem aot i klia who nao i really blad blong Satugiamata we hemi stap naoia long Emae. Name blong tufala ia KOLEMANSAKAU mo MAKALIKEO wetem ol pikinini blong tufala. Olgeta nao oli really blad line blong SATUGIAMATA we oli stap dedei long Emae wetem ol samting blong olgeta we oli stap tu long Emao. Hemia nomo we mi save witness long side blong name ia SATUGIAMATA.

Last toktok blong mi hemi olsem se s'pos quistin i come long mi abaot ol samting we mi tokabaot mi save ansarem, be s'poes i pass aotside mi nosave ansarem. Hemia nomo Tankyu tumas Your Hona.

Q1: Histri we yu just talem aot antap, yu karem stret from papa blong yu or from narafala man we i sapotem Histri ia ?

Ans: Mi nogat wan man we i sapotem mi blong takem Histri ia. Histri ia mi mi talem stret from papa blong mi we papa blong hem i teachim hem.

Q2: Name ia SATUGIALIU yu save talem from wanem nao yuno sitaon long stret FAREA blong yu taem oli ordainem yu, Olsem yu no sidaon long Stone we oli stap ordainem olgeta SATUGIALIU?

Ans: Reason from mifala Satugialiu Famli i agri blong makem wan saen se name ia ino ded be i life istap kasem taem mifala i fainem stret man m'bae mifala i singaotem SATUGIAMATA from Emae blong come putum hand long man ia long stret ples blong em we hemi VATU-NAFUFUSAKEANA.

Q3: Toktok we yu talem se SATUGIALIU hemi bigfala Jif mo taem we oli berem hem alive, who nao I givim orda se oli berem hem olsem mo who olgeta man ia we i berem hem ?

Ans: Jif SATUGIALIU nao i givim orda mo brata blong hem MAUTAFILIU nao i berem hem afta we hemi givim name ia SATUGIALIU long hem.

Ans: Mi nosave ansarem stret quistin abaot ol nara smolsmol grave ia but main wan nao mi ansarem finis.

Ans: Oli ordainem olgeta long same ples we mi talem finis mo berem long same ples we oli berem first SATUGIALIU. So ol nara Jif oli berem long same ples.

Mi come blong witnes blong big brata blong mi Alfred Tom MESEK. Long side blong kraon Kirivatu olsem we papa blong mi i teachim mifala long em se, kraon ia Kirivatu i blong Jif SATUGIALIU follem blad blong Famli Tree we i come kasem mifala dedei. Hemia nomo, Tankyu.

Q1: Taem James WALLACE istap wok long Kirivatu from wanem yu no dispute wetem hem ?

Q2: Olgeta toktok ia we yu talem mo Famli Satugialiu nao hemi stret Kastom Ona long Kirivatu, who nao i Jif or olfala we i givim toktok ia blong apruvum really blad blong Kirivatu?

Q3: Yu save sapos igat anymore man outside long Famli Satugialiu we yu harem hemi talem tok ia mo Famli Satugialiu hemi Kastom Ona long Kirivatu?

Mi come witnes long side blong papa blong mi Alfred Tom MESEK long side long Kirivatu follem blad line we hemi Jif SATUOIALIU. Kraon ia Bubu blong mi i teachim mi se hemi blong SATUGIALIU. Mi nosave talem anymore toktok be follem Statement we i come aot mi save mo biliv se hemi true. Hemia nomo toktok blong mi.

Q1: Long wanem Bubu blong yu i teachim yu or givim toktok ia long yu, hemia blong Emae or blong wea?

Ans: Teaching ia mi takem from Bubu blong mi we hemi papa blong papa blong mi Alfred T MESEK mo name blong Bubu blong mi hemi Tom Mesek SATUGIALIU.

Q3: Taem we Bubu blong yu i talem Histri ia long yu, yu bin talem long some nara man we i aotside long Famli Satugialiu or from yu just harem long papa blong yu nomo nao yu sapotem?

Ans: Bubu blong mi i talem Histri ia taem mi smol yet kasem taem mi go long Primary Skul. Evri taem afta long kakae mi go lukim hem mo hemi stap storian long em, even taem mi go long College taem mi spel mi stap go lukim hem mo hemi storian long Histri ia. Long side blong storian long nara man outside ansa hemi NO.

Ans: Yes, mi go last taem ia nomo. Mi go lukim mama blong mama blong mi or grandmama blong mi.

Emia mi pruvum se Kenneth J SATUGIAMATA emi rili Kastom Ona blong land ia KIRIVATU.

1. From we Famli Tree blong SATUGIAMATA emi soem aot se James Wallace - SATUGIAMATA emi stret pikinini blong MALASIKOTO SATUGIAMATA mo stret blad blong hem.

2. From we four fala Jifs mo wan Church Leader oli come witness long kraon ia oli representem four main area blong Pele island.

3. From we Alfred Tom MESEK hemi produsum wan map we inogat land marks, mo hemi agri long same wan we mi bin makem wetem ol Jastis, mo hemi agri long map we mi soem long Kot from we ikat Land Marks.

4. From we bifo mifala i kivim evidence blong mifala long Kot, ol Jastis i mas luksave ol witness blong mifala. Fourfala Jifs mo wan Church Leader oli witness blong mi.

5. From we ol witness blong mi oli olfala mo oli save gud Kastom blong mifala mo year blong olgota start long 65 years igo kasem 78 years.

6. From we James Wallace SATUGIAMATA hemi gat Tabu Snake istap long kraon ia, mo Tom MESEK inogat wan Tabu samting istap long kraon ia KIRIVATU.

7. From we James W SATUGIAMATA wetem brata blong hem CELEB istap wok long kraon ia from 1917 kasem 1966.

8. From we Jif Kaosel blong Pele island oli bin stretem finis long 1977 se Tom MESEK, hemi no true Kastom Ona blong Kraon ia KIRIVATU.

10. Mi gat bigfala Honour long ol Jastis, blong talem se ol point we mi putum bambae ol Jastis m'bae i takem gud considaresen long em. Hemia nomo, Tankyu your Honour.

Olsem yumi save se two main samting we i stampa blong dispute hemi KRAON mo tufala Jif names (SATUGIAMATA mo SATUGIALIU).

1. Mifala i save se kraon ia KIRIVATU, mifala nao i rili stret Kastom Owna long em follem blad line blong Famli Tree blong mifala, mo i gat ol Tabu samting blong mifala blong bifo istap. Ol Tabu samting ia hemi ol pruv blong Jif SATUGIALIU se hemi true first Jif blong TASIRIKI eria.

2. Mifala i save mo biliv se TALOLO mo TOMVATU i planem kokonas i stap finis bifo WALLACE i askem blong planem Cotten long em blong blokem TANGARASI ino wok long em.

3. Mifala i biliv tu se WALLACE hemi rifus blong washem hand blong Tom VATU from hemi save se kraon ino blong hem be Tom Mesek SATUGIALIU nao i washem hand blong Tom VATU. Hemia i soem i klia gud se KIRIVATU i blong Torn Mesek SATUGIALIU.

4. Long side blong tifala name ia SATUGIALIU mo SATUGIAMATA, long bifo come SATUGIAMATA we i stap long Emae hemi High Jif blong ol SATUGIA we oli stAp long Emae nomo.

5. Mifala i save tu se mifala nao i rili stret blad line blong Jif SATUGIALIU we istap long Pele follem Famli Tree blong mifala long earliest time long bifo kasem naoia, mo mifala ol blad line blong SATUGIALIU i save gud se name ia SATUGIAMATA ino stret name blong Kenneth i takem, from hemi no blad line blong hem. Satugiamata i gat ol Tabu ples blong hem tu istap long Emae, mo ol stret blad line blong hem nao hemi, Kole MANSAKAU mo MAKALIKEO wetem ol pikinini blong tufala.

6. KIRIVATU Tabu Land wetem ol narafala Tabu Land we hemi stap long bountri blong TASIRIKI hemi truely Birth RIGHT blong ol Ancestors or five (5) great bubu blong mifala, we wan man inosave jenisim long wan narafala man or makem exchange long wan samting or pem long wan PRICE. e.g long 1 King 21:2 (RSV)

-- And after this Ahab said to Naboth, "Give me your vineyard, that I may have it for a vegetable garden, because it is near my house; and I will give you a better vineyard for it; or, if it seems good to you, I will give you its value in money."

Afta we Efate Aelan Kot i sidaon from nambn 4, 5, 6 mo 7 May 1987 blong harem keis ia follem KIRIVATU Land Dispute we istap long Pele aelan. Kot i lukluk gud mo considerem olgeta toktok blong tufala Parti ia:

1) CLAIMANT - Kenneth J SATUGIAMATA we hemi representem SATUGIAMATA Famli mo wetem em, hemi gat 5 Witness. Igat Jif T TANGARASI, Assist/Jif Kalran ATAFI, Jif Seth TITONGA, Elder Kenneth BILLY mo Jif Tamara MANSES.

2) DEFENDANT - Alfred T MESEK we hemi representem SATUGIALIU Famli mo wetem em, hemigat 3 Witness. Igat Jif Albert SATUGIALIU brata blong hem, Nettie T.MESEK sista blong em mo John ALFRED son blong hem.

Afta we Kot i lukluk long olgeta toktok blong tufala Parti wetem witness blong tufala, Kot i fainem inav Pruv mo:i Biliv strong se stret mo true Kastom Ona long kraon ia KIRIVATU hemi Famli SATUGIALIU follem olgeta reasons ia-

1:1) Defendant i kleim se Famli SATUGIALIU naoia i ova 6 generation we i come aot from tufala brata ia, SATUGIALIU mo Mautafiliu SATUGIALIU. Tufala ia i come aot from Malafau North Efate mo first man blong go shore mo settle long bountri blong TASIRIKI long Pele aelan. (Ref DFD No.1)

Malasikoto SATUGIAMATA, James Wallace SATUGIAMATA mo hem Kenneth James SATUGIAMATA. Wit.No.5 Jif Tamara MANSES i talem aot long Kot se MALASIKOTO I come aot from BUVA long Efate mo go long Pele aelan.

Kot i lukluk long tufala kleim long Famli Tree ia mo akseptem tufala tugeta. Same taem hemi luk se Famli Tree blong Defendant i hevi more long hemia blong Claimant.

2:1) Defendant I talem long Kot se first man blong wokabaot long KIRIVATU Land Dispute emi first SATUGIALIU mo brata blong hem MAUTAFILIU.

2:2) Claimant i talem aot long Kot se first SATUGIAMATA blong purufut long KINIVATU Land Dispute hemi papa blong hem James W SATUGIAMATA mo hemia long 1917.

Kot i lukluk long tufala kleim ia mo akseptem tufala tugeta. Same taem Kot i luksave se Famli Satugialiu i first taem follem big difren long Famli generations.

3:1) Defendant i talemaot long Kot se taem great, great Bubu blong hem SATUGIALIU wetem brata blong hem MAUTAFILIU igo bak long Pele aelan long namba 2 taem wetem famli blong tufula, tufala i wokabaot bakeken long kraon blong markem bountri blong TASARIKI Mo KIRIVATU hemi wan point we i markem bountri ia. So name ia KIRIVATU tufala nao i givim.

3:2) Claimant ino talem aot long Kot sapos wan memba blong Famli SATUGIAMATA nao i givim name ia KIRIVATU. Namba 2 Witness blong Claimant i talemaot long Kot se hemi nosave wanem taem nao kraon ia i takem name KIRIVATU.

Kot i. lukluk bakeken long tufala kleim ia mo akseptem toktok blong Defendant se SATUGIALIU mo MAUTAFILIU nao i givim name blong kraon ia se KIRIVATU.

4:1) Defendant i talemaot long Kot se first man we i wok inside long kraon ia KIRIVATU hemi grandpapa blong hem Talolo SATUGIALIU.

4:2) Claimant i talemaot long Kot se papa blong hem James W SATUGIAMATA, hem nao first man blong wok inside long KIRIVATU. Hemia long 1917.

Bakeken Kot lukluk long tufala kleim ia mo luksave se TALOLO i more old long James WALLACE so Kot i takem disisen ia se TALOLO nao first man blong wok inside long KIRIVATU.

5:1) Defendant ino givim eni reason why Talolo igo wok inside long KIRIVATU be reason we hemi givim se why James WALLACE igo wok inside from papa blong hem Tom MESEK i letem hem (James WALLACE). Olnara reason from, taem tufala, Tom MESEK mo James WALLACE istap long Emau tufala i singaotem tufala se brata, mo tufala i luksave se tufala i come aot from wan NASARA nomo. Last reason blong stopem TANGARASI ino wok ova mak blong KIRIVATU.

5:2) Claimant ino givim eni quistin blong akensem agrimen bitwin papa blong hem mo papa blong Defendant, or even friendship blong tufala. Claimant wetem namba 1 Witness blong hem i agri se tufala famli ia, SATUGIALIU mo SATUGIAMATA i blong wan NASARA nomo.

Kot i luksave se Tom MESEK mo James WALLACE i blong wan generation, so hemi possible blong wan agrimen olsem isave take place follem toktok blong Defendant.

6:1) Defendant i talemaot long Kot se afta we James WALLACE i start wok inside long KIRIVATU wan long olgeta man we i wok blong hem emi Tom VATU. Tom VATU i finis long wok mo afta hemi askem James WALLACE blong washem hand blong hem (pem hem) be James WALLACE i talem long hem se kraon ino blong hem be stret man blong kraon istap wok long ship taem hemi come afta hemi just washem hand blong Tom VATU. Man ia hemi Tom MESEK, papa blong Defendant. Taem Tom MESEK i come bak hemi pem £3.00 igo long Tom VATU.

Kot i luk se hemia i wan strong statement blong pruvum se Famli SATUGIALIU i true Kastom Ona long KIHIVATU.

7:1) Lukluk blong Kot long olgeta witness blong Defendant long side long Kirivatu Land Dispute, Kot i luk se oli save gud Histri blong olgeta. Kot i luk tu se ol toktok blong olgeta i agri wetem olgeta statements we Denfendant i givim. Kot igat rispek blong considerem mo sapotem statement we Witness No.1 (Jif Albert S) i putum aot blong kleim se name ia SATUGIALIU i blong hem. Kot hemi impress bigwan long how Jif Albert i save pruvum long Kot save blong hem long side long Histri blong Famli SATUGIALIU.

7:2) Kot i lukluk long ol toktok blong witness blong Claimant mo finem aot some toktok blong olgeta ino sapotem some toktok we Claimant I putum aot long Kot. Example hemi stap long side long Village Kot Judgement we Claimant i talem aot se Kot ia (Village Kot) i givim disisen se hem (Claimant) nao i Kastom Ona long KIRIVATU be toktok blong Witness No.1 i dinaern Judgement ia.

Kot i luk se olgeta Witness blong Claimant oli no witness long Kot nomo from oli Jif mo Church Leader long Pele aelan BUT from oli gat some nara privet bisnes finis akensem famli Satugialiu.

8:1) Start long or bifo namba 30 Mei 1987, Kenneth J SATUGIAMATA ino mas intafia long wanem plan Famli SATUGIALIU i makem blong divelopem kraon ia KIRIVATU.

8:2) Sapos Kenneth J SATUGIAMATA ino rispektem Kot Orda ia bambae Kot i considarem aksen ia olsem wan "contempt of Court" mo hem (Kenneth J - SATUGIAMATA) i save pass long Kot bakeken follem aksen ia mo hemi save pem wan faen we ino ova long VT24.000 (Island Court Act No.10 1983 section 19)

8:3) Kot Orda (8:2) hemi applae tu long eni man Pele aelan we ino memba long Fanli SATUGIALIU.

8:4) Sapos Kenneth J SATUGIAMATA i interest blong wok inside long KIRIVATU Kot i rekomendem blong hem (Kenneth James S) i takem same step we papa blong hem James W SATUGIAMATA i takem wetem papa blong Alfred T MESEK. Hemia long condition we sapos Famli SATUGIALIU i agri.

8:5) Kot i givim 30 dei blong Kenneth J SATUGIAMATA i appeal sapos hemi no agri long JUDGEMENT mo ORDER blong Aelan Kot. Date blong appeal hemi start from namba 30 Mei kasem namba 2 Julae 1987.
Seen by: Jastis - Waea TENENE
Jastis - Tom KALTAL
Jastis – Johnson SOPE
Aelan Kot Klak - RAKAU

Supreme Court of Vanuatu

Satugiamata v Mesek [1987] VUSC 19; Land Appeal Case 01 of 1985 (27 May 1987)