Arumalo v John [2005] VUICB 2; Civil Case 15 of 2005 (25 April 2005)

IN THE EFATE ISLAND COURT OF
THE REPUBLIC OF VANUATU
HELD AT TASERIKI VILLAGE
MOSO ISLAND
(CIVIL JURISDICTION)

CIVIL CASE NO. 15/2005

BETWEEN

DONALD JAMES ARUMALO
APPLICANT

AND

SATHY JOHN
RESPONDENT

CORAM: JUSTICE MAKAL KALSONG
JUSTICE ANN KALO
JUSTICE ERICK MESAU

CLERKS: JONA MESAO
SHEMI JOEL

JUDGMENT

BACKGRAON BLONG CASE.

Hemia hemi wan application we applicant Donald James Aromalo hemi filem long kot ia 1ong namba 1^st March, 2005 mo hemi claim se Mr Sandy John blong Moso Island hemi no gat raet blong iodein olsem Chief "Mansakau". Hemia taem se olgeta jifs blong Moso oli bin odeinem hem (Sandy John) long title ia Mansakau long namba 10 January, 2005 witaot consen blong hem.

Sandy John ifilem kounta klem blong hem mo talem se hem to ikat raet long Jifly Title ia Mansakau.

Long namba 18^th April, 2005, Efate Aelan Kot isitaon long Taseriki Village long Moso mo harem dispute ia bitwin Mr Donald James Aromalo, we hemi applicant mo Mr Sandy John we hemi responden.

Case blong Donald J. Aromalo.

Long case blong applicant we hemi Donald J. Aromalo, kot ia hemi harem se Paramoun jif we hemi Jack Kalsav Mansakau hemi maretem wan woman nem blong hem hemi Tourisu. Jif Jack Kalsav Mansakau mo Tourisu tufala igat 2 pikinni gel be tufala ino gat pikinni boe. Tufala gel ia igat Silai we hemi fes bon mo Mima we hemi seken bon. Silai hemi maretem wan man Farealape long Nguna Aelan we nem blong hem hemi Philip Masesongi mo tufala igat 2(two) Pikinni. Tufala pikinni ia igat Tousongi mo James Aromalo. James Aromalo hemi papa blong Donald J. Aromalo we hemi applicant long case ia.

Motu Kot harem se (2^nd) sekon dota blong Jif Mansakau, we hemi Mima imaretem wan man nem blong hem Kalosike Taripoamata we hemi jif blong Siviri mo tufala (Mina mo Taripoamata) ikat wan pikinini gel nomo we nem blong hem hemi Rosbel mo hemi Maretem John Kaltapau mo tufala ibonem Sandy John we hemi respondent long case ia. Hemi testify to se Philip Masesong hemi blong Nguna be hemi maretem Silai mo liv long Moso kasem taem hemi ted mo oli berem hem long Moso. Hemi testify tu se Jif Mansakau hemi blong Sunai Village, long Moso.

Kros Examination.

Kot ifinemaot se Donald James Aromalo hemi reluctant blong answerem ol kwestin we oli askem hem long kros examination especially about family tree blong hem mo extended family mo hemi givim risen blong hem se bambai oli tokabout dispute blong graon yet so hemi no save revealim everi histri. Long kros examination, kot iharem se Tourisu hemi blong Epega long Siwo mo Malala blong hem hemi Malawia. Donald James hemi testify mo talem se Papa blong hem ino save kasem ordainesen blong hemi kam Mansakau from tumas politik from title ia Mansakau. Hemi talem se hemi no save papa blong Tourisu be mama blong hem hemi Turibet. Hemi talem se farea blong Mansakau hemi Maltaki, mo hemi stap konfirmem nomo bakeken se hemi sure mo konfiden se Silai hemi stret blad laen blong jif Mansakau.

Donald James hemi talem se ibin gat sam jifs blong Moso oli mekem wan letter iko long direkta blong rural lands mo talem aot se ikat wan man we istilim signature blong Jif Mansakau we hemi James Aromalo, mo paramoun jif blong Moso.

WITNESS NO.2.

Namba 2 witness blong Donald James hemi James Aromalo we hemi papa blong Donald James Aromalo. Hemi testify insapot long statemen blong Donald James. Hemi talem se hemi bon long namba 7^thAugust, 1932. Kot iharem long wan re-examination se dispute ia irise ap bitwin tufala pati ia samtaem long 2003 nomo be bifo tufala ibin stap gud nomo olsem family. Kot iharem tu se olfala James Aromalo ineva harem Sandy John italem long hem se Mama blong hem Silai ino pikinini blong Mansakau be hemi pikinini blong Kaltabang blong Siwo.

Witness No.3.

Namba tri witness blong Donald James hemi jif Kalkaua Lauman mo hemi stap mentainem sapot blong hem long statement blong Donald James mo hemi bilif se folem kastom blong Efate, Donald James nomo ikat raet long Title ia Mansakau mo hemi gat raet blong Passem long who eva hemi wantem.

Long kros examination, witness hemi no save whu isalem Tourisu long Mansakau. Hemi stap talem se Tourisu hemi blong Epega. Hemi stap talem se Silai mo Mima tufala tugeta istret bladlaen blong Jif Mansaku. Hemi talem se tugeta ia Silai mo Mima tufala imaret aot long boundary blong Jif Mansakau. Silai hemi maretem Philip Masesong blong Nguna mo Mima hemi maretem Taripoamata blong Ravenga. Long wan re-examination, kot iharem se dispute ia irise ap bitwin tufala pati ia nomo long 2000.

Witness No. 4.

Namba fo (4) witness blong Donald James Aromalo hemi Kalmatak James Aromalo we hemi brata blong Donald James Aromalo. Hemi stap konfirmem sapot blong hem long statemen blong Donald James Aromalo.

Long Kros examination hemi se ol histri ia hemi lanem long papa blong hem, James Aromalo. Hemi se Jif Mansakau hemi talem long Philip Masesong mo Philip Masesong italem long James Aromalo.

Witness No. 5.

Jif Kolaumara hemi las witness blong Donald James Aromalo mo hemi Paramaon Jif blong Sama Velej. Hemi stap konfirm sapot blong hem long ol statmen blong Donald James. Hemi se hemi save histri ia tru long mama blong hem, mo talem se olgeta ibin liv long Moso from se Jif Mansakau hemi bin sendem ol polis blong hem wan taem mo oli tekem olgeta aot long Sama mo kam liv long Moso. Hemi konfirmem bakeken long se Silai mo Mima tugeta ibladlaen blong Jif Mansakau.

Kes blong Sandy John.

Sandy John hemi klemem hem wan Jif Mansakau afta long wan Odensen we hemi kasem long Namba 10 January, 2005.

Long statement blong hem (Sandy John), hemi statem histri blong hem long wan man we nem blong hem hemi Tom Tavakalo. Hemi se Tom Tavakalo hemi maretem Turibet mo tufala ibin stap liv long Taslapa, narasaet Moso aelan long big Sea.

Tom Tavakalo mo Turibet tufala ikat (2) gel nomo mo nem blong tufala gel ia hemi Leiset mo Tourisu. Olgeta oli liv tugeta koko Turibet hemi ded mo Tom Tavakalo imuv aot long Taslapa mo karem tufala gel blong tufala iko long Siwo. Long Siwo, Tom Tavakalo hemi go stap wetem Leisong Prisong we hem (Leisong Prisong) hemi agri blong lukaot tufala gel blong Tom Tavakalo mo Turibet.

Sandy John italem se Tourisu hemi gru big wan mo hemi gat bel long wan Man Siwo we nem blong hem hemi Kaltabang.

Long taem ia, Jif blong Sunai, Jif Mansakau ikam long Siwo mo askem Tourisu long Papa blong hem mo step mama blong hem Leisong Prisong blong hemi save karem hem(Tourisu) ikam olsem woman blong hem. Toktok we step mama blong hem italem long Jif Mansakau hemi se hemi fraet because Tourisu ikat bel finis. Be Jif Mansakau italem se iolraet nomo siposi itekem Tourisu bambai hem (Jif Mansakau) isave lukaotem pikinini ia taem we bambai ibon.

Alraet nao, Tom Tavakalo mo Laesong Prisong iletem gel blong tufala Tourisu iko wetem Jif Mansakau.

Taem we Jif Mansakau mo Tourisu istap long Sunai, Tourisu ibonem wan gel mo nem blong hem hemi Silai. Oli stap lelebet more nao Tourisu hemi gat bel bakaken mo hemi bonem wan narafala gel bakaken we nem blong hem hemi Mima we hemi stret pikinini blong Jif Mansakau.

Sandy John igo hed blong talem se fes bon blong Tourisu we hemi Silai, papa blong hem hemi Kaltabang blong Siwo.

Silai ikam bigwan mo imaretem wan man nem blong hem hemi Philip Masesongi blong Farealapa long Nguna Island.

Philip Masesongi mo Silai tufala igat two (2) pikinini, igat wan gel we nem blong hem hemi Tousong mo narawan hemi wan boy we nem blong hem hemi James Aromalo we hemi papa blong applicant long case ia.

Long statement blong Sandy John, hemi talem se Tourisu hemi gat bel finish long Kaltabang blong Siwo mo hemi go stap wetem Jif Mansakau.

Sandy John itekem oath blong hem mo hemi testify hem wan in sapot long statement blong hem mo talem se mama blong hem Rosbel nao irevealim ol storian ia long hem.

Kros Examination.

Long kros examination, Sandy John hemi revealim se Jif Mansakau hemi Paramaon jif blong Moso, wan erea oli kolem Namoso. Hemi talem se Farea or Nakamal blong hem oli kolem Toumonai. Hemi no save Toumonai minim wanem, mo hemi no save wanem iminim Namoso. Oli examinem Sandy John se hemi oraet siposi hemi save kasem odenisen blong hem aotsaet long nakamal blong hem, be hemi se hemi no folem kastom blong Efate be nao ia fulap Jif oli kasem odenesen blong olgeta aotsaet long nakamal or farea blong olgeta. Hemi se hem ino save se who nao hemi assistant Jif blong Jif Mansakau. Hemi stap talem bakeken se Tom Tavakalo hemi blong Taslapa velej long erea blong Taslapa or big sea. Mo tu hemi se Turibet hemi blong Taslapa mo farea or Nakamal blong hem hemi Taslapa. Hemi se Taslapa hemi minim big sea, mo Taseriki iminim small sea. Afta hemi se Taslapa mo Taseriki hemi nem blong ol velej. Hemi se oli neva bin talem long hem se Kaltabang hemi blong wea mo long wanem velej. Long kros examination hemi se Silai hemi save karem raet blong Jif Mansakau siposi Jif Mansakau ino mo kat pikinini. Hemi testify mo talem se Silai imaret mo liv wetem Jif Mansakau mo hemi ted long Moso. Hemi se mama blong hem Rosbel hemi 5 days old nomo taem mama blong hem Mima ited. Hemi se even siposi Silai ino maret iko long Nguna, bambai hemi never kat raet long Title ia Mansakau. Hemi refer long letter we ol Jifs blong Moso oli raetem se hemi no blong informem ol pipol Se James Aromalo hemi Jif Mansakau be hemi folem nomo heding blong letter mo nature blong hem. Long wan kros examination, kot iharem se dispute ia ikirap nomo long 2003 be bifo olgeta, tugeta pati ibin stap olsem wan famli nomo. Sandy John italem se long 1999 hemi bin talem long James Aromalo se mama blong hem Silai hemi no pikinini blong Jif Mansakau.

Witness no 2.

Rosbel we hemi mama blong Sandy John hemi main witness blong hem, hemi konfirmem statement blong hem in sapot long statement blong Sandy John. Kot ibin askem wan kwestin long Rosbel we italem; quote;

Q-"how yu save pruvum long Kot ia se Silai hemi no stret pikinini blong Jif Mansakau?"
A-"Apu woman ibin talem from abu woman nao ilukaot Tourisu ".

Rosbel hemi kontinue blong talem se hem nao ilukaot Leisong Prisong kasem taem hemi ded mo iberem hem. Mo tu hemi addem long statmen blong hem se James Aromalo hemi ron we wetem woman blong hem blong Tanoliu mo nao ia tufala istap liv long Tanoliu Village. Hemi stap talem se nao ia from we hem iron we hem (James Aromalo) ino save histri ia we Tourisu papa blong hem hemi Kaltabang. Hemi talem se that's why hemi save everi samting we apu blong hem italem long hem.

Witness No. 3

Happy Morten hemi next witness blong Sandy John mo hem istap Konfirmem nomo statement blong hem. Long evidence blong hem, Silai hemi no stret pikinini blong Jif Mansakau. Long cross examintion, hemi bin revealim se Papa blong Mama blong hem or Papa blong Tousong we hemi Philip Masesong nao italem long hem. Kot iharem tu long witness se mama blong Happy Morten we hemi Tousong hemi stret sister blong James Aromalo. Papa blong tufala hemi Philip Masesong blong Farealapa mo mama blong tufala hemi Silai. Long kros examination, kot iharem se Happy Morten hemi testify againsem Donald James we olgeta istap long sem generation mo oli kamaot andanit long wan amprella nomo, and hemia hemi from se apu blong hem Philip Masesong hemi no bin talem aot storian ia long hem.

Witness Namba 4

Jif Manaruru Kalorisu hemi narafala witness blong responden Sandy John. Hemi stap talem nomo bakaken se hem hemi wan Jif blong mein lan blong Efate (meten/maritau). Hemi se papa blong hem hemi Kalorisu Tony and mama blong hem hemi Elen Kalorisu. Hem se papa blong hem, Kalorisu Tony hemi bigfala brata blong Tourisu we hemi woman blong jif Manasakau. Hemi se papa blong hem italem long hem se taem tufala abu blong hem ikivim Tourisu iko long Mansakau, hemi kat bel finis. Hemi pikinini we Tourisu ikat bel long hem hemi blong Kaltabang blong Siwo. Hemi stap sapotem nomo histri blong Sandy John.

Witness Namba 5.

Las witness blong Sandy John hemi Kalowia Eddie Kalosik mo hemi se papa blong hem hemi Kalosik Taripoamata. Mama blong hem hemi Esobel Taripoamata we hemi 3^rd waef blong Jif Taripoamata Kalosike, Paramoun jif blong Siviri velej, long Efate. Kasen Sista blong hem hemi Rosebel, mama blong Sandy John. Hemi stap sapotem statmen blong Sista blong hem Rosbel mo Sandy John.

Sabmisin.

Sabmisen blong Sandy John.

Long Efate, yumi mas folem bladline blong karem jifly title, makem nao long histri blong mi we istat long Tourisu, hemi;

- Tourisu hemi kat bel finis long Kaltabang bifo iko stap wetem Mansakau long Sunai mo bonem fes gel blong hem Silai.

- Ol papa mo aunties blong olgeta oli talem histri ia from Tourisu hemi bigfala sista blong olgeta folem tufala wife blong Tom Tavakalo.

- James Aromalo hemi no save kasem odenesen blong Kam Mansakau from ol olfala mo of Jif oli save gud se hemi no gat raet.

- James Aromalo mo families blong hem oli bin stap liv long Sunai, afta oli muv mo go liv small taem long Meten mo kam bak long Sunai. Ino long taem oli muv iko long Tanoliu folem wish blong woman blong hem.

- Folem ol movmen blong hem, hemi no save spendem taem wetem papa blong hem Philip Masesongi blong lanem histri. Hemi no liv wetem ol brata mo sista blong Tourisu blong oli talem aot histri long hem.

- Hemi no bin stap taem papa blong hem ikivim las toktok blong hem long sista blong hem Tousong Morten bifo hemi ded.

- Donald hemi no save talem nem blong papa blong Tourisu or hemi se hemi no save.

- Donald mo witness blo hem Kalmatak we semtaem brata blong hem tufala igivim tu different nem long Nakamal or farea blong hem. Donald italem Maltaktak mo Kalmatak italem Telekapu.

Hemia nao hemi en blong sabmisen blong Sandy John.

Sabmisen blong Donald James.

Long sabmisen blong Donald James Aromalo, hemi tenderem trifala sketch map we isoem generations blong Jif Mansakau mo John Sandy se hemi no stret folem histri blong hem. Hemi stap talem se hem (Donald James) mo Sandy John tugeta istap long sem generation nomo. Hemi kohed blong talem olsem ia;

- Sandy John mo ol witnis blong hem oli decenden blong Tom Tavakalo mo Leisong Prisong.

- Sandy John oli no save pruvum long kot ia se ikat sam narafala family blong Kaltabang, nem blong velej blong hem, mo iminim se Kaltabang ineva exist.

- Donald James istap talem se Tom Tavakalo ineva maretem Turibet, mo Tourisu hemi no pikinini blong Tom Tavakalo. Hem, Donald hemi se hemi bin luk everi ten pikinini blong Tom Tavakalo mo tufala witnis blong Sandy John, Manaruru Kalorisu mo Morris Matongolulu ibin talem se papa blong tufala ibigfala brata blong Tourisu be hemi se ino tru.

- Folem kastom blong Efate hemi no possibol blong John we hemi namba 2 generation blong Tom Tavakalo mo Laesong Prisong hemi maretem Rosbel we hemi namba 4 generation blong Turibet from se hemi gran daughter blong hem.

- Jif Jack Kalsav Mansakau hemi stret papa blong Silai mo Mima from ino kat pruv se Kaltabang hemi bin exist or wan relatif blong hem ilaef yet tedi.

- Risen why Silai mo Philip Maessong ino save muv iko long Nguna from se Silai hemi fes bon daughter blong Jif Mansakau blong wan pikinini blong hem ikam jif bakeken.

- Sandy John hemi no save Assistant Jif Mansakau mo hemi no save ples we nakamal blong hem istap long hem.

- Namoso hemi no nem blong wan velej, be hemi nem blong passage bitwin Moso mo Efate.

- Sandy John hemi no save pruvum long kot ia date we Jif Mansakau hemi ded. Jif Mansakau hemi ted long 3 Oktoba, 1930.

- Sandy John hemi sud kasem odenesen blong Mansakau long Nakamal or farea blong hem.

- James Aromalo hemi gat 73 years mo Donald James 37 years be tufala ites harem long kot ia se abu blong olgeta hemi Kaltabang, wan man Siwo. Ikat sam olfala tu olsem Laesong Prisong, Elder Ati, Manlae, Philip Masesong, oli never talem long James Aromalo mama blong olgeta hemi pikinini blong Kaltabang.

- Jif Taripoamata we hemi maretem Mima, hemi blong Ravenga, we hemi outside long boundary blong Mansakau.

- Talsapa hemi no wan nem blong Nakamal or Village, be hemi strong sea.

- Velej blong Mansakau hemi Telkap long Moso mo nakamal blong hem hemi Malalatak be hemi no Taumunai from hemi no stret wetem Kastom blong Efate. Long Efate nem blong nakamal imas stat wetem Mala or Malala.

- Witnis Jif Manaruru Kaloris mo Jif Matongolulu Moris ino stret blong tufala ikam bigfala brata blong Tourisu we Tom Tavakalo mo Laesong Prisong ibonem from se tufala ibon aot long Sekon waef blong Tom Tavakalo.

- Folem toktok blong Sandy John mo tufala Jif ia se papa blong olgeta oli sem generation wetem Tourisu hemi no tru from se hao nao papa blong Sandy John hemi stap long Generation No 2 be Sandy John hemi stap long Generation namba 5 wetem Donald James.

Findings blong Kot.

Dispute we istap bifo long kot ia hemi who nao long tufala disputing pati igat raet long Jifly Title ia "Mansakau".

Kot ifinem se ikat dispute tu long tufala gel is Silai we hemi mama blong James Aromalo we ibonem Donald James (applican long kes ia) mo Mima we hemi Mama blong Rosbel we ibonem Sandy John (responden long case ia). Wanem we iklia long ol evidence bifo long kot ia hemi tufala tugeta pati ia iklem folem matrilineal or laen blong woman.

Hemia hemi samfala samting we tufala parties iagri long hem;

- generations blong Mima hemi kam daon kasem Sandy John.

- generations blong Silai hemi kam daon kasem Donald James

- Silai mo Mima tufala igat wan mama nomo we hemi Tourisu

- Mima mo Silai tufala idirectly connected long Jif Mansaku we tufala pati imentionem.

-Tugeta pati iagri se Turibet hemi mama blong Tourisu.

Tufala parti tugeta ifail blong talem aot long Kot ia nem blong Papa mo mama blong Mansakau we oli klem se ibonem Silai mo Mima.

Sandy John ifail blong givim nem, blong las Jif Mansakau bifo long hem.

Donald James Aromalo hemi no jalensem nating ol evidens or statmen blong Witness No. 2 we hemi Rosbel John mo Happy Morten. Donald James ino save pruvum long kot ia se hemi bin stap taem papa blong James Aromalo ibin givim las toktok blong hem long Tousong, sista blong hem mo hemi mama blong witnis No. 3 we hemi Happy Morten. Long sabmisen blong hem, Donald James hemi admitim se Sandy John mo ol witnis blong hemi oli ol decenden blong Tom Tavakalo mo Laesong Prisong.

Donald mo ol witnis blong hem oli no halvem kot ia blong istap long wan gudfala position blong determinem wheta or not woman ia Silai hemi stret pikinini blong Mansakau.

Plaintiff hemi no satisfem kot ia se tufala ineva harem ol histri we Defendant Sandy John italem abaot Silai we papa blong hem hemi Kaltabang blong Siwo. Long evidence, tufala ineva harem mo tufala ites harem toktok ia.

Plaintiff hemi even no save pruvum long kot ia wan statmen we hemi stap traem blong disputum family tree blong Sandy John. Hemi talem se witnis No.3 we hemi Manaruru Kalorisu mo witnis No. 5 Morris Matongolulu italem se papa blong tufala bigfala brata blong Tourisu. Long sabmisen Plaintiff or applicant ino save pruvum statmen ia, hemi general tumas. Ol witnis blong hem oli no sapotem statmen ia nating long ol testimony blong olgeta.

Defendant or respondent hemi stap talem lo toktok blong hem se Tom Tavakalo nao imaretem Turibet mo gel blong tufala hemi Tourisu and Tourisu hemi bin gat bel bifo hemi go stap liv wetem Jif Mansakau. Pikinini we hemi bonem hemi Silai mo Papa blong Silai hemi Kaltabang. Olgeta toktok blong Sandy John ikat bigfala weight we olgeta witnis blong hem oli sapotem. Witnis No 2 we hemi Rosbel John mo hemi mama blong Responden long kes ia hemi konfirmem long ol evidens blong hem se Tourisu hemi bin kat bel finis bifo hemi go stap wetem Mansakau. Witnis No.3 hemi konfirmem tu long kot ia. Witnis ia itelam se mama blong hem Tousong nao italem taem we papa blong hem mo James Aromalo italem long hem (Tousong) bifo hem (Philip Masesongi) ited.

Defendant hemi putum more weight long kes blong hem taem italem long sabmisen blong hem mo sapotem statmen blong witnis Namba 3 se James Aromalo ino stap taem papa blong hem Philip Masesongi igivim las toktok blong hem long gel blong hem Tousong bifo ided, minim se James Aromalo ino stap taem papa blong hem ited.

Therefore Kot isatisfy mo stap long wan better position blong determinem weta or not Odenesen blong Sandy John long Jifly title ia Mansakau hemi folem kastom mo iraetful.

Bifo kot imekem wan decisen kot itekem into consideration length blong taem we dispute ia istat mo ol consequences blong dispute ia. Igat ol pipol mo famili we oli safa long ol consequences long dispute ia directly or indirectly. Further more kot ia ibilif se ol risponsipol lidas mo ol jifs blong yumi oli sud tekem more consideration mo appliem extra responsibility blong olgeta long case ia mo settlem long level blong olgeta. Direk risal blong hem ibringim seperation long ol family, village, mo community mekem se inokat koperation. Kot ia iwantem emphasizem strong se imas kat pis mo hamony istap insaet long velej, church, community mo ol narafala grups we oli exist insaet long aelan ia Moso.

Kot ia imas mekem wan decisen long matter ia, and after long ol klos consideration long ol evidens mo toktok blong tufala patis, kot ia iharem se ikat more sapoting toktok long kes blong Defendant or Responden we hemi Sandy John wetem ol witnis blong hem. Olgeta oli providem wan histri mo family tree wetem ol toktok we ireleven mo mekem wan whole storian, mekem Kot ia istap rul long favor blong hem Sandy John we hemi responden or plaintiff long kes ia.

Therefore kot imekem ol Odas ia;

Kot Odas.

1. Odenesen we olgeta jifs blong Taseriki Village long Moso aelan oli bin mekem long Namba 10 January, 2005 hemi stret mo folem Kastom.

2. Stat tedi, Jifly Title is "Mansakau" istap long possession blong Defendant or Responden Sandy John.

3. Donald James Aromalo mo Sandy John tufala istret decenden blong Tom Tavakalo mo Leisong Prisong.

4. Tufala pati wetem ol famili mo ol relatif imas mekem wan reconciliation kastom ceremony blong reunite mo restorem bak pis mo hamony bitwin ol families insaet long komunities.

5. Shering blong ol properties blong Jif Mansakau imas be equal long favor blong applicant or Plaintiff long sekondari basis.

6. Ino kat oda long kosts.

7. Tufala pati ikat 30 deis blong apil iko long Senior Magistrate Kot.

Dated long Port Vila long Namba 25^th Day blong April, 2005.

Jastis Erick Mesao
Jastis Malak Kalsong
Jastis Ann Kalo