Family Amos v Family Amos [2004] VUICB 5; Land Case 01 of 1987 (3 September 2004)

AMBRYM ISLAND COURT OF
THE REPUBLIC OF VANUATU
HELD AT CRAIGOVE WEST AMBRYM
(LAND JURISDICTION)

LAND CASE NO 01/1987

BETWEEN

FAMILY TANTAN AMOS
(ORIGINAL CLAIMANT)

AND

FAMILY MAILY AMOS
(COUNTER CLAIMANT)

CORAM: MAGISTRATE JERRY BOE
JUSTICE LUKE JOHNNY
JUSTICE ABEL BONG
JUSTICE REUBEN PETER

CLERK: SHEMI JOEL

Ambrym Island Kot ibin staon long Craig Cove long namba 18 August, 2004 ko kasem 20 August, 2004. Hemia blong harem wan dispuit long graon we oli stap kolem 'SULOL' lan. Dispiut ia istap bitwin Famili Tantan Amos mo famili Maily Worwor.

BAONDARI BLONG GRAON WE ISTAP LONG DISPUT

Bifor Kot istaon blong harem, dispuit ia Kot ibin lukluk gut long ol baondari we tufala patis ibin mekem. Kot ifaenem aot se baondari we famili Tantan Amos imekem hemia nao Kot ibin advataesem be ino hemia we famili Worwor imekem. Kot iakseptem nomo baondari we ibin advataesem. Long saet blong Worwor olgeta ibin mekem baondari blong whol eria blong Sulol. Afta we Kot ibin kliarem wetem olgeta, olgeta ibin akri se bae Kot idil nomo wetem eria ia we Kot ibin advataesem. Long lukluk blong Kot eria we istap long dispiut hemi wan smol eria nomo we istap insaet long bigfala baondari blong Sulol. Eria ia istat long wan ples klosap long Solwora we oli stap kolem Lonsesa mo ifolem wan drae krek iko smol nomo antap. Afta iko klaem antap long wan vilij we oli stap kolem Vante mo pas klosap long wan olfala vilij blong bifor mo sam olfala krev blong vilij ia mo kam taon klosap haos blong wan Agricultural Extension Officer. Afta long hemia baondari ipass bakeken folem wan smol krik nomo iko kasem stamba blong hill. Long ples ia graon ifolem stamba blong hill long ples ia we oli stap kolem "Rantanbon". Afta long hemia baondari iklaem iko antap long wan hill mo kam taon narasaet long hill kasem wan krik we ikam taon kasem ples we wan ston we igat hol istap long hem. Afta long hemia graon ia ifolem mo ikam taon kasem ples we "MV Saraika" itraon long hem. Long ples ia, baondari ifolem solwara bakeken ko bitim ples we komesel senta istap long hem mo ko kasem Lonsesa bakeken.

OLGETA WE OLI HAREM LAN KES IA

Olgeta we oli harem lan kes ia igat trifala Island Kot Jastises mo wan Magistret. Olgeta ia igat Jastis Abel, Jastis Luke mo Jastis Ruben mo long saet blong Majistret igat Jerry Boe. Long saet blong loa blong harem dispiut blong graon loa italem se oltaem imas kat 3 Island Kot Jastises wetem wan Magistret nao oli mas staon blong harem dispiut ia. Desisen we ikam aot hemia hemi desisen we olgeta everiwan nao oli mekem mo agri long hem.

OL SAMTING WE KOT IWANDEM LUKLUK MO HAREM

Fas samting we Kot iwandem talem nao se Kot ino save usum loa blong ol waetman blong jajem kes ia. Kot istap lukluk nomo long ol kastom. stori we ikam aot long tufala patis. Hemia iminim nomo se Kot iwandem harem nomo ol kastom storian we ikamaot long tufala patis. Ol kastom stori ia bae talem aot hao nao wan pati istap klemem graon ia. Kot iwandem harem mo luk tu ol famili tri blong tufala patis ia mo faenem aot hao nao raet blong ol patis ia istap. Hemia ol blat laen, ol papa, ol muvment long olfala, ol nasara, ol olfala vilijes, krev yart, ol worwor mo ol meleun, mo ol narafala samting bakeken we tufala patis iwandem soem. Sapos wan pati inogat ol samting ia bae kot inosave tekem olsem se olgeta ilusum kes.

OL EVITENCE WE KOT IHAREM

HISTRI BLONG FAMILI TAMTAM AMOS

Spokesman blong famili Tantan Amos we hemi, Toto Tantan, hemi stret pikinini blong Tantan Amos. Long saet blong histri blong hem hemi talem se papa blong papa blong hem hemi Balkon mo hem ibin stap liv befor long vilij blong Vante. Taem we Balkon istap long Vante, Volkeno ibin ronem olgeta mo Balkon ibin muv aot mo ko stap long Vila. Taem we hemi stap long Vila, spokesman italem se pupu blong hem ia ibin mitim wan man Not Ambrem we nem blong hem hemi Willie Masusu. Tufala ia, spokesman italem se tufala ikam gat frien mo Willie Masusu italem long Balkon se tufala imas ko bak long Ambrem. Taem tufala ikam bak, spokesman, italem se Willie Masusu italem long Balkon blong tufala iko stap tugeta long Ranon, hemia long Not Ambrem. Spokesman italem se taem we tufala istap long Not Ambrem, Willie Masusu ikivim wan woman long hem mo Balkon imaretem woman ia. Balkon ikirap ibonem Tantan Amos, we hemi papa blong spokesman. Spokesman ikontiniu blong talem se taem we Balkon mo Willie tufala istap long Ranon, Willie, ikirap isutum tet Balkon forom sam fasin we Balkon istap mekem wetem woman blong hem. Spokesman ikontiniu blong talem se taem we olfala Worwor wetem woman blong hem Malipu tufala iharem se Balkon itet tufala ipul long wan kenu mo ko kasem Not Ambrem hemia long Ranon. Spokesman italem se taem we tufala ikasem Ranon, tufala ikarem Tantan Amos, we hemi pikinini blong Balkon mo kam bak long Wes Ambrem, hemia long vilij blong Vante. Taem tufala ikarem hem ikam bak, spokesman, italem se tufala iko soem aot graon ia Vante long hem. Spokesman italem se taem we olgeta ibin stap wokbaot long graon ia we hemi Vante, Tantan Amos ibin stap nilim ol 6 inches nil long ol wut olsem ol mak long graon ia.

Spokesman ikontiniu blong talem se stat long 1970 - ikam kasem 1986 ino bin gat eni dispiut. Spokesman italem tu se dispiut ia ites stat nomo long 1986, taem we olgeta ibin stap toktok blong bildim Komesel senta. Long taem ia spokesman, istap talem se olgeta ibin sendem wan letter iko long olgeta long Ranon, Not Ambrym blong kam saenem wan akrimen blong bildim komesel senta ia. Spokesman italem se Raphael Worwor nao ibin statem dispiut ia mo hem ibin kolem 3 vilij kot blong harem dispiut ia. Fasfala vilij kot, we ibin staon hemia anda long jeamansip blong Sanel Mermer. Long taem ia Tantan ibin talem aot storian ia se olfala Worwor nao ibin ko karem bak hem ikam long graon ia Vante. Spokesman italem se vilij kot ibin harem se olfala Worwor mo olfala woman blong hem Malipu, tufala nao ibin pul long kenu mo ko long Ranon mo karem bak Tartan blong kam bak long graon blong papa blong hem long Vante. Long taem ia tu, spokesman italem se vilij kot ibin harem se Tartan ibin stap putum 6 insis nil long ol wut blong makem baondari blong eria blong Vante. Vilij Kot ibin harem tu se olgeta olfala ia oli bin stap wokbaot wetem taem Tantan ibin stap putum ol 6 insis nil. Olgeta ia igat Worwor mo woman blong hem, Malipu, Meleun, Jif Welan mo Jif Willie. Spokesman italem tu se vilij kot ibin faenem aot tu se Tantan isingaot ankel long Worwor mo Malipu, we hemi woman blong Worwor, isingaot papa long Tantan. Spokesman italem aot tu se forom resen ia kot ifaenem aot se long kaston blong Ambrem, Worwor hemi tabu long Tantan. Vilij Kot ifaenem aot tu se Raphael Worwor tu hemi tapu long Tantan. From reson ia nao, spokesman italem se vilij kot ibin deklerem se Tantan nao hemi lan ona. Spokesman italem se taem we vilij kot ibin mekem dekleresen Raphael Worwor ino hapi mo singaot namba 2 vilij kot mo Bally nao hemi Jeaman blong Kot ia. Spokesman italem se olgeta we oli staon long vilij kot ia igat 15 Chiefs everiwan. Olgeta ia, igat Jiff Willie Worwor, Jif Savie, Jif Leol, Jif Tanmelip, Jif Abel, Jif Malsop, Jif Tasso, Jif Sanel, Jif Sawwan, Jif Sael, Jif Bilibong, Jif Lengkon mo Jif Emile.

Spokesman italem se long taem ia Tantan italem sem stori we hem ibin talem long fes vilij kot. Spokesman italem tu se long taem ia vilij kot ibin faenem aot se Worwor itapu long Tantan. Forom resen ia, spokesman italem se ol jifs oli tekem desisen se Raphael Worwor imas pem VT10,000 mo kivim wan pig iko long Tantan forom hemi stap long nasara blong Tantan. Spokesman italem se Raphael ino hapi long desisen ia mo hemi kolem namba 3 Kot we oli kolem distrik Kot. Jeaman blong distrik kot ia hemi Jonathan. Long taem blong kot, spokesman, italem se Tantan ibin talem sem stori we hem ibin talem long tufala vilij kot.

Long taem ia spokesman italem se miting hem ibin strong tumas mekem se olgeta ibin fraet. Long end blong miting spokesman hemi talem se jeaman Jonathan ibin deklerem se graon ia hemi blong Raphael Worwor. Spokesman italem long kot se hem ino save forom wanem nao bae Jonathan imekem decisen olsem. Spokesman italem se forom resen ia nao, famili Tantan Amos hemi apil ikam long Island Kot.

Famili tri blong family Tantan Amos

Long saet blong famili tri blong famili Tantan Amos, kot ia ifaenem aot se Tantan Amos papa blong hem hemi Balkon. Hemia hemi semfala Balkon we spokesman italem se hem ibin aot long Vante mo ko stap long Vila afta volkeno ironem ol man. Balkon papa blong hem hemi Ululfan Kumo mo Ululfan Kumo papa blong hem hemi Meleun Emae. Pikinini blong Balkon hemi Tantan Amos mo hemia hemi sem Tantan Amos we olfala Worwor mo olfala woman blong hem Malipu oli bin pul long kenu mo ko karem hem long Ranon, Not Ambrym. Tantan Amos ibonem Toto Tantan we hemi spokesman blong family Tantan mo sem taem hem istap devendem raet blong famili Tantan long dispiut ia.

No. 1 WITNESS BLONG FAMILI TANTAN AMOS -JIF SANEL MERMER

Afta we Jif Sanel Mermer hemi promes long Baebol hemi kivim evitence blong hem mo talem se hem hemi bin stap long wan vilij kot we ibin staon long 1986. Jif Sanel italem se long taem ia hem ibin harem Raphael Worwor italem se Minister Donald Kalpokas, we hemi Minista blong Lan long taem ia ibin saenem wan pepa blong talem se Vante we istap long eria blong Sulol hemi blong famili Marcel blong Lolirumo. Witnis italem se taem we ol jifs iharem toktok ia oli fraet mo jeaman Jonathan nao imekem se olgeta ikivim bak lan ia iko look long famili Marcel. Witnis italem tu se papa blong hem we hemi Cybrian Mermer hem ibin tokbaot graon ia fulap taem long ol man mo tu long ol pikinini blong hem se graon ia Vante iblong Tantan Amos mo ol pikinini blong hem.

Long saet blong kros-examinesem spokesman blong famili Mermer we hemi Taliban iaskem witnis se sapos hem isave kliarem wan pis lan ia we oli stap kolem Rantanbon. Long saet ia witnis ise hemi ikam nomo blong witnis wanem we ibin kam aot long wan distrik kot long 1986. Taem we spokesman blong famili Worwor we hemi Taliban iharem wanem we witnis italem, hemi mekem klarifikesen se Rantanbon hemi stap insaet long baondari blong Vante. Bakeken spokesman blong famili Worwor we hemi Taliban iaskem narafala kros-examinesem kwesten se whu nao papa blong Ululvan Kumo. Long saet ia witnis ise hem ino save. Long narafala kros-examinesem kwestem bakeken se sapos Rantanbon igat nasara, witnis ise "yes" mo talem se nasara ia istap long Vante. Bakeken spokesman blong famili Worwor iaskem witnis weta Balkon igat Meleun. Long kwesten ia witnis ise hem ino save ansa mo talem se by spokesman blong famili Tantan we hemi Toto Amos nao isave ansa long saet ia. Long ansa blong hem Spokesman iansa se "yes" hem igat meleun mo bae oli soem long kot taem we bae oli ko blong exploresen.

Taem we spokesman blong famili Worwor ikros-examinem witnis finis, spokesman blong famili Tantan ire-examinem witnis mo askem hem se sapos hem ibin luk pepa blong lis taetol blong komesel senta. Long kwesten ia witnis ise hem ino bin luk pepa ia be hemi iharem nomo. Hem italem tu se long tingting blong hem ating famili Worwor istap mekem toktok ia nomo blong fraetenem ol famili blong Tantan.

No. 2 WITNIS BLONG FAMILI TANTAN AMOS -MANSAK

Long saet blong No. 2 witnis blong famili Tantan Amos we hemi Mansak. Hemi istap witnis se hemi man blong Sulol mo papa mo mama blong hem tufala istret man blong Sulol. Witnis istap talem se papa mo mama blong hem taem we tufala ilaef tufala ibin stap talem se graon ia Vante iblong famili Tantan.

Long saet blong kros-eaminesen kwesten we spokesman blong famili Worwor iaskem witnis se sapos papa mo mama blong hem iblong Sulol. Long kwesten witnis iansa se "yes" papa mo mama blong hem iblong Sulol. Mo tu long wan kros-examinesem kwesten se whea nao nasara blong Rantanbon witnis ise nasara ia istap long Vante. Long narafala kros-examinesem kwestem se whu ia nao hemi papa, sister or brata blong Ululfan Kumo witnis ise hem ino save. Long narafala kros-examinesem kwesten bakeken se forom wanem nao bae witnis isingaot famili nomo long famili Tantan be ino long famili blong Worwor. Long saet blong kwesten ia witnis iansa se igat wan brata wetem wan sista we oli bin makem sex tugeta mekem se ol famili ia oli separet.

Afta long kros-examinesem kwestem blong spokesman blong famili Worwor, spokesman blong famili Tantan Amos ibin re-examinem witnis blong hem bakeken. Fas kwesten hemi askem long witnis nao se sapos witnis istap singaot papa long Raphael Worwor. Long kwesten ia witnis ise "yes". Samtaem tu spokesman ibin askem witnis tu weta hem ibin luk olfala Worwor mo taem we olgeta ibin stap wokbaot mo putum ol 6 inches nil long wut. Long saet blong kwestem ia, witnis iansa se "yes".

No. 3 WITNIS BLONG FAMILI TAMTAM CHIEF BONG RANLIE

Long saet blong witnis ia hem istap talem se taem we olfala blong Tantan Amos we hemi Balken ibin tet long Ranon stret pupu blong hem nao ibin karem aot Tantan Amos mo ko stap long wan ples blong olgeta we oli kolem Hawor. Witnis istap talem se forom resen ia nao olgeta isave gut se Tantan Amos hemi stret man Vante.

Long saet blong kros-examinesen kwesten we spokesman blong famili Worwor we hemi Taliban iaskem fas kwesten nao se forom wanem resen nao bae Tantan Amos ikam stap long vilij ia Hawor. Long kwesten ia witnis iansa se forom Willie Masusu ibin sutum tet papa blong hem we hemi Balkon. Bakeken spokesman blong famili Worwor iaskem kros-examinesen kwestem se whu nao itekem Balkon iko long Not Ambrym. Long saet ia witnis iansa se Willie Masusu nao ikarem hem iko. Taem we spokesman blong famili Worwor ibin harem ansa blong witnis ia, hem iaskem wan kros-examinesen kwesten bakeken se forom wanem nao bae Willie Masusu itekem Balkon iko long Not Ambrym. Long kwesten ia witnis ise forom nomo tufala igut fren taem we oli stap long Vila. Long narafala kros-examinesem kwesten bakeken se papa blong Balkon iblong Not or blong plesia long Sulol, witnis iansa se hem iblong plesia long Sulol.

Afta long ol kros-examinesem kwesten ia, spokesman blong famili Tantan ibin re-examinesem witnis blong hem ia mo askem hem se taem we hem ibin kam taon wetem Tantan long Sulol wanem nao tufala olfala ia Welaun mo Tasso italem. Long kwesten ia witnis ise tufala olfala ia ibin talem long Tantan blong stap long Vante forom graon blong olgeta. Witnis ikonfimem tu se Balkon mo Tantan tufala tugeta itet long Ranon mo oli berem olgeta long Ranon.

No. 4 WITNIS BLONG FAMILI TANTAN AMOS - SAKAK WILLIAM

Witnis Saksak William hem ibin witnis long behaf long papa blong hem forom se hem isik mo ino save kam. Witnis istap talem long Kot se papa blong hem we hemi Danmelip mo mama blong hem iblong Sulol mo tu se papa blong hem ia ibin kruap long Sulol mo mama blong papa blong hem ibin stap talem long papa blong hem se graon ia Vante iblong famili Tamtam.

Long saet blong kros-examinesem kwestem, spokesman blong famili Worwor we hemi Taliban, hem ise hem inosave kwestenem witnis forom hem irepresentem nomo papa blong hem.
Long saet blong re-examinesem kwestem spokesman blong famili Tantan iaskem sapos witnis isave konfimem se whu nao iko karem Tantan long Ranon. Long saet ia witnis iansa se papa blong hem ibin talem long hem se olfala Worwor nao ibin ko karem bak Tantan long Ranon.

EVITENCE WE IKAM LONG WORWOR
Histri

Long saet blong histri blong famili Worwor spokesman blong olgeta we hemi Taliban hemi talem se Worwor hemi stret man Sulol mo olgeta man ia nao olgeta stap long vilij ia Vante. Spokesman Taliban italem tu se igat ol narafala man tu oli kam stap long Sulol olsem sensametansele we hemi iblong Tou wan vilij antap long bush. Spokeman italem tu se man ia sesametansele hem ibin bonem wan gel long Sulol. Long saet blong famili tri blong famili Worwor olfala Worwor hemi stret man Sulol mo hemi maretem woman ia Malipu. Papa blong olfala Worwor hemi Loc Baro Neibal Mera Antum we hemi stret man Sulol. Hem imaretem woman ia Walkan. Loc Baro Neibal papa blong hemi Bongonmal we hem tu istret man Sulol. Worwor wetem Malipu tufala ibonem Marcel and Marcel imaretem woman ia Bernandette mo bonem Raphael we istap defendem graon ia long behalf blong famili Worwor. Spokeman blong famili Tantan italem tu se famili Worwor I gat 2 nasara mo 1 Worwor mo tufala Meleum we bae oli soem long taem blong exploresen. Spokesman italem tu se bae olgeta isoem tu se olfala Worwor ibin tet long Sulol mo oli berem hem long vilij blong Vante.

Long saed blong histri blong Tantan Amos, spokesman blong famili Worwor we hemi Taliban italem se olgeta ia ol ino stret man Sulol. Spokesman italem se wanem we olgeta isave long histri blong famili Tantan Amos se olgeta ia oli flot mo kam long Ranon, long Not Ambrym. Histri blong olgeta istat taem we man ibin flot ikam long wan kenu long Not Ambrym. Man ia ibin flot mo kasem long soa long wan pasis we oli stap kolem Lonsesa. Taem we mania ifaenem sam woman we oli stap long sanbis, hemi putum hand blong hem antap mo talem wan toktok long lanwis blong Not Ambrem se nambelolvetu". Toktok ia iminim se mi mi wan pua man plis helpem mi. Spokesman italem se taem we ol woman ia oli singaot ol man blong kam luk hem mo ol man ia oli ron ikam taon long pasis we oli stap kolem Lonsesa. Olgeta man oli bin gat tingting blo kilim mo kakae hem be afta taem we oli lukim se hemi putum hand blong hem antap blong soem se hemi sarenda long olgeta olgeta inomo kilim hem. Olgeta ibin putum nem blong pasis ia we man ia ikam soa long hem se Lonsesa mo tedei olgeta istap usum nem ia yet. Spokesman italem tu se man ia we iflot ikam nem blong hem hemi Navong. Olgeta man Sulol oli tekem hem iko stap wetem olgeta olsem wan brata blong ol mo oli kivim nara nem long hem we hemi Ururlolvetu. Spokesman Taliban italem se Ululfon Kumo we famili Tantan oli stap kleiman se hemi papa blong Balkon hemia ino tru forom se Ululfan Kumo hemi man Wakon. Spokesman blong famili Worwor italem se Urelolveta nao hemi stret papa blong Balkon mo hemia se man we iflot ikam long Not Ambrem.

Spokesman ikontiniu blong talem se taem we olgeta istap long Sulol Ururlolveta ikirap imekem trabol long sista blong olgeta bakeken. Sista blong olgeta ia nem blong hem hemi Lisak. Folem trabol ia igat tufala samting ihappen. Fasfala samting nao se olgeta we Ururlolveta istap singaot olgeta se oli brata olgeta itabu or oli kam tawian long Ururlolveta. Namba 2 samting nao se olgeta famili ol ibin tekem desisen blong sendem aot Ururlolveta mo woman blong hem Lisak blong ko stap long wan pis graon we oli stap kolem "Rantanbon", minim nomo se graon ia hemi blong sex. Rantanbon hemi stil pat blong graon insaet long bigfala eria blong Sulol. Taem we Ururlolveta mo woman blong hem istap long Rantanbon tufala ites bonem Balkon. Sem Balkon ia nao ibin faenem Willie Masusu long Vila mo tufala iko stap long Ranon. Spokesman blong famili Worwor italem tu se olgeta igat samfala rekot we isoem se igat samfala olfala blong Sulol olgeta ibin salem graon long Sulol mo olgeta ia oli no famili blong Tantan. Ol olfala igat olfala Willie Uleng mo olfala blong Kaonmal. Spokesman blong famili Worwor italem tu se histri tu isoem se igat wan pis graon we istap long eria blong Sulol we Catholic Mission ibin pem mo stap holem lis taetol blong hem iet tedei. Spokesman italem se igat trifala olfala nao oli bin salem graon ia long difdifren taem. Olgeta olfala ia igat Meleum Takon, we hemi salem 25 area long 1896 mo afta wan olfala bakeken we nem blong hem Galine we ibin salem graon ia bakeken long yia 1898. Lasfala olfala we ibin salem namba tri taem hemi Mari hemia long yia 1898. Spokesman istap talem se olgeta ia oli olfala blong Sulol mo olgeta ino famili blong Tantan.

NO. 1 WITNESS BLONG FAMILI WORWOR- BERNARD WORWOR

Witness Bernard Worwor istap witnes se hem isave wan pis lan long Sulol we Catholic Mission ibin pem we nem blong hem Lonhakon. Graon ia witness istap talem se hem ino graon blong Vante. Witness italem se Pere Marcel nao ibin pem pis graon ia long trifala olfala blong Sulol. Olgeta ia igat Meleum Takon, Galing mo Mari. Witness italem tu se hem isave gut se papa blong hem Etienne Worwor nao hem ibin divilopem lan ia mo plane mol kokonas.

Long saet blong kros-examinesen kwesten we ikam long spokesman blong famili Tantan se sapos hemi save talem wea nao Vante. Long kwesten ia witness ansa se hem ino save be hem isave nomo se Vante istap insaet long bigfala eria blong Sulol. Long narafala kros-examinesem kwesten bakeken se sapos witnis isave talem whu ia nao papa blong Ululfan Kumo, witnis iansa se hem ino save. Spokesman iaskem wan kros-examinesem kwestem bakeken se forom wanem nao bae Willie Temar bae pem lan ia we oli stap kolem Lonsesa. Long saet blong kwestem ia witnis ise hem ino save. Taem we spokesman blong famili Taliban iharem witnis iasna olsem hem kivim saplamentari ansa mo talem se graon ia iblong Sulol. Long wan kros-examinesem kwestem se wea nao nasara blong man ia Galing we hem ibin salem graon iko long Catholic Mission, witnis iansa se nasara blong hem istap long Sulol.

Ino gat re-examinesem kwestem we ikam long spokesman blong famili Worwor we hemi Taliban.

No. 2 WITNIS BLONG FAMILI WORWOR – DAMIEN BALKON

Witnis antap istap talem long Kot ia se hem igat 82 yias nao. Witnis italem se hem ibin stap liv long Vante hemia long Sulol long taem finis ikam taem we hemi pikinini kasem we hem imaret long ples ia.

Witnis istap talem se Vante hemi wan vilij we hem wetem ol ankle blong hem oli bin stap liv long hem. Hem italem se hem isave gut se ol ankle blong hem nao oli bin karem bak famili blong Tantan long Rantabon ikam bak long Vante mo hemia ifolem nomo ol tribal faet we istap ikam aot bitwin ol tribes.

Long saet blong kros-examinesem kwestem we spokesman blong family Tantan iaskem se sapos hem ibin lukim Balkon. Long saet ia witnis ise no hem ino bin luk hem be hem ibin luk nomo olfala Worwor. Long narafala kros-examinesen kwesten se sapos hem isave se olfala Worwor ibin ko long Ranon mo karem bak Tantan hem italem se "yes". Hem ikonfimem tu long wan narafala kros-examinesem kwesten se "yes" Tantan ibin putum ol 6 insis nil long ol wut. Bakeken spokesman blong famili Tantan iaskem wan kros-examinesen kwesten se sapos itru se Rahael wetem pupu blong hem Worwor tufala itapu long Balkon. Long kwesten ia witnis iansa se "yes". Lasfala kros-examinesem kwesten nao se forom wanem long taem we witnis ibin luk Tantan istap putum ol nils forom wanem nao hem ino stopem hem. Witnis iansa se Worwor isoem hem lan nomo.

Long saet blong re-examinesem kwestem spokesman blong famili Worwor we hemi oltaem Taliban ibin askem witnis se taem we hem ibin stap luk Tantan istap putum ol nils long taem ia hem ibin stap mekem wanem. Long kwesten ia witnis ise olgeta istap ko raon long graon ia nomo.

No. 3 WITNIS BLONG FAMILI WORWOR – BERNADICT TEMAKON

Witnis antap istap talem long Kot ia se hem ibin stap long wan Distrik Kot we oli bin kolem long 1 June, 1986. Witnis istap talem se long taem ia igat olgeta jifs everiwan long West Ambrem we oli bin stap mo long taem ia oli bin mekem wan dekleresen se famili Worwor nao olgeta ilan ona blong Sulol.

Long saet blong kros-examinesem kwesten we ikam long spokesman blong famili Tantan se wanem kind desisen nao ibin kam aot long 1 June, 1986, witnis iansa se desisen ikam aot se famili Worwor nao ilan ona long Sulol. Long saet blong narafala kros-examinesem kwestem se sapos itru se olfala Worwor ibin karem bak Tantan long Ranon mo some hem ol graon long Sulol, witnis ise hem ino save forom hem ikam blong witnis nomo long wanem we ihappen long Distrik Kot long 1 June, 1986.

Ino gat re-examinesem kwestem ikam long famili Tantan Amos.

No. 4 WITNIS BLONG FAMILI WORWOR – HAROLD TEMAR

Witnis antap istap talem long Kot ia se hemi save wan pis graon we istap long Sulol we oli kolem Lonsesa. Graon ia, witnis istap talem se papa blong hem we hemi Jessie Temar nao ibin pem long tufala olfala we oli Kaonmal mo Worwor. Witnis istap talem se man we oli pem graon ia long hem hemi kasem £ 4.00.

Long saet blong kros-examinesem kwestem we ikam long spokeman blong famili Tantan se whu nao iraetem stetmen blong hem hem ise hem nomo iraetem mo olgeta ites raetem gut long wan narafala pis pepa. Spokesman blong family Tantan ibin askem wan kros-examinesem kwesten tu se wea ples nao witnis ibin stap taem trifala vilij kot ia ibin staon. Long kwesten ia hem iansa se hem ibin stap long Vila. Hem ikontiniu blong talem se sapos hem ibin stap long trifala kots ia bae hem italem aot infomesem ia. Bakeken spokesman blong famili Tantan iaskem wan kros-examinesem kwestem se wea ples nao olfala Kaonmal iblong hem. Long kwesten ia witnis ise Kaonmal hem iblong Sulol mo hemi stret brata blong Loc Baro Neibal we hemi papa blong Worwor. Long wan kros-examinesem kwesten tu we ikam long spokesman blong famili Tantan se sapos hemi save man ia Navong we ibin flot ikam long Ranon. Long saet ia witnis iansa se "yes" hemi save gut storian ia mo storian ia itru forom igat trifala man ia we ol ibin flot ikam mo tu(2) long olgeta ia oli bin kilim tufala mo kakae olgeta mekem se wan nomo ibin ronwe mo kam kasem Sulol. Long narafala kros-examinesem kwesten se sapos Lonsesa hemi baondari blong Sulol or Vante mo witnis iansa se Vante hem ino baondari mo tu Lonsesa hem tu ino baondari. Witnis ikontiniu blong talem se tufala eria ia ibin stap nomo insaet long bigfala baondari blong Sulol mo Lonsesa hemi wan pasis nomo taon long Solwora we ol man Vante oli stap kam taon long hem blong wokbaot long Solwora. Bakeken spokesman blong famili Tantan iaskem wan kros-examinesem kwesten se whu ia nao papa blong Kaonmal mo witnis iansa se papa blong hem hemi Bogonmal mo olfala ia ikam long nasara blong Lonbubwe. Long wan narafala kros-examinesen kwesten bakeken se wanem famili saet nao.

Bogonmal ikam aot long hem long Tantan or Worwor, witnis iansa ise hem ikam long saet blong famili Worwor. Hem ikontiniu blong talem se olfala Bogonmal nao ibonem Loc Baro Neibal mo Loc Baro Neibal ibonem Worwor mo Worwor nao ibonem Marcel we hemi papa blong Raphael Worwor we istap defendem raet ia tedei. Long wan narafala kros-examinesen kwesten bakeken se forom wanem nao Raphael Worwor imas raetem wan leta iko long famili Tantan long askem olgeta blong biltim stoa blong hem klosap long komesel senta, witnis iansa se Worwor iraetem leta ia blong mekem ol famili oli save se hemi stap biltim wan stoa be ino blong askem pemisen blong raet blong biltim stoa long graon.

Long saet blong re-examinesen kwesten we spokesman blong famili Worwor we hemi Taliban iaskem se sapos witnis isave kliarem se man ia Ululvan Kumo iblong Wakon or Sulol, witnis ise Ululvan Kumo hemi pupu blong hem mo hemi blong Wakon be ino blong Sulol or Vante olsem we famili Tantan istap kleimem. Witnis ikontiniu blong talem se hem ibin stap long taem ia we papa blong hem ibin pem graon ia long olfala Kaonmal. Long taem ia witnis italem se taem we Tantan ipusum han blong karem mane Kaonmal istopem hem.

Wokbaot we kot ibin mekem iko blong baondari blong Sulol wetem ol patis

Olsem we kot ibin kliarem long bikinin blong kot se kot ia idil wetem baondari ia nomo we kot ibin advataesem be ino whol baondari blong Sulol. Resen forom wokbaot ia iblong evidence blong olgeta. Ol samting ia hemia hemi ol krev, ol nasara, ol meleun, ol olfala vilijs, ol mak blong bifor mo eni samting we ol pati iwandem soem.

Wokbaot we kot imekem wetem famili Tantan

Long saet blong famili Tantan olgeta ibin stat blong soem kot stat long komesel senta mo folem solwora iko kasem pasis blong Lonsesa, hemia long eria blong Sulol. Olgeta ibin soem wan ples we oli stap kolem Lonhoho we olfala Willie Uleng ibin salem long Joseph we hemi wan man Ranu. Oli soem tu wan ples long solwora we oli kolem Lonortokon mo Lonsesa we famili Worwor istap talem se wan man ibin flot mo kam soa long hem. Afta long hemia oli bin folem wan drae krik iko antap smol mo soem wan drae stamba nadao we oli talem se Tantan ibin nilim wan nil long hem. Afta long hemia oli wokabaot iko antap long vilij blong Vante. Long ples ia olgeta ibin soem ples we olfala stesen istap hemia klosap long vilij nomo. Olgeta ibin soem wan namele tri we istap kro mo talem se hemia hemi wan nasara we oli kolem Ranmarope. Afta oli kontiniu blong soem baondari we oli stap kleimem we ipas klosap long haos blong wan man blong akrikalsa mo kontiniu iko antap long wan het blong nadao we inomo stap be oli talem se Tantan ibin putum wan nil long hem. Long sem eria nao oli bin soem graon ia we oli stap kolem Rantanbon. Graon ia igat kokonas long hem mo ipass andanit long wan hil iko kasem ples we kokonas plantesen ifinis. Afta oli wokabaot iko antap long hil mo soem twin kokonas mo talem se Tantan ibin putum wan nil long hem. Afta long hemia oli soem baondari iko taon long narasaet long hil kasem wan krik mo folem ikam taon long ples we igat ston we igat hol istap long hem. Long plesia graon ikontiniu ikam taon ples we ‘MV Sarika’ irek istap log hem. Afta oli wokbaot iko mo soem plantesen we Catholic Mission ipem istap behaen long Komesel Senta mo kontiniu iko antap long vilij mo soem graon we Willie Uleng isalem mo hemia we Kaonmal wetem Worwor tufala isalem.

Wokbaot we kot imekem wetem famili Worwor

Long saet blong famili Worwor olgeta ibin stat wokbaot long eria blong Komesel Senta mo ko long Solwora long sem ples we famili Tantan ibin go long hem fastaem. Oli soem eria we oli kolem Hohoho we olfala Willie Uleng isalem long Joseph. Afta iko smol oli soem wan ples we oli kolem Lonortokon mo talem se ples ia Willie ibin salem iko long Damne mo afta oli salem bakeken iko long man ia we oli stap kolem Dede. Afta long hemia oli soem pasis ia we oli stap kolem Lonsesa hemia pasis we oli bin stap talem long Kot se wan man (Navong) ibin flot mo kam soa long hem. Long ples ia oli wokbaot folem krik wan or tu meta nomo mo klaem antap long Vante vilij. Long plesia oli some krev blong olfala Worwor we hem nao ibin ko karem Tantan ikam bak long Sulol. Afta oli wokbaot iko behaen oli some krev blong olfala Worwor we hem nao ibin ko karem Tantan ikam bak long Sulol. Afta oli wokbaot iko behaen long Vante vilijs hemia long wan plantesen mo soem ples blong ol olfala vilijs. Oli soem tu ol olfala krev blong ol we oli bin stap long Vante mo Sulol bifo. Oli soem tu trifala nasara mo olgeta ia igat Ranmarope, Lolirimu mo Lonlibubwe. Olgeta nasara ia oli stap koklosap long olgeta nomo. Olgeta isoem tu krev blong ankel blong Damien Balkon we hemi 82 yias old mo hemi witness long saet blong famili Worwor. Olgeta isoem tu tufala Meleun blong ankel blong Damien. Afta long hemia olgeta ibin soem wan Worwor blong olfala Worwor we naoia graon ikavremap be man isave luk save se hemi Worwor. Afta long hemia olgeta ibin soem graon ia we hemi "Rantanbon" we naoia igat kokonat plantesen long hem. Mo tu oli some wan pis lan we Catholic Misen ibin pem aot long trifala olfala blong Sulol, hemia Meleun Takon, Galing mo Mari. Pis lan ia istap behaen nomo long Komesel senta.

WANEM SAMTING NAO KOT IFAENEM AOT LONG EVITENCE BLONG OL PATIS

Afta we Kot ibin harem ol evidence blong tufala patis Kot ifaenem aot se long saet blong famili Tantan Amos histri we ikam aot long Kot isoem se histri ia istat wetem man ia Balkon. Histri ia isoem se hem ibin aot long Sulol taem we Volkeno ibin ronem ol man long 1913 mo hemi iko stap long Vila. Long taem ia nao hemi faenem man ia Willie Masusu mo tufala iko stap long Ranon long Not Ambrem. Taem we tufala istap long Not Ambrem Balkon ibin mekem wan problem wetem waef blong Willie Masusu mekem se Willie Masusu isutum tet Balkon. Taem we olfala Worwor wetem woman blong hem Malipu tufala iharem se Balkon itet tufala ipul long kenu mo go long Ranon long Not Ambrym mo karem bak Tantan Amos we hemi pikinini blong Balkon. Taem we olgeta ikasem long Sulol, storian isoem se olfala Worwor ibin soem graon blong olfala Balkon long olfala Tantan mo Tantan ibin stap putum ol 6 inches nil long ol wut blong makem ol baondari blong graon ia.

Long saet blong famili Worwor Kot ifaenem aot se olfala Worwor hemi stret man Sulol. Hem ibin tet mo oli bin berem hem nomo long eria blong Sulol, hemia long Vante vilij. Kot iharem tu se famili Worwor isave gut ples we papa blong Balkon ikam aot long hem. Kot ibin harem se trifala man ibin flot ikam long Not Ambrym. Igat tu long olgeta ia ol man ibin kilim mo kakae tufala. Wan long olgeta mania ibin ronwei mo flot ikam soa long Sulol long wan pasis we oli stap kolem Lonsesa mo nem ia oli stap iusim iet tedei. Taem we hemi luk sam woman long soa hemi toktok long lanwis Not Ambrym se Nambelolvetu, minim "mi mi wan poor man". Kot ifaenem aot tu se nem ia "Lonsesa" iminim pis mo nem ia ikam aot forom nomo se taem we man ia ikam soa long ples ia ol man oli wantem kilim hem mo kakaem hem be hemi putum han blong hem antap mo talem se hemi sarenda long olgeta. Mania nem blong hem hemi Navong mo ol man Sulol oli karem hem mo tekem hem olsem wan brata blong olgeta.

Taem we Navong ibin stap wetem olgeta long Sulol hemi bin mekem sam kastom mo jenesim nem blong hem ikam long Ururlolvetu. Taem we Urulolvetu istap wetem ol famili blong hem long Sulol, hemi bin mekem wan samtimg we ino stret long famili blong hem. Hemia hemi bin mekem sex bakeken wetem sista blong olgeta we nem blong hem hemi Lesak. Forom risen ia ol famili oli talem long hem blong imas aot wetem woman ia Lisak mo go stap long "Rantanbon". Rantanbon long lanwis blong Sulol iminim nomo se graon blong sex mo hemi stil pat graon blong ol famili be forom fasin we ihapen ol famili oli ting se tufala imas ko stap aot long ples we ol narafala families oli stap long hem. Taem we Ururlolvetu ikarem Lisak iko stap long "Rantanbon" tufala ibonem Balkon mo sem Balkon ia nao iron we iko stap long Vila mo faenem Willie Mususa.

Wanem nao tingting blong kot long ol evidence ia

Kot ifaenem aot se famili Tantan Amos istap klemem graon ia nomo forom se oli stap talem se olfala Worwor nao iko karem bak Tantan Amos mo soem ol graon blong famili Tantan long Vante, hemia long Sulol area. Sapos storian itrue bae long lukluk blong kot bae ino folem kastom blong Ambrym. Ikat tufala risen whae nao kot italem olsem. Fasfala resen nao se long kastom blong Ambrym sapos wan man ikarem sista blong wan man, man ia imas singaot tawian long ol brata blong ol woman ia. Hemia iminim nomo se hemi tabu long ol tawian blong hem. Nambatu resen nao se long kastom blong Ambrem sapos wan man ikarem bakeken sista blong hem mbai ol famili oli mas muvum hem aot olsem we ihapen long ples ia mo putum hem long wan pis graon blong olgeta bakeken we ino stap klosap long ol narafala memba blong sem famili ia. Tufala impoten poen antap ia famili Tantan ineva mekem iklia. Folem tufala poen we kot istetem antap ia long lukluk blong kot mbai ino stret sapos olfala Worwor istap soem graon we ol fala Tantan hemi tawian long hem. Mbae kot iakri ful wan nomo se olfala Worwor ibin ko karem olfala Tantan blong kam soem hem graon we oli stap kolem "Rantanbon" be ino hemia we famili Tantan istap klemem long map. Wan samting tu we kot ifaenem aot se famili Tantan oli tokabaot histri blong olgeta ikasem nomo olfala Balkon be ol ino mekem iklia se whu ia nao papa mo mama blong Balkon mo tufala ia ikam long wanem ples. Kot italem olsem forom famili Tantan ineva explainem gud whu ia nao papa blong Balkon mo hem ikam long wanem ples. Hemia ifolem nomo wan histri we famili Worwor ibin mekem blong talem se Ululvan Kumo we famili Tantan istap talem se hemi papa blong Balkon, hem ino man Sulol be hemi man Wakon. Long saet ia famili Tantan ineva jalensem storian ia mekem se kot ia ino klia se Ululvan Kumo itrue papa blong Balkon or no. Namba four witnis blong famili Worwor we hemi Harold Temar hem tu ikonfiemem se Ululvan Kumo hemi pupu blong mo hemi iblong Wakon be ino Vante or Sulol. Long saet ia famili Tantan ino bin tokbaot mo kliarem ol poens ia imekem se kot istap kwestenem famili Tantan se whu ia nao stret papa blong Balkon mo hemi man wea. Wan poen tu we kot ibin faenem aot se famili Tantan ineva infomem kot long kraon ia Rantanbon mo histri blong hem. Famili Tantan ibin admitim Rantanbon nomo taem we spokesman blong famili Worwor, we hemi Taliban ibin kros-examinem wan long ol witnis blong famili Tantan. Long taem ia witnis ibin admitim se "yes" igat graon ia Rantanbon mo spokesman Toto Amos nao ibin admitim mo kliarem aot gud histri blong ples ia. Long lukluk blong kot storian blong Rantanbon hemi impotent tumas long kot kes ia forom risen se sexual relationship ia wetem sista bakeken nao imekem se divisen istap bitwin ol famili. Divisen ia now kot ifaenem aot se ol brata or ol famili blong woman ia Lisak oli singaot tawian long papa blong Balkon mekem se papa blong Balkon ino save tokabaot graon blong Sulol or Vante from se hemi tabu long ol eria ia. Semtaem tu kot ifaenem aot se Balkon hemi ankle long ol graon blong Sulol wetem Vante be ino Rantanbon. Forom se Balkon iko maretem woman Ranon we hemi stret sista blong woman blong Willie Masusu hemia imekem se long saed blong raet blong graon blong Sulol raet ia mama blong Balkon mo Balkon tufala nomo igat raet mo raet istop taem we Balkon itet. Ol pikinini blong Balkon oli nokat raet long graon blong Sulol from se Balkon imaretem woman Ranon. Olgeta igat raet nomo long graon ia Rantanbon. Long sead blong histri tu ino gat wan histri we isoem se famili Tantan itekpat long eni diling wetem ol graon ia long Sulol olsem oli salem long ol narafala man. Histri isoem nomo se olfala Worwor wetem sam olfala bakeken blong Sulol olgeta nao oli bin stap salem ol graon blong Sulol.

Kot ibin mekem wan observation tu se ino gat wan stret famili blong Tantan ilaef istap tedei long Sulol mo tu ino kat eni evidence blong se papa blong Balkon oli berem hem long Vante or Sulol. Balkon hemi tet long North Ambrym mo Tantan Amos tu itet long North Ambrym. Olgeta famili we oli witnis blong famili Tantan long dispuit ia we oli stap liv long Vante hemi olgeta we Tantan ibrata or singaot famili long olgeta long kastom nomo be ino reli blat blong Balkon.

Long saed blong Famili Worwor kot ifaenem aot se olfala Worwor hemi stret man Sulol mo papa blong hem hemi Locbaro Neibal mo papa blong Locbaro Neibal hemi Bogonmal. Olgeta everiwan ia oli stret man Sulol. Olfala Worwor hemi bonem Marcel we hemi papa blong Raphael Worwor we istap defendem raet ia tedi. Long saed blong storian blong famili Worwor se igat wan man North Ambrym iflot ikam soa long Lonsesa kot iwantem talem se storian ia igat weit long hem forom se igat sam evidence we bai ipruvum se storian ia bae hemi likli se bae itru. Ikat tri evidence we kot ilukluk long hem blong pruvum storian ia. Fes wan nao nem blong pasis ia we man ia iflot ikam soa long hem we hemi "Lonsesa". Kot ia ifaenem aot toktok ia iminim pis or wan man istap putum han blong hem mo stap askem help wetem pis. Sapos nem ia istap talem wan tingting we iko olsem then famili Tantan imas dispruvum se toktok ia itru. Famili Tantan imas putum wan narafala storian blong dispruvum storian ia be olgeta ino mekem. Forom resen ia nao kot ia bai tekem storian blong man ia e iflot se hemi likli se hemi tru. Narafala evidence blong soem se wan man ibin flot ikam soa long Lonsesa hemi nem blong man we hemi Navong mo afta ijenis iko long Urulolvetu. Forom famili Tantan ino bin kliarem gut weta stret papa blong Balkon hemi Ululvan Kumo, Kot istap talem se storian blong Famili Worwor se papa blong Balkon hemi Ururlolvetu bai igat weit long hem. Igat tu risen whae kot italem olsem. Fesfala risen nao se spokesman blong famili Worwor we hemi Taliban italem se Ululvan Kumo hemi man Wakon be ino man Sulol. Toktok ia wan witnis blong Famili Worwor tu ikonfimem we hemi Harold Temar. Hemi talem se Ululvan Kumo hemi blong Wakon. Sapos storian ia iolsem long lukluk blong kot man ia we oli stap kolem hem se Ururlolvetu bae hemi stret papa blong Balkon mo hemi iflot ikam long Not Ambrym. Bakeken forom se nem ia Ururlolvetu ipat blong lanwis blong Not Ambrem we taem we man ia ibin flot ikam soa long Lonsesa hemi bin sakem wan toktok long lanwis blong hem long ol woman se "Nambelovetu" minim mi mi wan pua man. Nem ia Ururlolvetu ikarem half lanwis blong Not Ambrem. Long saed ia kot iluk se Ururlolvetu imas be papa blong Balkon we hemi kam long North Ambrym. Namba tri evidence blong soem se wan man ibin flot ikam long Not Ambrem hemia se ol famili Tantan oli neva jalensem toktok ia se man ia Uluvan Kumo hemi blong Wakon. Forom se olgeta oli no kliarem poen ia mbai long lukluk blong kot mbai hemi stret nomo oblong talem se Ululvan Kumo hemi papa blong Balkon forom se hemi blong Wakon. Long lukluk blong kot tu se bae hemi likli se stret papa blong Balkon hemi Ururlolvetu mo hemi flot ikam long Not Ambrem.

Folem hemia igat sam narafala evidence bakeken we famili Worwor ibin soem long Kot. Feswan nao hemi krev blong olfala Worwor ibin soem long Kot. Feswan nao hemi krev blong olfala Worwor we istap long Vante vilij mo hem nao ibin padol iko long Ranon mo karem bak Tantan olsem we famili Tantan istap talem. Afta long hemia famili Worwor ibin soem tufala nasara we ol man Sulol oli bin stap mekem kastom long hem. Olgeta ia igat Ronmarope, Lolrimu mo Lonbubue. Ol nasara ia istap kolosap long olgeta nomo. Oli some tu tufala meleun hemia ol ston we oli blong ankle blong wan long ol witness blong Worwor we hemi Damian Balkon we hem ibin stap kilim pig long hem. Afta long hemia family Worwor isoem tu wan Worwor we hemi blong olfala Worwor. Hemia hemi wan ples we oli mekem ol ston iraonem we ples blong mekem kastom insaet. Afta long hemia famili Worwor isoem tu graon we oli stap kolem "Rantanbon" mo tu wan pis lan we Catholic misen ibin pemaot long trifala olfala blong Sulol, hemia long 1898. Olgeta olfala ia oli family blong Worwor nomo.

WANEM NAO FAEDINGS BLONG KOT

Afta kot ilukluk long ol evidence blong ol patis hemia nao ol impotent poens we kot ifaenem aot.

1 Se histri blong Tantan Amos istat nomo long taem we Balkon ibin ronwe long Sulol blong taem blong Volkeno mo ko stap long Vila.

2 Se man ia Ululfan Kumo famili Tantan ino kliarem gut se hemi blong wea ples mo tu se sapos hemi tru papa blong Balkon.

3 Se famili Tantan istap kleimem kraon ia Vante long wan storian ia nomo se olfala Worwor ibin ko karem Tantan long Ranon mo kam bak long kraon blong Vante, hemia long Sulol.

4 Se tufala paties iakri se igat wan ples oli stap kolem Rantanbon or sex graon we istap long eria blong Sulol hemia klosap long wan vilij we oli stap kolem Vante.

5 Se Famili Tantan olgeta ino gat wan prove hemia long saet long beri graon blong talem se olfala Balkon, olfala Tantan or papa blong Balkon oli bin berem olgeta long Vante forom tufala olfala ia Balkan mo Tantan Amos olgeta everiwan oli berem olgeta long Ranon, Not Ambrym.

6. Se ino gat wan tru famili blong Tantan Amos istap naoia long Vante vilij be olgeta we oli stap long vilij ia tedei hemia olgeta we oli sigaotem family long saet blong kastom nomo long family Tantan.

7. Se long Vante tedei mo long taem finis ikam ol klos famili blong olfala Worwor nomo oli stap liv long Vante. Exampol olfala Mansak we hemi witness blong famili Tantan hemi stret brata blong Marcel Worwor we ibonem Raphael Worwor we istap defendem raet blong famili Worwor tedei. Mo tu olfala Kaonmal we hemi stret brata blong Locbaro Neibal we ibonem olfala Worwor.

8. Se folem problem we Ururlolvetu ibin mekem trable weten sista blong olgeta bakeken, long Kastom blong Ambrem Ururlolvetu hemi singaot tabu or tawian long ol brata or famili blong woman ia.

9 Se long saet blong kastom blong Ambrem taem we wan man ikarem sista blong hem bakeken, mbai ol famili imas muvum tufala aot blong ko stap long wan ples we olgeta nao oli kat raet long pos lan ia we ol famili oli putum olgeta long hem.

10 Se storian ia we wan man iflot ikam soa long Lonsesa hemi likli se bae hemi wan tru storian.

11. se storian ia se Ululfan Kumo hemi no wan man Sulol be hemi man Wakon bae hemi likli se hemi wan tru storian.

12. se storian ia se nem blong man ia iflot ikam hemi Navong mo afta ijenis iko long Ururlolvetu ilikli se hemi wan tru storian forom se ia Ururlolvetu hemi lanwis blong Not Ambrym.

13. se famili Worwor olgeta istret man Sulol mo stap liv long Vante vilij bifo ikam forom se olgeta ikat ol Meleun, ol Worwor, ol Krevs, ol histri we isoem se olgeta ibin mekem sam dilings wetem Catholic Misen bifo long 1898 olsem salem kraon.

Samari blong ol desisen blong kot.