Bakoa v Kaltatak [2014] VUIC 2; [2014] VUICB 1; Civil Case 001.2014 (29 August 2014)

IN THE EFATE ISLAND COURT OF
THE REPUBLIC OF VANUATU
(Civil Jurisdiction)

CIVIL CASE N° 001 of 2014

BETWEEN:

ANDREW BAKOA
Of Eratap Village, Efate
ORIGINAL CLAIMANT

AND:

FAMILY KALTATAK
Of Efate Island,
FIRST DEFENDANT
Represented by:
KALTAPAS
JOSEPH
KALKOT

AND:

FAMILY KALMETLAU
Of Efate Island,
SECOND DEFENDANT

Represented by:
JACK KALMETAU
NORRIS JACK
LAWA KALMETLAU
WILLIAM KALMETLAU
KIK KALMETAU
TOTEM KALMETLAU

Coram: Hon. Justice Ann Carlo (Presiding Justice)
Hon. Justice Harry Joshua
Hon. Justice Eddie Karis

Court Clerk: Alida Tchivi

Date of Hearing: Monday 25th August – Thursday 29th August 2014

Date of Judgment: Friday 29th day of August 2014 - Time: 17:15 pm

Court Venue: Dumbea, Port-Vila, Efaté, VANUATU

IN THE MATTER OF: FAMILY CLAIM AND FAMILY RIGHTS

I kat wan Island Court Claim we ANDREW BAKOA hemi faelem long Tuesday 12th dei blong manis June 2014. ANDREW BAKOA KALPOILEP i seekim long court ia blong Court ia hemi determinem FAMILY CLAIM mo FAMILY RIGHTS blong hem towards every Kastom Tribes blong Eratap Village mo semtaem hemi wandem blong court ia hemi declarem se FAMILY KALTATAK mo FAMILY KALMETLAU i no blong Eratap.

Long matter blong Section 10 blong Efate Island Court ACT [CAP 167] mo hemi matter blong Kastomary Claim mo Kastomary Right blong Eratap Village, South Efate.

JUDGEMENT

TOKTOK BLONG CLAIMANT ANDREW BAKOA KALPOILEP:

History blong Paramount Chief KALMET

Paramount Chief KALMET hemi rule betwin 1881 – 1913, hemi gat 32 years we hemi rule. Paramount Chief KALMET hemi inheritem title blong hem long papa blong hem, Paramount Chief KALPOILEP. Paramount Chief KALMET hemi lif long Erfen village mo hemi kam Chritian. Hemi ledem pipol blong hem oli mov iko long smol aelan blong Eratap.

Paramount Chief KALMET hemi maretem LALEI, mo tufala I gat fo (4) pikinini. Olgeta pikinini blong Paramount Chief KALMET i gat: SILAS, KALTONG, KIK mo MERIAM.

History blong KALTONG

Kaltong we hemi nambu tu (2) pikinini blong Chief KALMET, hemi maretem EHEM. EHEM hemi pikinini blong KALTER mo LINUK. EHEM hemi gat bel long RUTAU blong Erakor bifo hemi maretem KALTONG. Pikinini blong EHEM wetem RUTAU tru long bush maret hemi wan boy we name blong hem KALTATAK. KALTONG mo EHEM tufala i gat wan pikinini gel we name blong hem hemi TOUFES.
Taem EHEM ided, KALTONG hemi maretem namba tu (2) woman we hemi TOUFABUN. KALTONG wetem TOUFABUN tufala i gat wan pikinini kel nomo we name blong hem ANNETA.

History blong KALTATAK

Kaltatak i maretem LILOT we i gat tu (2) pikinini wetem JOHN MORTEIN finis. Tufala pikinini ia i kat SANDRE (male) mo KALWAT (male). KALTATAK i nokat pikinini wetem LILOT. Taem LILOT i ded KALTATAK i maretem ANNETA we hemi step-sista blong hem mo tufala i kat olgeta pikinini ia:
TOUFABUN (female), KALTAPAS (male), KALTONG (male), RONE (female), LIMAL (female) mo LIKAP (female).

History blong KALTAPAS

KALTAPAS hemi maretem TOUMORU mo tufala i kat fo (4) pikinini: EXERE (male), JOSEPH (male), EHEM (female) mo KALKOT (male)

KALKOT i maretem LESBETH blong South-East Ambrym. JOSEPH hemi maretem TOKOLAU blong Eratap.

History blong APIU

APIU hemi maretem LIMOR, tufala blong Erakor mo tufala i kat seven (7) pikinini: RUTAU (male), KALANGIS (male), KALOTIP (male), LIMUK (female), TOURAN (female), TOPET (female) mo LISEI (female).

RUTAU hemi wan Evangelist. Taem EHEM i kat bel long RUTAU tru long bush mared, oli sendem EHEM i kam long Eratap blong haetem nogud fasin we RUTAU i mekem long ol Misi (Missionary).

History blong RUTAU

RUTAU hemi wok olsem Missionary long Malekula. RUTAU mo stret woman blong hem MERY, tufala i kat tri (3) pikinini: JOHN MORTEN (male) we hemi bon long Malekula Island. Tu (2) nara pikinini blong tufala i gat IONA (male) mo LISAR (female)

JOHN MORTEN hemi maredem FLORA mo tufala i kat wan boy nomo we nem blong hem KALWAT. Family KALWATONG we i stap long Eratap tedei hemi kamaot tru long KALWAT we hemi pikinini blong JOHN MORTEN blong Erakor.

History blong KALWAT

KALWAT hemi pikinini blong JOHN MORTEN we hemi pikinini blong olfala RUTAU. KALWAT hemi maretem TOUFKAL mo tufala i kat fourteen (14) pikinini: LILO (female), ANNIE (female), AFFY (male), ANDRE (male), LILOT (female), LITAU (female), LIRIP (female), KALTAPU (male), ELSIE (female), SERAH (female), GEORGE (male), DOUGLAS (male), KETIE (female) mo ALICE (female).

History blong KIK

Erfen Village i stap klosap long Erakor Village i mekem se Christianity i kam tru long Erakor finis i kam long Eratap. KIK we hemi namba tri (3) pikinini blong Chief KALMET hemi maretem TOUTFAW blong Ifira mo tufala i kat wan pikinini we name blong hem KALSON. Taem TOUTFAW hemi ded, KIK hemi maretem MASSOK blong Erakor. Taem MASSOK i kam blong maredem KIK, hemi gat bel blong KALMETLAU finis tru long bush mared wetem ATU blong Maewo Island bifo hemi maretem KIK. KIK wetem MASSOK tufala i gat wan pikinini nomo we name blong hem SERAH. Taem KIK i ded, ATU i kam tekemaot MASSOK i ko bak long Erakor mo tufala i gat tu (2) pikinini bageken: LONIS (male) mo LIFA (female).

Arrangement blong MASSOK i kam maretem KIK hemi tru long Chief KALSONG blong Erakor we hemi maretem LITNGASIK we hemi daughter blong Paramount Chief KALPOILEP. Risen blong mared arrangement ia betwin ol lidas blong church wetem chiefs hemi blong haetem pikinini ia we MASOK i kat long bel blong hem from we papa blong MASSOK hemi wan preacher we hemi base long Eratap mo hemi stap lukaotem Eton mo Epau. Second risen hemi blong haetem pikinini long ol missionary we hemi base long Erakor Island.

Taem KALMETLAU i bon hemi stap long Eratap kasem tedei. Risen blong KALMETLAU i stap long Eratap hemi from ATU hemi wan plantation worker blong Bouffa. ATU hemi blong Maewo.

Attitude blong JACK KALMETLAU we hemi pikinini blong KALMETLAU hemi kat sem character olsem papa blong hem. Taem hemi drong hemi stap threatenem olgeta pipol blong Eratap Village wetem masket. Ol pipol blong Eratap oli fraet long hem. Hemi no soem se hemi bladlaen blong chief.

Relationship blong JACK KALMETLAU mo KALTATAK Family hemi tru long Family RUTAU. JACK KALMETLAU hemi descendants blong woman (IONA RUTAU) mo family KALTATAK i kam tru long man we hemi olfala RUTAU.

Long 1992 mi Chief ANDREW BAKOA KALPOILEP mi invitem Family KALMETLAU blong helpem mi blong mifala i defendem Land Rights blong mifala. Fes samting we mi mo sam pipol blong Eratap i mekem hemi setap blong Family KALMET mo setemap wan private school we oli kolem KALMET COMMUNITY SCHOOL. After we mifala i setemap Family KALMET mo School, JACK KALMETLAU hemi kam joinem mifala.
Presence blong hem i mekem se plante pipol oli muv-aot.

Mifala dividem wok, JACK KALMETLAU hemi lukaotem TEUMA BUSH, mi lukaotem KALMET COMMUNITY SCHOOL. Taem hemi ko long TEUMA BUSH, hemi karem ol families blong hem blong Tongoa mo Erakor mo kivim free kraon long ogleta especially olgeta blong Pele Villlage long Tongoa. Risen blong kivem kraon long olgeta pipol ia from JOE BEN blong Erakor hemi maretem woman Pele blong Tongoa we JACK KALMETLAU i stap wetem olgeta taem hemi smol. JACK KALMETLAU hemi kat affairs wetem wan woman Pele blong Tongoa, name blong hem Marie i mekem se connection i kam mo strong mo tru long Family RUTAU blong Erakor. Olgeta pipol ia oli tekem advantage blong salem kraon i ko long ol man aeland witaot proper control mo proper management blong Family KALMET i expectem.

Risen blong action blong hem hemi from Family RUTAU blong Erakor hemi adoptem JACK KALMETLAU mo i kivem name blong hem JACK ALCIDE blong Erakor.

Taem JACK KALMETLAU hemi smol, hemi stap lif wetem BEN, pikinini blong KALMASEI mo TOUMERMAN long Erakor kasem taem hemi kam middle man.

History blong KALMETLAU

KALMETLAU hemi maretem HELLEN. Tufala i gat thirteen (13) pikinini: LILI (female), LIPOPOT (female), MAL (male), JACK (male), LAWA (male), MORRIS (male), TOUNAR (female), UNE (male), FREDDY (male), WILLIAM (male), TOTEM (male), MERILYN (female) mo KIK (male).

Morris we hemi pikinini blong KALMETLAU i stap lif long Erakor kasem tedei.

Olgeta marej we i kam kasem Family KIK mo Family KALTATAK i happen long period betwin taem blong Paramount Chief KALMET mo Paramount Chief SILAS.

Family Tri blong KALMASEI mo TOUMERMAN

KALMASEI hemi stap wetem TOUMERMAN mo tufala i gat tu boy we hemi KALMER mo IBEN then behind, TOUMERAN hemi go stap wetem JOE MARTINIQUE mo tufala i just kat JACK ALCIDE mo MARIE.

Family Tri blong BEN mo RUTH (blong Tongoa)

BEN hemi stap wetem RUTH mo tufala i gat six (6) pikinini: WILLEN BEN (male), ROBERDICT (male), BEN IWISS (male), MARIE (female), JOE (male) mo SONDALE (female).

History blong Paramount Chief SILAS.

Paramount Chief SILAS hemi succedem title blong papa blong hem KALMET mo lafet blong markem taem hemi kam chief i stap long Eratap Island. Chief SILAS hemi maredem RAUSIL mo pikinini blong tufala hemi: LIMAS (female), ANDREW LAKLOKAI (male), SIMON (male) mo KALMAN (male).

Paramount Chief SILAS hemi rule start long 1913 – 1948. Hemi rule 45 years mo hemi ded long 1963. Oli berem body blong hem long Eratap Island.

History blong Paramount Chief ANDREW LAKLOKAI.

Parmount Chief Andrew LAKLOKAI hemi inheritem title blong Paramount Chief long papa blong hem Paramount Chief SILAS long 1946. Paramount Chief ANDREW LAKLOKAI hemi lidem pipol blong Eratap long wan taem we dispute blong kraon i kam bikwan. Eratap i fesem challenge long boundaries bitwin Eton mo Erakor mo i kat claim blong ol individual families long Eratap mo Erakor long sam part blong land we i stap insaet long boundaries blong Eratap.

Chief ANDREW LAKLOKAI hemi maredem DORETH mo tufala i gat fourteen (14) pikinini. Olgeta pikinini ia: LIBEL (female), LEUR (female), MANDRE (male), LEINASEI (female), MARKFIN (male), TINAPU (male), LEISOK (female), LITAR (female), BAKOA (male), TOUBET (female), LITONG (female), MANAGIS (male), MANTA (male) mo PAL (male).

Long 1960 kasem 1963 Paramount Chief ANDREW LAKLOKAI hemi movemaot ol pipol blong hem long Eratap Island i kam long Eratap main land. Chief ANDREW LAKLOKAI hemi rule start long 1946 – 1986 we hemi about 38 years. Chief ANDREW LAKLOKAI hemi ded mo bodi blong hem oli berem long Eratap village.

History blong Paramount Chief ANDREW BAKOA KALPOILEP

Paramount Chief ANDREW BAKOA KALPOILEP hemi succedem title blong papa blong hem long year 1987. Lafet blong celebratem ceremony taem hemi kam chief i tekem ples long Eratap village. Long taem blong Paramount Chief ANDREW BAKOA KALPOILEP, dispute blong kraon long Eratap, Naisraper Area, Bouffa mo Teouma / Rentapao Land i kam antap bikwan. Long 1993 Chief ANDREW BAKO KALPOILEP hemi lodgem claim blong hem long Teouma / Rentapau Land. Long 2003 hemi lodgem claim blong hem long Eratap and Area, long 2004 hemi lodgem claim blong hem long Naisraper mo long 2011 hemi lodgem claim blong hem long Bouffa.

Paramount Chief ANDREW BAKOA KALPOILEP hemi lodgem olgeta claim long olgeta land ia olsem head blong Family KALMET, mo hemi claim tru long Title blong Paramount Chief.

Long taem we Chief ANDREW BAKOA KALPOILEP hemi stap exercisem role blong Paramount Chief blong Eratap, i kat challenge long title blong Paramount Chief. Vaturisu Council blong ol Chiefs i bin dil wetem dispute mo mekem Judgement long 17th November 1998 infavor long Chief ANDREW BAKOA KALPOILEP. Malvatumauri i bin confirmem Chief ANDREW BAKOA KALPOILEP tru long wan leta long 15th March 2000 se hemi Paramount Chief blong Eratap.

Chief ANDREW BAKOA KALPOILEP hemi bin memba blong Malvatumauri long tri different periods, mo hemi chairman blong Vaturisu blong Chiefs, mo hemi Chairman blong South-Efate Area Council of Chiefs long tu (2) periods finis mo nowia hemi Chairman yet long bodi ia.

Chief ANDREW BAKOA KALPOILEP hemi maretem ANNIE mo tufala i kat faef (5) pikinini: WILLIE (male), SAMUEL (male), PETER (male), DORETH (female) adopted, mo SILAS (male) then after, hemi maredem namba tu (2) woman we name blong hem JENNY mo nowia tufala i gat wan (1) pikinini boy nomo we nem blong hem JOHNATHAN.

Challenge blong ANDREW BAKOA KALPOILEP:

Long 2010 NORRIS JACK mo KALKOT KALTATAK tufala i forgem signatures blong JACK KALMETLAU, KALTAPAS KALTATAK, mo CHIEF ANDREW BAKOA KALPOILEP olsem lessor blong Land Lease Title n° 12/0932/138 blong sakem kraon i ko long owner blong AQUANA RESORT long Eratap. Kopi blong leta i ko long Police mo Lands Department blong revoke lease.

Details blong olgeta Annex we ANDREW BAKOA KALPOILEP i providem long this court:
"ABK 1, ABK 2, ABK 3, ABK 4, ABK 5, ABK 6, ABK 7 mo ABK 8".

WITNESS N° 1 BLONG CLAIMANT ANDREW BAKOA KALPOILEP: 'MANTA ANDREW'

Witness ia hemi witnessem long court ia se hemi stret pikinini blong Paramount Chief ANDREW LAKLOKAI blong Eratap mo hemi stap witnessem olgeta toktok we claimant hemi statem long claim blong hem se:

• First Defendant 'FAMILY KALTATAK' hemi ol stret descendants blong RUTAU blong Erakor Village;
• KALTATAK hemi stret pikinini blong RUTAU we mama blong hem, EHEM i kat bel long RUTAU tru long bush maret bifo apu KALTONG i maretem mama blong hem;
• Main risen blong EHEM i maretem KALTONG blong Eratap taem hemi kat bel blong RUTAU blong Erakor tru long bush maret hemi blong haetem nogud fasin we RUTAU i mekem long ol missionary we i lif long Erakor Island from RUTAU hemi wan Evangelist (Missionary);
• Sekon pikinini boe blong RUTAU wetem MERY hemi IONA. IONA i maretem LISER blong Eratap. IONA i folem woman blong hem, LISER mo tufala i kam lif long Eratap;
• IONA mo KALTATAK tufala i stap wok long sem kraon long Ewentau tru long family relation blong RUTAU;
• Taem IONA i ded, Ati LISER, woman blong hem i stap wetem ol pikinini blong tufala. Apu KAI i kivem ol kokonas mo kraon long ati LISER blong oli stap kakai long hem. Taem Ati LISER i ded, gel blong hem SALOME mo husband blong hem, KALMAN mo LISONG mo husband blong hem, KALOSIN, mo DANIEL mo LEUR, waef blong hem oli stap wok long kraon ia kasem tedei.

KALTONG we hemi sekon boe blong KALTATAK mo woman blong hem MELI, tufala i stap wok long sem kraon we apu KAI i givim long LISER mo ol pikinini blong hem. narasaet long kraon ia, JAMES mo KALSEREI we tufala i pikinini blong LOVITE tufala stap mekem karen. LOVITE hemi pikinini blong IONA;

• Sekon defendant, FAMILY KALMETLAU oli stret descendants blong ATU blong Maewo;
• KALMETLAU hemi pikinini blong ATU we MASOK blong Erakor i kat bel long hem wetem ATU bifo apu KIK i maretem;
• Taem apu KIK i ded, ATU i kam lif long Eratap long wan pis kraon we Paramount Chief SILAS i kivim long hem blong yusem. Kraon ia i stap stret long slop we i ko daon long area we Nazarene Church i stap long hem;
• ATU i planem tu (2) nangai tri long ples ia we mifala i stap kolem nangai tri blong apu ATU;
• JACK KALMETLAU hemi stap claim area ia se hemi blong hem tru long apu blong hem ATU;
• JACK KALMETLAU hemi sakem toti long area ia recently from hemi stap disputem kraon wetem olfala KALSAF;
• ATU i kam long Eratap i folem MASOK wetem pikinini blong hem we hemi KALMETLAU.
• Taem ATU i stap long Eratap, hemi planem some kokonas long wan area long Earu. Family blong KALMETLAU oli stap yusem ol kokonas ia kasem teei;
• Taem papa blong witness MANTA ANDREW we hemi Chief ANDREW LAKLOKAI hemi argue wetem KALMETLAU from ol properties, hemi always talem KALMETLAU se hemi pikini blong ATU. Papa blong witness MANTA ANDREW hemi stap talem long KALMETLAU se ol properties blong Paramount Chief SILAS i stap long hand blong hem from tufala stret brata blonghem SIMON hemi ded mo nokat pikinini mo KALMAN i kat ol gel nomo.
  

WITNESS N° 2 BLONG CLAIMANT ANDREW BAKOA KALPOILEP: 'APIU JOSEPH'

Witness ia APIU JOSEPH, hemi blong Erakor Village mo hemi gat 70 years old. Hemi bon long 19 February 1945.

Hemi kam bifo this court blong witnessem claim we Plaintiff hemi faelem long court ia:

• Paramount Chief ANDREW BAKOA KALPOILEP hemi stret descendant blong Paramount Chief KALPOILEP;
• Kristenity i strong long Erakor mo i kat missionary i base long Erakor smol Island. Kristenity i kam long Erakor festaem bifo i go long Eratap, mo some kruket fasin blong ol lidas blong church long Erakor oli ko haetem long Eratap;
• Witness APIU JOSEPH hemi stret descendant blong apu RUTAU blong Erakor Village. RUTAU hemi pikinini blong apu APIU we witness i karem name blong hem. Apu APIU mo woman blong hem Ati LIMOR tufala i gat tu (2) pikinini: RUTAU mo TOURAN;
• Ati TOURAN i maretem apu KALONTAN mo pikinini blong tufala hemi METU we hemi mama blong witness APIU JOSEPH;
• KALTATAK hemi no stret pikinini blong KALTONG, hemi pikinini blong RUTAU mo EHEM blong Erakor tru long bush maret;
• RUTAU hemi wan evangelist, taem EHEM i kat bel long pikinini blong RUTAU, oli sentem EHEM i ko stap long Eratap blong haetem pikinini we i stap long belly blong hem long Missionary we i stap long aeland blong Eratap;
• KALTONG, pikinini blong Paramount Chief KALMET blong Eratap hemi maretem EHEM mo KALTATAK we hemi pikinini blong RUTAU wetem EHEM i bon long haos blong KALTONG;
• Stret papa blong KALTAPAS hemi KALTATAK, stret apu blong KALTAPAS hemi apu RUTAU blong Erakor;
• Taem pipol blong aeland oli kam blong wok long Vila, sam long olgeta pipol ia oli kam lif long Erakor mo Eratap blong work long plantation long Bouffa. Olfala ATU blong Maewo hemi kam lif long Erakor. I kat nara tu (2) man Maewo tufala ko lif long Eratap blong wok long plantation, tufala i gat TOA mo NMAF/CILAS. Ol uncle blong mifala (witness & plaintiff's family) oli kivim ples long ATU blong mekem haos blonghem long Erakor smol aelan mo kraon blong hemi mekem karen long hem;
• Taem witness APIU JOSEPH i stap kam bik boe, hemi lukim ATU long Erakor. Some taem ATU i ko long Eratap mo kambak long Erakor;
• MASSOK hemi blong Erakor, hemi kat bel long ATU blong Maewo. Ol lida blong church mo chief oli sendem MASOK wetem pikinini we i stap long belly blong hem i ko long Eratap. MASOK i ko long Eratap mo hemi maredem apu KIK we hemi pikinini blong Paramount Chief KALMET. Pikinini blong MASOK wetem ATU i bon long haos blong apu KIK mo oli kolem nem blong hem KALMETLAU.
• KALMETLAU hemi stret pikinini blong olfala ATU blong Maewo Island;
• Taem apu KIK i ded, ATU i ko long Eratap mo hemi tekem MASOK i kam bak long Erakor. ATU mo MASOK tufala i kat tu (2) pikinini bageken we hemi LONIS mo LIFA;
• Taem Family KALMETLAU oli ko long Erakor, oli lif wetem olfala ATU mo JOHN MORTEN. Taem ATU i ded, Family KALMETLAU taem oli ko long Erakor oli lif long haos blong Family LONIS;
• Face blong olfala KALMETLAU mo olfala LONIS i semak nomo from tufala i stret bladlaen blong ATU;
• Family KALMETLAU oli kontinu blong respektem traditional bladlaen blong olgeta tru long ATU kasem tedei;
  

TOKTOK BLONG TUFALA DEFENDANTS: "FAMILY KALTAK MO FAMILY KALMETLAU'
Spokeman blong tufala defendants ia hemi NORRIS JACK KALMET.

Tufala defendants 'FAMILY KALTAK mo FAMILY KALMETLAU' tru long spokeman blong tufala NORRIS JACK KALMET hemi stap mekem deffence statement blong olgeta olsem:

• Every Land Claim we i register long court oli register under long name blong KALMET FAMILY we olgeta second defendants, oli truly bladline mo defendants blong KALMET FAMILY blong Eratap Village South Efate;
  
• Family KALMET i compromise wetem Family KALTATAK blong court i save declarem tufala i land owners blong Eratap & areas from bladline blong Paramount Chief KALMET tru long Ati ANNETA;

Emia hemi klia wan cover-up nomo blong ANDREW BAKOA. Risen why tufala families i save compromise hem blong Land Tribunal i save meet kwik mo kamap wetem wan isi judgement instead blong wan longfala LEGAL BATTLE long court;

• Mifala i no akri follem statement or point (3) blong ANDREW BAKOA from hemi neva wantem FAMILY KALTATAK i exercisem raet blong olgeta;
  

Mr. BAKOA ANDREW hemi wan Dictator mo hemi wan Stambling Block long Development long Areas blong Eratap. Risen why FAMILY KALTATAK i disaet blong brekem M.O.A blong tufala families;

Kasem 07/07/2014 FAMILY KALMET mifala i sakemat Mr. ANDREW BAKOA olsem representative blong KALMET FAMILY. KALTATAK FAMILY oli just kambak mo mfiala i gad wan mo M.O.A bageken - Annex NJK 4;

MR. KALPOILEP i been terminated by majority blong family KALMET olsem representative blong FAMILY KALMET from wan or two risen olsem i stap long Annex NJK 4.

Emi klia se MR KALPOILEP hemi no wan man blong development be hemi man blong dispute long ol life blong hem kasem tedei, hem i no save hedem KALMET FAMILY from hemi kasem STROCK mo hemi sick Patient;

• Point four (4) blong Mr. KALPOILEP: hemi kam olsem wan complain nomo we hemi lodgem wetem FRAUD UNIT blong Police Force mo hemi almost five (5) to (6) years now we complain ia i no even kam wan case.
  

Issue blong Title 12/0932/138 i bin challenge long Supreme Court without success mo project i helpem Family KALMET mo Eratap Village people mo too Nation blong Vanuatu tedei;

• JACK KALMET mo KALKOK KALTATAK i neva attempt blong distroyem work blong village olsem we MR. KALPOILEP i stap talem. KALPOILEP i runaway long Eratap Village twenty (20) years i pass finis mo go live outside long Village;
  
• Hemi very true se KALPOILEP hemi help blong createm dispute long Family KALMET. Taem hem (KALPOILEP) i create or sharem FAMILY KIK mo ANDREW in fact, mifala i wan nomo: KALMET FAMILY;
  
• Mifala i refus from KALPOILEP i stap mixim-up Governing Structure blong hem wetem kraon blong tufala FAMILY (KALMET mo KALTATAK) without concern or approval blong Family;
  
• Mifala i neva yusum pawa blong Paramount Chief KALPOILEP. Wannem we mifala i mekem emi feel bad hemi from mifala too i descendants blong JIF KALMET be i no hem wan nomo. Mifala i gat raet olsem ol declared Custom Owners ia.
  
• JIF KALPOILEP i no even putum TABU long solwota ol difren family ia that's why mifala i remuvum NAMELE LIF mo plan blong closem stret pawa blong Custom Land Owner;
  
• JIF KALPOILEP i mas correctem hem wan mo kamback leadim gud community blong Eratap be no mixim Graon blong Families wetem Jifly Structures blong hem;
  
• FAMILY KALTATAK i stap confermem wetem Efate Island Court se this court i no save yusum claim blong JIF KALPOILEP blong openem or dig insaet long Affairs blong Family KALTATAK from JIF KALPOILEP hemi no part blong FAMILY KALTATAK mo hemi nogat raet blong pusum nose insaet long KALTATAK FAMILY. FAMILY KALTATAK hemi bin declare finis as Custom Owners blong Eratap and Areas mo Court of Appeal blong Republic blong Vanuatu i confirmem se hemi FINAL mo BINDING;
  
• JACK KALMET hemi stret pikinini blong KALMETLAU we hemi son blong KIK KALMET mo mifala nao i olsem nem ia KALMET be i no BAKOA we i go lukaot storie long rod olsem wan stranger, from storie oli Educatem yumi long hem long house be i no long rod mo i no by sam wan else;
  
• Se kitchen, house mo Nasara blong JIF KALMET i no wan bag yard blong haetem ol rabis fasen blong sex laef blong man Erakor long hem long taem hemi stap JIF yet;
  
• So lukim claim blong JIF ANDREW BAKOA mo ol witness blong hem oli stap witness againsem JIF KALMET se hemi stap accomodatem rabbis fasen blong sex laef blong man Erakor by lettem oli maret long stret son blong hem (KALTONG mo KIK). JIF KALMET ia nao TITLE blong hem JIF BAKOA ANDREW i stap holem tedei;
  
• Deffendants oli totally opposem mo no akri from hemi ol kiaman storie everywan;
  
• Long 1993, taem papa blong NORRIS JACK KALMET mo JIF ANDREW BAKOA oli putum claim blong Family KALMET long Efate Island Court mo go winnim long case ia long 2006 wetem stret Family Tri blong mifala;
  
• Long 2003, FAMILY KALMET i go compromise wetem KALTATAK FAMILY mo Customary Land Tribunal i declarem tufala families olsem CUSTOM OWNERS wetem sem History mo Family Tri we KALMET FAMILY i yusum long Island Court long 2006;
  
• Long year ia 2014, long Efate Island Court JIF ANDREW BAKOA we hemi bin Hed blong Family KALMET i kam hem wan this taem long court without FAMILY KALMET members wetem new History mo Family Tri we i totally kiaman nomo;
  
• Long 05th dei blong manis March 2014 – JIF'S DAY, this year nomo JIF ANDREW BAKOA i ordainem LAWA KALMETLAU mo givim nem ia KIK;
  
• Three (3) manis afta 12th June 2014, JIF ANDREW BAKOA i filem wetem Efate Island Court se mifala includim LAWA KALMETLAU se mifala i no descendant blong KIK;
  
• Mifala ol defendants i wandem talemaot long this Honorable Court se long saet blong JIFLY Dispute or Rait blong JIF, mifala i no disputum yet long Court ia wetem ol argiusation blong mifala;
  
• Wannem we mifala (defendants) i stap base long hem long ol response blong mifala i blong some long this Honorable Court pictures blong JIF blong mifala BAKOA ANDREW KALPOILEP how i lead i kam kassem emi save mekem ol new stories mo filem wetem court ia and then go karem ol man like APIU JOSEPH, JACK KALON mo traem mekem oli witnessem kiaman make-up storie blongh em and bambai mifala i ready blong FORGIVIM em from Kiaman Storie mo laen Tri ia.
  
• Mifala ol defendant mifala i fil se claim blong rait over long ol land matters i nomo subjects blong Efate Island Court.
  

WITNESS N° 1 BLONG DEFENDANTS 'FAMILY KALTATAK MO FAMILY KALMETLAU: 'KALTAPAS KALTATAK'

• Mi KALTAPAS KALTATAK, mi blong Eratap Village South Efate, mi mekem statement ia blong talemaot long Efate Island Court se every withness Statement blong MANTA ANDREW, APIU JOSEPH blong Erakor mo JACK KALON oli false, baseless mo totally wan niu storie long laef blong ol man Eratap.
  
• EHEM hemi woman blong KALTAPAS we mi karem nem blong hem i stap mo emi Apu blong mi stret tru long papa blong mi KALTATAK;
  
• KALTATAK we hemi papa blong mi emi no pikinini blong RUTAO or even pikinini blong JOHN MORTEN Son blong RUTAO blong Erakor. Mo too KALTONG hemi no step papa blong papa blong mi 'KALTATAK'. Yumi even save refer long History Book blong FAMILY KALMET LINE blong Apu KALTONG bae yumi save luk KALTONG hemi maret wan taem nomo wetem TOUFABUN mo gat mama blong mi ANETA.
  
• Papa blong mi KALTATAK hemi maredem LILOT olsem fes waef, LILOT hemi gat finis SANDRE mo KALWAT we tufala pikinini blong JOHN MORTEN blong Erakor be i no RUTAO. RUTAO hemi papa blong JOHN MORTEN. RUTAO oli berem hem long 'Uripiv smol Island' long island blong Malekula.
  
• Mama blong mi ANETA hemi gel blong KALTONG pikinini blong JIF KALMET mo mama blong mama blong mi hemi TOUFABUN we hemi sista blong MASOK we Apu KIK i maretem mo tufala i gat KALMETLAU mo later Apu ATU i maretem taem apu KIK i ded.
  
• MASOK mo TOUFABUN tufala i blong Eratap be i no Erakor olsem KALPOILEP mo grup blong hem oli kiaman holem Bible mo stap talem.
  
• Ati MASOK, TUFABUN tufala i sista blong KALORIP, KALTAKEL, KALRAN, KALOSIREU mo every wan ia oli stap live long Eratap kasem oli ded mo mifala i kolem olgeta KALMERMER. Family blong Eratap we tudei family ia oli Counta Claimer n° 4 long land Case 71 of 2006 long Supreme Court.
  
• About KALMETLAU, mi gat seventy three (73) years old this year mi save gud hem from hem (APU KALMETLAU) mo mama blong mi ANETA tufala i real cousins. Mama blong mi i born tru long Apu KALTONG we hemi stret brata blong Apu KIK mo mama blong mi i born long TOUFABUN stret sista blong Ati MASOK. KALTONG mo KIK tu brata, tufala i maretem stet tu MASOK mo TOUFABU. Mi neva harem se Apu KALMETLAU i pikinini blong Apu ATU mo emia witness statement againsem KALMETLAU FAMILY emi wan new make up storie.
  
• Long 2003 mi mo Family blong mi KALTATAK Family wetem help blong fulap nara families mifala i originally claimem Eratap Land and areas wetem Eratap Customary Land Tribunal mo Family KALMET i counta claim so mifala i compromise mo court i declare mifala Land Owner mo Court of APPEAL i talem se hemi FINAL mo BINDING long April 04th 2014.
  

WITNESS N° 2 BLONG DEFENDANTS 'FAMILY KALTATAK MO FAMILY KALMETLAU: 'WILLIAM KALMET'

• Mi WILLIAM KALMET, blong Eratap Village South-Efate, mi stap mekem statement ia olsem wan Defendant long this Court ia.
  
• JIF BAKOA ANDREW i mekem claim blong hem i kam long Efate Island Court wetem fulap kiaman toktok from pawa nomo.
  
• JIF KALPOILEP i neva soem long man Eratap wan solide working relationship. That is why yumi stap witnessem wan Legal Fait between or insaet kitchen blong FAMILY KALMET long court ia.
  
• Papa blong mi KALMETLAU KIK, hemi only man insaet long FAMILY KALMET blong karem nem blong pupu blong hem stret JIF KALMET. Long bifo i kam u no save karem nem blong wan JIF taem yu no bladline blong hem. Nem ia KALMETLAU, Apu KIK KALMET nao i givim long stret son blong hem from hemi save se pikinini ia i son blong hem stret.
  
• Apu KIK mo Apu KALTONG tufala i tu stret brata we tufala i maretem tu stret sista MASOK mo TUFABUN mo tufala woman ia tufala i kamaot long KALMERMER FAMILY blong Eratap be i no Erakor.
  
• Storie we mifala i holem insaet long house i no wan second hand storie olsem JIF BAKOA ANDREW mo grup blong hem. taem Apu KIK i ded, Apu ATU blong Maewo i kam maretem ATI MASOK mo stap live long Eratap smol taem mo muvaot oli go live long Erakor Island. That taem, papa blong mi KALMETLAU tu i folem olgeta i go mo stap live wetem olgeta long Erakor Island, be from hemi no pikinini blong ATU, i mekem mama blong hem MASOK i sendem hem i kam back long Eratap mo stap live wetem brata blong papa blong hem JIF SAILAS, mo long taem ia kasem tedei mifala i neva pusum nose blong mifala long ol Properties blong ATU long Erakor from mfiala i save se mifala i no blad blong ATU.
  

Mifala i stap yusum graon blong Apu KIK nomo mo hemia blong Ati MASOK we tedei brata blong mi JACK KALMET i stap mekem QUARRY long hem long Eratap, mi stap pointemaot tu (2) samting ia:

- Apu KIK i givim name papa long JIF KALMET long son blong hem KALMETLAU
- Mama blong KALMETLAU i sentem bak son blong hem KALMETLAU i go bak long Eratap from hemi no pikinini blong Apu ATU.

• Mifala Family KALMETLAU i sentem bak son blong hem KALMETLAU i go bak long Eratap from hemi no pikinini blong Apu ATU.
  
• I stap soem klia se JIF i stap manupilate by different grup of pipol blong mekem KALMET FAMILY i stap brokbrok.
  

WITNESS N° 3 BLONG DEFENDANTS 'FAMILY KALTATAK MO FAMILY KALMETLAU: 'MAKFIN ANDREW'

• MANDRE ANDREW hemi fest born son blong ANDREW LAKLOKAI we hemi migrate i go long New-Caledonia mo live long wei.
• Mi, MAKFIN ANDREW second born son blong JIF ANDREW LAKLOKAI.
• Mi mekem statement ia blong klarem ol kiaman storie blong family blong Mifala Street long this court.
• Mi born festaem long MANTA mo JIF ANDREW KALPOILEP mo ol brata blong mi oli save se mi no man blong toktok. But mi shame tumas from mi neva harem storie blong Apu KALMETLAU se hemi pikinini blong Apu ATU mo toktok ia i no true.
  

FINDINGS BLONG COURT

✓ ANDREW BAKOA hemi no praktisem gud leadership blong hem towards ol pipol mo community blong hem long Eratap;
✓ Court i faenemaot se appearance blong ANDREW BAKOA hemi no reflectem Leadership blong wan Kastom Chief;
✓ Court i faenemaot se i nogat inaf communication bitwin ANDREW BAKOA mo FAMILY KALMET;
✓ Court i faenemaot se ANDREW BAKOA mo ol Family blong hem (KALMET) oli no work wan;
✓ Court i faenemaot se ANDREW BAKOA, FAMILY KALTATAK mo FAMILY KALMETLAU oli no wok tugether olsem bifo;
✓ ANDREW BAKOA hemi talem se FAMILY KALMETLAU hemi no bladline blong FAMILY KALMET. Hemi talem se FAMILY KALMETLAU hemi blad blong man Maewo which Court hemi faenemaot se statement ia hemi NO TRUE from i nogat inaf evidence;
✓ ANDREW BAKOA hemi talem se KALTATAK hemi no pikinini blong KALTONG, hemi pikinini blong RUTAU blong Erakor which Court ia hemi faenemaot se statement ia hemi NO TRUE from i nogat inaf evidence;
✓ Court i faenemaot se ANDREW BAKOA hemi nogat RESPEK long Court ia;
✓ NORRIS JACK KALMET (Spokesman blong tufala defendants) hemi talem se History we ANDREW BAKOA KALPOILEP hemi filem long case ia hemi wan niufala History inside long FAMILY KALTATAK mo FAMILY KALMETLAU;
✓ Court i fanemaot se FAMILY KALMETLAU hemi stret bladline blong KIK we i brata blong SILAS;
✓ Court i faenemaot se tufala defendants ia oli part long Family Tri blong FAMILY KALMET since 1800 kasem nowia;
✓ Court i faenemaot se FAMILY KALTATAK mo FAMILY KALMETLAU oli live long Eratap more than one hundred years (100 yrs).

DECLARATION BLONG COURT

Court ia hemi stap declare se:

• FAMILY KALMETLAU hemi stret bladline blong KIK we i brata blong SILAS;
• FAMILY KALTATAK hemi stret bladline blong KALTONG we hemi brata blong SILAS mo KIK;
• FAMILY KALTATAK mo FAMILY KALMETLAU oli stret bladline blong FAMILY KALMET.
  

COURT ORDER:

Court ia i stap mekem order olsem:

1. Tugeta parties i must respektem leadership blong each one;
2. Tugeta parties i must respektem kastom heritage mo rights blong each one;
3. Ol parties oli nogat raet blong treatenem mo no yusum ol rapis toktok towards each other;
4. Sipos any party ino agri wetem order blong Efate Island Court, hemi gat raet blong appeal within 30 days start from today 29th dei blong manis August 2014.
   

DIRECTION BLONG COURT:

FAMILY KALMETLAU mo FAMILY KALTATAK mo FAMILY BAKOA ANDREW oli must go back together long fasin blong Kastom blong mekem reconciliation blong kamback wan bageken olsem bifo within 30 days start from today 29th dei blong manis August 2014

Dated at Port Vila, this 29th day of August 2014

BY THE COURT

.............................................	.................................
Justice Ann Carlo (Presiding Justice)	Justice Harry Joshua
...................................................
Justice Eddie Karis