Was v Naliupis [2012] VUIC 10; [2012] VUICB 1; Land Case 01 of 1993 (6 July 2012)

IN THE SANTO/MALO ISLAND COURT
OF THE REPUBLIC OF VANUATU

Land Case No.1 of 1993

BETWEEN:

JIF KAVCOR WAS representative blong family mo decendants blong Waarlehe
Original Claimant

AND:

JEROM NALIUPIS representative blong family mo decendants blong Pur
Counter Claimant 01

AND:

PPETRO RITE representative blong family mo descendants blong Tul
Counter Claimant 02

AND:

FRED ISAIAH representative blong family mo descendants blong Nov Owei
Counter Claimant 03

AND:

FRANGO WARSAL representative blong family mo descendants blong Viel
Counter Claimant 04

Senior Magistrate Nesbeth Wilson – Presiding Magistrate

Justices: Chief Sam Vula
Chief Warwar Bani
Chief Ben Rovo

Clerk: Kollan Nicholas

NEM BLONG LAND CLAIM: SAKAU ISLAND

Bifor kot isitaon blong harem kes ibin kat short conference wetem ol parties long kes. Long taem ia kot iaskem ol parties sipos oli kat any objection long composition blong kot be everywan ihapi blong ol justice mo presiding Magistrate ia oli save sit daon long kes ia.

Kastom blong usim blong harem land kes ia

Kot ibin lukluk long kastom we bae kot ifolem long kes ia. Kastom we olgeta patis oli kat mo oli agri blong folem hemi man or bladlaen (patrilaenal) be ino woman (Matrilaenal) blong claimem kastom ownaship blong land ia. Mo storian we bae ol parties oli talem long kot blong pruvum se who nao iraet kastom owna blong land ia bae i kam aot nomo long kastom blong yumi long East Santo.

Komposision blong Kot

Long Amendment Act No.35 blong 1989, Parliament i bin pasem se anda long seksen 2 blong Aelan Kot Act, CAP 167, taem we Aelan Kot isitaon blong harem dispiut long land bae wan Magistret i mas sitaon wetem trifala Aelan Kot Jastisis. Anda long seksen 2(a) blong Act ia, wan Magistret olsem bae ino save sitaon sapos Jif Jastis ino kivim authoriti long hem. Folem hemia Kot i wandem talem long ol Patis se olgeta we oli deal wetem kes blong Sakao Island oli qualifae evri wan.

Brief history blong kes ia:

Samtaem long 1993 Family Kavcor Wass oli filem claim blong olgeta mo pem fees blong olgeta long kot long saed blong Island ia Sakao we hemi situated long East Santo. Island Kot Clerk hemi publishim notice blong land ia long wan manis according long law blong Island Kot Act CAP 167 long Order 6 Rule 8 mo 9. Family Jerom Naliupis mo Family Petro Rite, oli aware long land claim ia oli counter claimem land ia mo oli faelem kes blong olgeta mo pem fees. Kot isidaon long sometimes long year 1993 mo mekem decision long 7 July 1993. Afta long decision ia ikat appeal mekem se Supreme Court iorder se bae Island Kot imas harem kes bakeken.

Long manis June 2012 Island kot isit daon mo harem kes ia bakeken. Long tis taem ikat Family Fred Isaiah, family Yarit Wass mo Family Viel oli join tu olsem new parties long kes ia. Yarit hemi withdraw bakeken mekem se ikat five parties nomo ikohed.

Bifo kot iharem substantive case kot ibin explain gud long ol patis se land case hemi important long laef blong wanwan man we iting se ikat raet blong onem land ia mekem se ol patis oli mas andastand se hemi impotent se olpatis oli mas helpem kot blong kot ihelpem olgeta. Long Namba 18 June 2012 kot isidaon blong harem sabstance blong land kes ia.

History blong land we Representative blong Vister Waarlehe we Chief Kavcor Wass ipresentem:

Folem history blong family ia long smol island, Kavcor Wass iklem folem Deed of Sale mo hemi talem se oli shutum pupu blong hem Tul long Island ia. Hemi talem tu se pupu blong hem ibin live long Island ia long taem finis mo taem ikat ol faet itek ples long Santo main land ol man oli go long smol island long pupu blong hem. Hemi talem tu se pupu blong hem nao hemi last man blong livim Sakao Island mo hemi talem se Pastor David nao hemi tekem hem ikam long main land. Hemi se taem itekem hem ikam igivim hem wan ples blong stap long hem from se hemi no gat ples long main land.

Family tree

Long presentation blong family ia spokesman italem se history blong Sakao Island Family blong Kavcor Was hemi kat great great pupu man blong olgeta we emi Waarlehe we emi stap long Sakau Island long 1800s mo emi gat 3 pikinini blong hem; 1 Jif Waar, 2 – Jif Tul mo 3 – Jif Vsil. Out lo trifala brata ia ikat tufala brata family ilaef tru long tufala ikat Jif Waar mo Jif Tul. Jif Waar emi maretem wan woman we woman ia nem blong hemi Niwartul, tufala ibonem N'Warulu, N'warulu imaretem Sethy mo tufala ibonem Kocor mo Kocor imaretem Karpus mo tufala ibonem Loalty mo descendant blong hem.

Jif Tul hemi maretem N'waricet, hemi bonem Wass Kri, mo Wass Kri hemi maretem Lesi tufala ibonem six pikinini; 1 – Jif Kavcor Wass, 2- Willie Wass, 3 – Sam Wass, 4 – Wass Kri we hemi ded, 5 – Tom mo 6 – Lesi mo wetem ol pikinini blong olgeta mo descendants blong olgeta.

Mo Wass Pre emi maretem N'Warpere mo tufala igat 3 pikinini; 1 – Yarit Was, 2 – Kohor mo 3 – Konaret. Yarit Wass ibonem Roger Kee wetem brata mo descendants. Kohor ibonem Loyalty wetem pikinini mo descendants mo Konanet ibonem Simeon wetem Jif Abed mo descendants blong olgeta.

Family tree blong Waalehe hemi tru mo istret long kastom fasin long East Santo.

Pruvment of Evidence

Long taem blong wokabot hemi shoem natapua we Nov Owei ishutum bubu blong hem Tul long hem. Mo hemi shoem olfala village blong ol pupu blong hem mo tu hemi shoem haos blong brata blong hem Sam Was.

Custom Boundary

Hemi stap klem full island.

History blong land we Representative blong Vister Pur we Tony Naliupis ipresentem:

Jerom hemi klem through great great grand pupu blong em Vister Pur we hemi se ionem Sakau aelan. Hemi se Vister Pur imaretem plante woman, Jif Viel hemi rulum Sakau island after Jif Tul mo Jif Waar tufala ided. Wan dei Jief Viel emi tekem boy blong hem Nahan mo sam man Sakao oli ko long main land long Santo blong attendem bigfal kastom ceremony blo jif Nouel blong Levura mo sem taem presentem kastom danis blong Sakao. Nerm blong custom danis ia hemi "POL HAF" from emi blong Sakao Lathi, oli kolem "POLAF-ATI". Jif Viel mo olgeta man blong em oli pul lo canoue mo ko soa lon Champagn beach blo oli ko attendem ceremony ia mo oli danis custom through lo night gogo kasem day light lo morning taem oli stap redi blo ko bak long solwota blo ko bak long Sakao Island oli harem wan woman ia Arovre hemi krae mo wantem folem Nahan boy blong Jif Viel blo ko long Sakao mo bifo oli ko long Sakao Island ol brata blong Arovre oli talem long Nahan se hemi mas pem sister blong olgeta folem kastom, so oli karem 20 pigs long Jif Nouel olsem kaon blong oleta mo sem taem pemaot Arovre woman blong Nahan.

Folem history blong Jerom Naliupis iko olsem; Vister Pure mi maretem Anauck tufala ibonem wan boy nem blong hem Viel, Viel emi maretem wan woman nem blong hem Hargeuth tufala ibonem wan boy nem blong hem Nahan, Nahan hemi maretem wan woman nem blong hem Arovre tufala ibonem 2 pikinini gel, wan hemi Koput mo narafala gel emi Tio. Tio emi maretem Yerketh tufaala ino kat pikinini, mo Koput emi maretem wan man nem blong hem emi Petro, tufala ibonem olgeta pikinini ia. Ikat Stephane, Anna, Pierre, Regina, Sophie mo Jerom. Kot ilukluk to long hem mo fanem aot se istret mo itru history folem kastom long East Santo.

Family tree

Family tree blong Jeron istret mo tru folem custom blong Santo, from hemi claim folem pupu man Pur mo ikam daon lo Jif Viel mo kam kasem Nahan, mo after long Nahan emi bonem 2 kel be inokat boy. Blood ia ilaef tru long 2fala woman ia, wan ided mo narawan emi laef, koput emi nao generation ikam tru lo em mo olgeta istap folem woman.

Provement or Evidence

Long taem blong wokabaot wetem family ia long Sakau Island Kot ilukluk tu long ol pruvement insaed long Sakau, ikat ples blong kilim pig antap long hill, mo ples blong nakamal blong Jif Viel we hemi usum ol sem Nakamal.

Insaed long Purchase of Sale of the Island of Sakau ikat nem blong Viel tu istap insaed olsem Vendors.

Custom Boundary

Long hill igo daon long namele we wan woman isik long Lebrosy ikam kasem namele we hemi talem se wan woman ikranke long hem

History blong land we Representative blong Vister Waarlehe we Petro Rite ipresentem:

Histry blong Petro Rite emi stap claim or difendem raet blong Family blo em olsem custom ona blong Sakao or Lathi Aelan.

Family Tree

Family tree blong Petro Right iko olsem Waarlehe emi Maretem Nwartel tufala ibonem Vsil, Tul mo Waar. Tul hemi Maretem 2 woman Artithel mo Arsiliath. Tul mo Artithel ibonem Wascri. Taem Artithel ided Tul hemi maretem Arsiliath mo ibonem Anal.

Anal imaretem Rite mo tufala ibonem Pascal, Elisabeth, Georgina, Angela, Germaine, Vencent, Mikaella.

Pascal hemi maretem Anna we hemi sister blong Jerom mo tufal ibonem Petro wetem brata mo sister blong hem mo ol descendants blong olgeta.

Pruvument or Evidence

Lo aelan blong Sakao, emi shoem ples blong colectem wota, mo shoem ples mo nasara blong ololfala mo shoem ol banban tree blong danis, mo oli shoem ples we oli sutum Tul long hem mo basis blong olgeta.

History blong land we Representative blong Nov Owe we Fred Isaiah mo David ipresentem:

Folem history blong Family Nov Owe iko olsem, ikat wan olfala nem blong hem Nov Owe - papa blong Lol we emi Iako we istap talem long Fred se olfala Nov Owe mo woman blong em hemi blo Lathi mo tu mama blong hem Bisi emi bon long Lathi.

Family tree

Folem family tree blong Nov Owe, Nov Owe emi maretem wan woman nem blong hem Nwarucor, tufala ikat wan pikinini gel nem blong em Nwarthie, Nwarthie emi maretem Pastor David, mo tufala ikat 2 pikinini gel. Nwarheri hemi maretem Tho mo tufala ikat wan gel Kotho. Kotho nao emi maretem George Nial. Afta taem we Tho ided, Nwarheri emi maretem Ishaiah mo bonem ogeta ia Fred wetem ol brata mo sister blong hem.

Provement or Evidence

Folem prufment blong family Nov Owe, long taem blong wokabaot oli shoem spring wota blong drink mo cook. Oli shoem olfala village blong Nov Owe mo shoem Watch Hill blong Nov Owei long taem blong hide long trapol.

Custom Boundary

Folem custom boundary mark emi go long hill we igo daon, mo tekem iko lo East long Haos blong Sam Was.

History blong land we Representative blong Viel we Frango Warsal ipresentem:

Folem history blong family Viel oli klem great great grand pupu we emi Viel, Viel emi kat 2 brata. Lo sam yia we ipass tufala olfala blong olgeta italem lo olgeta se yumi stap live together long ples ia but umi kat sam difreren kraon tu oli stap. Mo taem long ol faet lo big aelan ol family oli ron we lo fight mo oli go hide lo smol aelan Sakao. Taem we fight ifinis ol family oli ko ko bak lo big aelan long Santo mo Viel nao emi stap lo aelan blo Sakao from se mama blong em italem aot se kraon blong olgeta long Lathi or Sakao.

Family tree

Folem Family tree blong family Viel iko olsem; tufala great great pupu blong family ia oli no save, be ikam daon lo Munune emi kat 2 brata mo 1 sister Kosot we emi maretem Vor, mo tufala ibonem wan gel Armasal mo Armasal emi maretem Tapur mo tufala ibonem 2 gel, wan nem blong hem Arocrosu mo wan hemi Kohe. Kohe imaretem Waskri mo tufala ibonem Arthaga. Arthaga imaretem Wasrei tufala ibonem Tiwok. Arocrosu emi maretem Riahove tufala ibonem Kotuel mo Kotuel imaretem Nohe, mo tufala ibonem Athie Selru, Arsele mo Argonate ikam daon lo ol decendants blong olgeta.

Provment or Evidence

Oli shoem hol blong stone we ol man oli haed long taem blong harican, oli shoem ples blong nakamal we ikat 3 stamba mango mo navele istap long hem.

Custom Boundary

Oli shoem end blong boundary mak we emi wan namele mo end boundary mark emi wan namele.

OBSERVATIONS MO FINDINGS BLONG KOT

Afta long ol samting we Kot italem hemia below olgeta findings mo observations blong kot: -

Findings:

Kavcor Wass

Folem everi toktok we spokesman Kavcor Wass ipresentem long Kot, wokabaot long island mo closing submission Kot imekem findings blong hem olsem: -

1. Kot ifaenem se pupu blong Kavcor Wass, Tul hemi man Sakao;
   
2. Kot ifaenem se Tul oli shutum hem lo Sakao Island;
   
3. Kot ifaenem se Nov Owei nao hemi bin shutum Tul;
   
4. Kot ifaenem aot tu se ibin kat three man isalem Sakao Island. Nem blong trifala man ia oli, Viel, Tul mo Waar, be ino Vsil olsem we igat fulap toktok long nem ia long Kot;
   
5. Kot ifaenem tu long conten blong Purchase Agreement italem klea se olgeta trifala man we iVendors oli sole owners and absolute master of the entire Island blong Sakao;
   
6. Kot ifaenem se conten blong Purchase Agreement ishoem se man we ipem Sakao hemi mekem agreement wetem conditions se bae ikat promis blong oli no faetfaetem olgeta folem dispute we istap mo tu se trifala man ia wetem ol direct descendants blong olgeta oli save gat raet blong mekerm garden or usum any part blong island ia;
   
7. Kot ifaenem tu se long Purchase Agreement hemi clear se three fala man ia oli Chiefs blong Sakao Island;
   
8. Above paragraphs ishoem klea se ino wan owner nomo be three;
   
9. Kot ifaenem aot long toktok blong every party se Nov Owei ibin shutum Tul long wan Natapoa tree;
   
10. Kot ifaenem se Natapoa tree we Nov Owei ishutum Tul long hem istap antap long hill;
    
11. Long saed blong family tree blong Kavcor Wass, Kot ifaenem se Waarlehe ikat three pikinini boy, wan ided mo two ilaef we igat olgeta generesens blong tufala.
    
12. Waarlehe, ikam daon long Tul, mo ikam daon long Wass Kri, mo ikam daon long Kavcor Wass wetem ol descendants blong hem we Kot ifaenem se istret mo itru.
    
13. Waarlehe, ikam long Waar, mo ikam daon long Nwarculu(gel) mo ikam daon long Kocor(gel)
    
14. Kot ifaenem se Fmily tree blong Wass Pere ikam daon long Yarit Was, mo Kocor, mo Konaret, mo N'warkovre wetem olgeta descendants blong olgeta istret folem kustom blong East Santo;
    
15. Kot ifaenem se history mo family tree blong Waarlehe ikam daon kasem Kavcor mo descendants mo Rocor mo Loyalty mo descendants blong hem istret folem custom blong East Santo;
    
16. Taem blong wokabaot long land Kot ifaenem se itru Natapoa we oli sutum Tul long em istap kasem tedei;
    
17. Kot ifaenem tu se ikat olfala vilij we istap;
    
18. Kot ifaenem tu long Sakao Island se ikat basis we istap hemi basis Lovoto;
    
19. Kot ifaenem se haos blong Sam Wass istap long North East blong Sakao Island.
    

Jerom Naliupis

Folem everi toktok we spokesman Tony Naliupis ipresentem long Kot, wokabaot long island mo closing submission Kot imekem findings blong hem olsem: -

1. Kot ifaenem se Chief Viel emi bin rulum Sakao Island afta we tufala narafala Chief ided, Chief Waar mo Chief Tul.;
   
2. Kot ifaenem se Chief Viel emi kat wan boy nem blong hem Nahan;
   
3. Kot ifaenem tu se ikat wan custom danis blong Sakao we oli kolem POLHAF-LATI;
   
4. Kot ifaenemaot se Chief Viel emi bin aot wetem ol man blong hem mo oli kam blo attendem wan custom ceremony blong Chief Nouel lo main aelan lo Santo, emia long Levura;
   
5. Kot ifaenem se afta oli mekem danis custom lo Levura wan woman iron we folem Nahan we hemi boy blong Chief Viel;
   
6. Kot ifaenem se taem woman is ironwe follem Nahan, Chief Viel emi mas faen lo ol brata blong em bifo oli livim main Island blo kam lo Sakao;
   
7. Kot ifaenem se Chief Viel emi fine lo 20 pigs lo ol brata blong woman ia Arovre;
   
8. Long saed long family tree Kot ifaenem se istart long Vister Pur mo kam don long Viel mo ikam daon long Nahan;
   
9. Kot ifaenem se Nahan emi masretem Arhove mo tufala ibonem Koput mo Tio;
   
10. Kot ifaenem se Tio emi no kat pikinini blong em, be Koput emi maretem Petro blong big bay mo tufala ibonem Jerome wetem descendants blong hem;
    
11. Long saed blong custom pruvmernt or evidence Kot ifaenem se ikat olfala vilij antap lo hill;
    
12. Kot ifaenem taem iwokabot long Sakao Island, se ikat wan hol blong ston we Chief Viel emi stap usum olsem nakamal blong em, or sevem olgeta lo taem blo hurricane;
    
13. Kot ifaenem ples blong drink mo cook we istap;
    
14. Kot ifaenem se insaed long Purchase of Sale of the Islsnd of Sakao ikat nem blong Chief Viel istap tu olsem Vendors;
    
15. Kot ifaenem se family ia tu ibin producum Purchase of Sale olsem evidence blong olgeta, mo document ia hemi sem document we original claimer hemi producum;
    
16. Kot ifsenem se ikat ol basis long Sakao Island;
    
17. Long saed blong boundary Kot ifaenem se boundary blong Jerome emi start long wan namele lo Lovoumal iclimb up hil mo ko narasaed sea mo narafala namele lo ples we woman isik Leprosy.
    

Petro Rite

Folem everi toktok we spokesman Petro Rite ipresentem long Kot, wokabaot long island mo closing submission Kot imekem findings blong hem olsem: -

1. Kot ifaenem se Family ia hemi difendem raet blong hem olem custom ona blong Sakao or Lathi Island;
   
2. Long saed blong family tree Kot ifaenem se Waarlehe ikam daon lo Tul mo Tule mi maretem Arsilath tufala ibonem Anal mo Anal emi maretem Rite mo tufala ibonem Pascal wetem ol brata blong em mo sista mo descendant blong olgeta;
   
3. Folem ol pruvument or evidence Kot ifaenem se ikat ples blong kolectem wota, mo olfala ples or nasara mo sam banban trees blong danis;
   
4. Kot ifaenem se ples we oli shutum Tul long em istap antap long hill long wan stamba Natapoa;
   
5. Long saed blong boundary Kot ifaenem aot se Petro hemi klem full Sakao Island
   

Fred Isaiah

Folem everi toktok we spokesman Fred Isaiah mo David ipresentem long Kot, wokabaot long island mo closing submission Kot imekem findings blong hem olsem: -

1. Kot ifaenem se Nov Owe hemi bin stap long Sakao Island bifo;
   
2. Kot ifaenem se Nov Owe nao ishutum Tul;
   
3. Kot ifaenem aot tu se Nov Owe hemi ko prison lo Fiji;
   
4. Kot ifaenem aot se family blong Nov Owe ilaef lo Fiji kasem tudei;
   
5. Folem family tree Kot ifaenem se Nov Owe emi maretem wan woman nem blong hem Nwarucor, tufala ibonem wan gel Nwarthie ikam daon lo Nwarhie ikam daon lo Kotho Nwarhie emi maretem Ishaiah mo bonem Fred wetem ol brata mo sister mo ol descendants blong olgeta;
   
6. Long saed blong pruvment or evidence Kot ifaenem se ples blong Nov Owe istap long em long Sakao Island;
   
7. Kot ifaenemaot we oli shoem ples blong drink mo cook blong ololfala bifo;
   
8. Kot ifaenemaot mo oli shoem ples blong watch hill blong Nov Owe long taem blong trouble;
   
9. Long saed long custom boundary Kot ifaenemaot se boundfary blong Nov Owe ifolem hil ikam daon mo ko long Watch Hill blong Nov Owe lo taem blo trabol emi lo South East iko antap lo North East blong aelan.
   

Frango Warsal

Folem everi toktok we spokesman Frango Warsal ipresentem long Kot, wokabaot long island mo closing submission Kot imekem findings blong hem olsem: -

1. Kot ifaenem se family Viel bifo oli stap lo family kraon blong olgeta emia Yekron;;
   
2. Kot ifaenem se sam yia ipas taem ikat faet lo big island lo Santo, ol man oli ron wei iko long Sakao then oli kam back long Santo;
   
3. Kot ifaenemaot se taem faet ifinis long Santo, Viel emi nomo kam back long Santo, emi stap nomo long Sakao Island;
   
4. Se Viel ia hemi sem Viel we hemi bin Chif mo tu hemi bin wan long olgeta we oli salem Sakao Island;
   
5. Kot ifaenem se Chief Viel ia hemi same Viel we istap long family tree blong Jerom;
   
6. Kot ifaenem se long taem blong wokabaot famili ia ishoem ol sem mark namele we Jerome ishoem long kot be ol story nomo oli no sem mark;
   
7. Long saed long family tree Kot ifaenem se family tree blong Viel emi through woman ia Kosot ikam daon lo Arsam Sam, Armasal ikam daon long tufala woman. Wan nem blong hem Arocrosu emi kam daon lo Koteul mo bonem Athie, Seulru, Arsela, mo Argonate mo desendants blong hem, mo Kotte ikam daon lo Arthaga mo bonem Tiwok wetem descendants blong hem;
   
8. Long saed blong ol puvmen or ol evidence Kot ifaenemaot se oli shoem sem ples blo Chief Viel mo ples blong haed lo taem blong hurricane I wan cave or hole blong ston.
   
9. Long saed blong boundary blong family ia Kot ifaenem se oli shoem sart blong boundary mark we emi wan namele mo iko antap lo hill mo igo lo narasaed long big sea.
   

Observations

Kot iluk olsem long storian blong family Viel we Frango Warsal hemi representem olgeta oli stap defendem Family Jerom;

Long lukluk blong Kot, Petro hemi stap storian iside wetem Kavcor Wass mo long family Jerom, sipos hemi klem folem bubu blong hem Anal bae hemi shud stap claim together wetem Kavcor Wass;

Long lukluk blong Kot iluk olsem long storian blong Fred hemi sidem storian blong hem igo long Jerom, from se storian blong Fred iconfirm se tufala family ia isave gud tufala;

Long taem blong ol question mo answers insaed long Kot, iluk olsem every witness oli no wantem answerem ol questions from se oli no wantem answer, or oli stap cross long ol man oli askem questions or oli stap fright long wan sam ting, or oli stap haedem olgeta. Sam questions we oli kam aot oli questions we witness isave nomo be italem se ino save;

Kot iluk olsem ol parties long kes oli save save olgeta nomo be oli stap denaem olgeta long kot. E.g. wan female witness istap answer ol questions insaed long kot iolsem se bae hemi no save mama blong hem bakeken;

After long wokabaot kot iluk olsem ol activities blong difdifren family we oli klem oli bin take ples around same ples nomo;

Long lukluk blong Kot Nahan hemi blong Sakao we hem tu iwitnerss long sale blong Island ia mo woman blong hem iblong Levura we ol nara Claimen tu oli confirmem;

Kot iluk mo wantem talem se after independence long 1980 under long Constitution we itok abaot land iko back long ol indigenous, mifala iwantem talem se Sakao Island now istap go back long indigenous land owners.

Declaration

Folem evri toktok ia mo ol findings mo observasions blong kot kot ideclare se kraon blong Sakao Island hemi divided long 2 Parts.

Fes part blong Sakao Island boundary hemi mark wetem narafala party, start long spring wota mo ko antap lo ples we oli stap collectem wota long stone mo iko antap folem boundary blong narafala partry ikasem big sea. Mo iko daon lon South East mo go antap lo North East blong aelan lo ples we haos blong Sam Wass istap long hem;

Part blong Island ia Kot idelarem iko long Family blong Waar mo Tul mo ol descendants blong tufala we hemi includem Kavcor Wass mo ol descendants blong hem, Petro Rite mo ol descendants blong hem mo Yarit Wass mo ol descendants blong hem.

Any development insaed long part blong island ia ol family ia oli mass harem between olgeta.

Second part blong Sakao Island long Noth West ikam long big Island mo tu central part blong Sakao long Basis we bot iko so long em lo haos blong Jerome ikam daon lo spring wota lo solwota mo ikam antap lo hill lo ples we ol ololfala oli stap kolectem wota long hem mo go antap long hill Lithivon lo ol oranis antap mo folem rod iko lo nangai mo ko daon lo big sea. Kot ideclrarem part blong island ia iko long family Viel mo ol descendants blong em, we hemi include Jerom Naliupis wetem ol descendants blong hem, mo Kosot wetem family mo descendant blong hem we ikasem Frango, mo Nov Owe wetem ol derscendants blong hem.

Any development insaed long part blong island ia ol family ia oli mass harem between olgeta.

Folem sekson 22 long Island Kot Act Cap 167 olgeta paties oli gat 30 deis blong appeal sapos oli no hapi long decision ia.

DATED at Port Vila this 6th day of July 2012

Sn. MAGISTRATE NESBETH WILSON Presiding Magistrate	CHIEF SAM VULA Justice
CHIEF WARWAR BANI Justice	CHIEF BEN LIVO Justice