Bangus v Tiasinmal [2010] VUIC 2; [2010] VUICB 1; Civil Case 16 of 2008 (27 September 2010)

IN THE MALEKULA ISLAND COURT
HELD AT LAKATORO/ MALEKULA
(Civil Jurisdiction)

Civil # 16/08

BETWEEN:

AIME BANGUS
Complainant

AND:

HERIBERT TIASINMAL

AND:

MALERENVANU

AND:

JANIQUE MALVANU

AND:

MALSOKLAI PIERRE

AND:

JACOBSON R. MALSOKLAI

AND:

PATRICK MALNAIM

AND:

SYLVERIO LIATLATMAL
Defendant

MATTER: DISPUTE OVER PARAMOUNT JIF BLONG SANALIU

Coram: Jastis Douglas Fatdal
Jastis Shema Tasvaille
Jastis Endy Shem

Clerk: Wendy W. Raptigh

JUDGEMENT

Brief backgraon:
Trial before long Court ibin tekem ples long manis May beginning 24th emia long Lakatoro. Igat 8 claimant evri wan mo oli blong North East Malekula.

Issue:
Whu ia nao istret blong tekem rank blong big/Paramount Jif blong Sanaliu?

Brief History blong claim blong ol claimant:
Original Claimant – Aime Bangus
Original claimant emi stap claim se long evri nasara long Sanaliu, Ameluwe nasara emi bigfala nasara we igat big Jif emi hed blong em. Bigfala Jif emi Jif Turatur mo OC emi stret blad laen blong em. Laef blad blong Jif Turatur em ikam kasem Aime Pierre.
Bigfala nasara blong Sanaliu bountry i kasem Rano mo Wala Island.

Counter Claimant 1 – Heribert Tiasinmal
CC1 emi claim se emi bladline blong Paramount Jif blong Sanaliu we emi Jif Nmalgaimari. Jif Nmalgamiari nao ilidim ol pipol blong em long Sanaliu mainland blong ko long Rano Island mo Wala Island mo mekem tufala nasara Amelsanaliu blong Rano lsland mo Amelsanaliu blong Wala Island.
CC1 emi claim se ikat 6 nasara long Sanaliu boundry long mainland. Long ol 6 nasara ia emi claim Amelnato mo Tonmalwer. Jif Nmalgamiari emi bigfala jif blong Tonmalwer nasara.

Counter Claimant 2 - Malerenvanu
Family Malerenvanu emi kleim se Amelvava nao emi bigfala nasara long Sanaliu. Bigfala Jif emi Tanmolmol I we emi big Jif blong Sanaliu mo kamaot long Amelvava. Emi claim se emi stret mo tru blad laen blong bigfala Jif, Jif Tanmolmol I insaed long bigfala nasara Amelvava long Sanaliu.

Counter Claimant 3 - Malvanu Sanix
CC3 emi claim se emi blad line blong Jif Lelenmal tru long wan payment blong wan pig Bormali wetem sam presen iko long family blong late Malvanu blong Vao.
CC3 iklem 2 nasara long boundary blong Sanaliu mainland Melnato mo Tonmalwer se Jif Lele-nmal emi big Jif blong tufala nasara ya.

Counter Claimant 4 - Pierre Malsoklai
Pierre Malsoklai emi claim blad laen blong Malvet kam kasem Malsoklei mo nasara blong Amelvava. Malsoklai ino kat wan pikinini boy.

Counter Claimant 5 - Jacobson R. Malsoklai
Jacobson R. Malsoklai emi kleim blad line blong big jif tru long adoption.
Adoption ya Jif Malsoklai imekem long nasara Amelsanliu long Wala Island mo ol man Sanaliu we oli stap long taem ya oli witnissim from se Malsoklai ino kat pikinini boy emi agri wetem Bangus blong adoptem Endour olsem pikinini boy blong em.
Emi kleim nasara Amelvava olsem smol faea blong bigfala nasara Ameluwe mo big Jif istap long Ameliwe.

Counter Claimant 6 - Patrick Malnaim
CC6 emi claim se igat bigfala Jif blong Ameluwe nasara. Emi no claim bigfala Jif blong Sanaliu be emi kleim se emi laef blad blong Morlo anda long Ameluwe nasara.

Counter Claimant 7 - Liatlatmal
CC7 emi no mekem iclear long statement mo toktok blong em concerem matter bifo long Court ia. CC7 emi no kleim paramount Jif blong wan nasara long Sanaliu, emi no kleim wan big nasara long Sanaliu mo emi no kleim eni laef blad blong eni Jif long ol nasara long Sanaliu. CC7 emi statemaot long toktok blong em se emi kleim Paramount Jif blong Portvalim we emi aotsaed long matter ia before long this Court.

Findings blong Kot:
Original Claimant
Claim blong em emi clear gud long statement blong em mo ol custom activity we emi performem long nasara Ameluwe.

Long Ameliwe Nasara (main land) igat wan pruf ston blong big Jif (Jif Turatur) mo wan nambe long top blong ston. Nambe oli usum blong kilim tamtam.

Ol ston long nasara Ameliwe igat emia we irepresentem Amelvava, Amelnike mo Amelnato. Original Claimant emi no reli save wanem mining blong Ameliwe.Original claimant emi soem ston blong sacrifice and ples we oli performem sacrifice long em
Emi soem Jinduwenbo nakamal pruf se emi registered anda long Ameluwe nasara.

Igat ol left over blong nakamal olsem ol bun blong ol man mo pig we oli stap yet mo buriel site mo skul blong Jif Turatur istap. Igat Ples we oli performem namangy long em be emi no sua hamas namangy ibin tekem ples long em. Preservation site blong snake basket we sam long ol nara claimants tu oli tokbaot istap. Positioning blong ol ston ipruf or reflectem nasara movement stat long Lawor ikam long Sanaliu mo go long Rano Island afta Wala Island. Ol nara customary performance mo historical sites oli soem sam long olgeta identity olsem ston blong rain, Man ston, Security ston, registration stone (no pruf), woman ston (no pruf), Custom rod blong bifo, two speaker ston we oli stanap long right mo left side blong big Jif mo main land pasis (Gisrennaberan) oli soem.

Long Rano Island (Sanaliu Nasara) Pasis we oli kam tru long em emi Sandior. Jif we ireceivem olgeta emi Batunmal blong Potumol nasara. Oli soem stone blong big Jif blong olgeta, same ston ia Original Claimant iklemem se emi blong Jif Morlo. Registration ston blong olgeta oli soem we oli registered long podamol nakamal anda lo nem Jinduwelil. Position blong ston emi reflectem movement blong olgeta ikam lo Wala Island. Claimant oli soem grave blong custom doctor – Maltutun. Building blong nasara blong olgeta ino finis, mo ino gat wan namangi ceremony ibin perform.

Long Nasara Sanaliu Wala Island Pasis we oli kam tru long em emi Lugerere. Jif we emi receivem em emi Jif Meltelur be long taem blong wokbaot toktok ijenis se emi Jif Tugtugkor. Ston blong bigfala Jif blong nasara oli soem wetem wan ston we iblong Welle. Ibin gat wan namangi ceremony we Jif Morlo I performem. Igat wan ston blong woman blong Jif Morlo we oli putum tu long taem blong killing blong namangi. Igat 2 ston blong spokeman blong Jif, long raet Jif Mataru blong Dansulsul nasara mo long left blong Jif Nibeloraor blong Tonmalwer nasara. Igat tu ol ston we irepresentem ol smolsmol nasara insaed Sanaliu long Wala Island. Igat grave blong Welle mo Morlo insaed long Jinduenbor nakamal, mo ston chair blong high Jif tu oli soem. Ibin gat wan ples tu behaen long nasara oli singaotem Lolame we emi special ples blong ol man nomo. Kot inote tu se Welle mo Bangus tufala ino performem namangi long Amel Sanaliu long Wala Island olsem we OC istap talem.

Long saed blong bladline generation blong Jif Turatur OC emi related long laef blad blong Turatur olsem we emi stap talem long statement blong em se emi tru blad line generation. CC4, Mr. Malsoklai Pierre istap confirm tu se Tjungmast ilaef blad blong Turatur. Line blong Tjungmast ikam daon kasem Welle mo Bangus Aime we emi Original Claimant. CC5 italem tu se laef blad blong Turatur ikam kasem Aime Bangus. Court inote se ino clear long family tree long saed blong Morlo ikam long Turatur mo kasem Aime Bangus mo tu Bourigine ino oldest brata blong Bangus be emi youngest follem line generation. Fes witness Jif Grace Maltape from nasara Ameltra Rano Island ikam confirm se laef blad blong Tjungmats emi Simo, boy blong Bangus we emi descendant blong Turatur.

Counter Claimant 1
Court inote se long statement blong CC1 emi claim se ikat six nasara long Sanaliu bountry long main land: Nasara Melnato, Nasara Tonmalwer, Nasara Ameluwe, Nasara Amelnike, Nasara Tansulsul, Nasara Amelvava mo tu igat tu Nasara Amelsanaliu wan long Rano Island mo narawan long Wala Island.

Long ol six Nasara ya Jif Taribo ikilim six namangi faol long niu nasara ya Amelnato mo jif Merenmal mo boy blong em Nbeloraor ikilim tu namangi long Tonmalwer.

Long nasara Ameluwe statement italem se Jif Toutoun emi statem mo nemem nasara ya Ameliwe we emi nasara blong spika blong big Jif mo smol faia blong big nasara Tonmalwer. Long nasara Amelnike statement italem se Jif Nivet nao emi founda blong nasara ya Amelnike Jif Nivet pikinini blong em emi Jif Turatur.

Long nasara Ameltansulsul statement italem se Jif Mataru nao ibuildim nasara ya Ameltansulsul mo nasara ya emi smol nasara blong Ameliwe we inomo kat man ilaef long em nao ia.

Long nasara Amelvava statement italem se Jif Merenmal I instraktem Malsoklai blong buildim nasara ya Amelvava. Emi nasara blong Army blong big Jif blong Sanaliu. Long tufala nasara Amelsanaliu long Rano Island mo Wala island statement italem se Jif Nmalgamiari wetem ol pipol blong em oli mekem Amelsanaliu long Rano island mo wala island.

Amelnato court ifinemaot se nasara ya ino wan big nasara from long statement italem se pipol ikam pante blong live long Amelnato be lukluk long size blong nasara emi smol long statement ino talemaot se ikat six namangi long Amelnato be long taem blong visit court I harem se ikat six namangi faol. Kot iwantem talem tu se long statement blong CC1 italem se taem pipol oli muv blong kam long Amelnato oli muv wetem sam animal. Court iwantem talem se sipos iolsem bae imas gat pig killing ceremony long namangi bae ino faol killing.

Court iwantem talem se long save blong wan namangi yes isave kat namangi faol long stating blong em. Long ol next namangi iko kasem six ia isut be namangi pig from itekem sam years blong preparem wan namangi. Court iluk ston ya Nmelwrerel istap long nasara Amelnato istret olsem we ol nara claimant oli talem.

Nasara Tonmalwer court ifainemaot se yes ikat tu namangi ikil long Tonmalwer be nomo ston blong tufala ino clear long Court. Ikat jea ston blong Merenmal mo jea ston blong Nebal. Court ivisitem royal grave blong Nebal mo nakamal blong Tonmalwer nasara.

Court iwantem respon blong talem se imight tru se Tonmalwer nasara emi nasara we man imuv from Melnato ikam buildim Nasara Tonmalwer be taem Court ivisitim nasara ifinem se nature mo shape blong nasara ino soem se iwan big nasara from ol ston blong nasara ino stap long order mo ino kat ol representative ston blong ol nara nasara long Tonmalwer.

Long nasara Ameluwe, Court ifinem se CC1 italem se nasasra Ameluwe emi spika blong Jif be nomo emi no explenem sam ston insaed long nasara mo wanem ol wok we nasara ya istap mekem blong prufum long Court se emi nasara blong spika blong big jif. Ikat ston blong Jif ya long medel ol laen ston long raet mo left, CC1 mo witness blong em ino save explenem.

Long nasara Ameltansulsul CC1 Court ino visitim nasara ya mo ino kat any explanaesen long em. Long Nasara Amelnike tu court ino visitim.

Long nasara Amelvava olsem we CC1 italem se nasara Amelvava emi nasara blong army blong big jif we istap long Tonmalwer. CC1 ino save explenem long Court sam ston long Amelvava we isoem se emi nasara blong ol army.

Long nasara Amelsanaliu long Rano island Court ifinem se yes ikat ol ston we isoem se emi wan nasara. Court ivisitim nakamal Jinduwelel, Court ifinem se nakamal ya emi blong Jif Samson Peter. Court ino tekem ol toktok blong Jif Samson Peter from emi no olsem wan witness long Court.

Court iwantem talem se taem Jif Nmalgamiari itravel iko cross long Rano Island emi travel wetem ol pipol olsem Mataru, Tiasinmal, Malep, Terenmal, Morlo, Malsoklai mo Meltekuguasi. CC1 ino prufum long Kot ol ston blong olgeta long Amelsanaliu long Rano Island. Court iwantem talem tu se taem yu kilim pig long namangi blong tekem wan high rank blong Jif bae yu no save kilim namangi blong faol. Court ifinem tu se ol nature mo shape blong ol ston blong CC1 long nasara oli no inline wetem ol nature mo shape blong ol ston blong Tonmalwer long main land.

Long nasara Amelsanaliu long Wala Island, Kot ifinem Jif blong Awop Jif Yuyoran ibin risivim Jif Nmalgamiari wetem ol pipol blong em taem oli ko cross long Wala Island. Taem Kot ivisitim nakamal Jinigawomu ikat grave we iblong tufala jif ya Jif Nmalgamiari mo Jif Tiasinmal be nomo hed blong tufala inomo stap long ples ya.

Court iwantem talem se folem ol explanation blong ol ston long nasara, ol nakamal mo ol grave Kot iwantem talem se ol nature mo shape blong ol ston ino semak wetem ol ston long Tonmalwer mo Amelnato long mainland mo shape blong nasara idifren long nasara long mainland. Klosap evri claimant oli kleim sem nakamal Jinigawomu wetem ol ston we oli stap insaed mo outsaed long nakamal. Court iwantem talem tu se olgeta pipol we oli kam long Wala Island blong buildim nasara Amelsanaliu oli kat wanwan ston blong nasara. Kot ibilif se ston blong big Jif oltaem imas stap long middle blong nasara. Ol ston we istap long tugeta side isoem se wan wan nasara long Sanaliu mainland oli kilim namangi long Amelsanaliu long Wala Island. Be igat wan paramount Jif we ikamaot long wan big nasara long Sanaliu mainland ihedem olgeta blong buildim nasara Amelsanaliu long Wala Island.

Long statement blong CC1 emi claim se olgeta ikamout long wan snake rope. Fes man ya Bou ikamot long rope ia wetem woman blong em Rururu. Stat long Bou kam kasem Giovani ikasem 16 generation.

Kot ifinem se ol muvmen blong ol man bifo okam kasem generation blong tedei ilong taem tumas from taem kot ivisitim ol wanwan nasara ifinem se ol nasara oli olfala mo sam long ol ston oli nomo save stanap mekem se oli foldaon. Blong yumi statem wan history long beginning bae ino possible.

Court ifinem se long Amelsanaliu long Wala island bae ino posible blong ston blong paramount istap olsem las stone or fes stone long nasara. Tufala las ston we istap long raet mo left saed blong nasara emi tufala ston blong smol faea mo semtaem olsem tufala security stone blong nasara.

Counter Claimant 2
Long Amelvava Nasara (mainland) Court emi finem se igat olgeta samting ia: site blong nakamal Nasumsimilili, igat wan custom singsing about nakamal Nasumsimilili, igat grave site blong Tanmoulmoul 1 mo Turatur, igat wan common nakamal site nomo we big jif wetem ol smol nasara jif oli share tugeta nomo, ino gat royal head skul, mo ikat site blong public bury ground. Kot inote tu se ston blong big Jif ino stanap emi silip, ston blong soem muvment blong nasara we ikam long Lawor mo go long Rano island ino kat. Ikat 5 namangi ikil pruf emi ol 5 ston we istap. Ino gat ston blong ol smol nasara we oli represented long Amelvava nasara. Ino gat eni registration ston insaed long Amelvava. Ino kat wan ston isetifyem muvment blong nasara long melvava we iko daon long Loloptef. Distance blong movement emi abaot 300m from Melvava to Loloptef. Pasis blong Nasara Amelvava emi Aim Sanaliu. Ino gat ples blong toty blong nakamal Jiniuwopun. Ikat hol blong ston we emi hol blong snake long pasis Tespory nem Jidimagemuraibo. Nem blong olfala we iownem snake ia emi Taliwon, we CC2 emi no bin statem long statement blong em. Ikat confermation blong custom singsing we italemaot se nasara Tonmalwer inomo kat man long em be bae ifulap long spider web.

Long nasara Sanaliu long Rano Island arrival pasis emi long Pongsine, ikat site istap, Jif we irecif emi Jif blong Potamol tribe mo oli registered long Nabironletin nakamal. Igat ston blong jif istap emia long left hand saed be ino gat eni namangi performance.

Long nasara Sanaliu long Wala Island pasis we oli kam tru long em emi Jinorvet pasis wetem wan ston we emi markem pasis area. CC2 emi soem site blong nakamal we oli register long em long Nasara Sanaliu long Wala Island we emi nakamal Jinigawopun. CC2 ibin soem buriel ples blong Malerenvanu mo Malsoklai mo tu public bury graon. Ikat wan tamtam we CC2 isoem tri ston blong Jif Malerenvanu mo behind emi Malsoklai. CC2 ise ibin gat 2 namangi ikil be ino kat eni pruf blong ston. Emi clearly talem ol ston long nasara long right, Tonmalwer long end then Malgigani blong Pelut, Malretsrets blong Pelut, Tierenmal blong Sanaliu, Malerenvanu, Gulgultin mo long left Mataru blong Tansulsul, Malep blong Ameliwe, Meltekugasi blong Amelnike, Metror blong Sanaliu mo Setsets blong Ameliwe long end. CC2 emi bin soem tu narasaed ston we emi blong ol woman oli kolem Tweletan. CC2 ibin soem tu long Court grave ston blong Tanmoulmoul 2 long nakamal pogsine be ino stap long nakamal blong Aim Sanaliu long Wala island.

Court inote se family Malerenvanu emi laef blad blong Tanmoulmol 1. Ino bin kat wan claimant long Court we idisputem emia.

Counter Claimant 3
CC3 emi no explenem ol samting long tufala nasara we emi stap kleim be long biliv mo andastanding blong em emi talem se big Jif Lele-nmal ikilim namanki long tufala nasara ia Melnato mo Tonmalwer. CC3 emi klem se Jif Lele-nmal emi fes faea blong nasara Amelsanaliu long Wala Island mo emi fes faea blong Amelnato mo Tonmalwer long Sanaliu menlan.

Kot ifinem se Joseph Malkat emi no stret bladline blong Jif Lele-nmal emi kam nomo follem wan payment we Jif Lele-nmal imekem long family blong late Malvanu.

Counter Claimant 4
Kot iluk long statement mo famili tree blong Pierre Malsoklai mo finem se CC4 ino talemaot se Jif Malsoklai ibin pem wan mama nem Noni wetem pikinini blong em long 30 pigs.

Finding blong Kot long blad laen blong Pierre Malsokali Kot iluk se bladline blong Malvet ikam finis long Malsoklai from Malsoklai ino gat wan boy. Kot ikam blong save se Philip we Pierre Malsoklai iputum long family tree blong em emi no stret blad line blong Malsoklai. Philip emi pikinini blong man ya Siyauli wan man Wopu. Witness 1 nao italem long Kot ol truth aboat Philip.Court ifinem tu se ikat tu Malsokali we tufala iclaim blad laen blong Malsoklai. Tufala man ya Malsoklai ibin pem tufala blong kam olsem pikinini blong em. Tufala payment ya ino kat wan kot decision blong talem whu long tufala no istret blad laen blong Malsoklai.

Kot iharem se family Pierre Malsoklai oli klem nasara ya Amelvava olsem wan big mo fes nasara long boundary blong Sanaliu. Taem Kot ivisitim nasara Amelvava ifinem se ol ston blong nasara Amelvava bae ino wan man ibuildim nasara ya from ol ston oli big wan mo oli pante. Fomesen blong nasara iluk olsem se plante tribe oli contribute blong buildim nasara Amelvava. Kot iharem se CC4 ikat 5 ston blong namangi mo kat ston chair blong big Jif Malvet ikat tu, security ston.

Long Rano Island Court ifinem se ol ston blong nasara Amelsanaliu long Rano oli no semak long ol ston blong Amelvava long Sanaliu mainland.

Long Wala Island Kot ifinem se ikat ston blong Jif Malsoklai long nasara Amelsanaliu sem ston we CC5 ibin klem se emi ston blong Malsokali. Kot ivisitim nakamal we emi sem nakamal we sam long ol claimant oli se I nakamal blong olgeta. Court ifinem tu se nasara Amelsanaliu long Wala Island iwan sanaliu community nasara from evri man Sanaliu we iout long mainland oli kam long wala island oli kat ston long Amelsanaliu nasara. Be igat wan paramount Jif we I kamaot long wan big nasara long Sanaliu mainland ilukaotem olgeta mo ilidim olgeta blong buildim nasara Amelsanaliu.

Counter Claimant 5
Kot ifinem se long statement blong CC5 emi no talem long Kot wanem pruf nao Malsoklai imekem blong adoptem Endour.

Kot ifinem tu se ikat tu separate payment blong pem tu separate man ikam long family Malsoklai be nomo ino gat wan Kot disisen blong talem whu long tufala ya nao istret laef blad payment ikam long family Malsoklai.

Kot iharem statemen blong Jacobsen se emi claim nasara Amelvava from emi se Amelvava ismol faea blong big nasara Ameluwe mo paramount istap long Ameluwe.

Court ifinem se nasara Amelvava emi wan smol nasara long Sanaliu olsem we CC5 italem long Court. Court ifinem se ino gat ol wan wan nasara representative ston long nasara Amelvava be igat nomo long big nasara Ameliwe. Court iharem tu se CC iconfirmem long visit se Ameluwe nao ibig nasara blong Sanaliu.

Long nasara Amelsanaliu Rano Island taem Kot ivisitim Amelsanaliu long Rano Island CC5 ikam blong supportem nomo ol toktok blong Original Claimant Bangus long ol ston mo talem se nasara ia no wan complete nasara.

Long nasara Amelsanaliu Wala Island Kot ifinem se ston we CC5 iclaim emi sem ston we CC4 iclaim. Kot iharem se ston blong Nmalgamiari Tonmalwer emi las ston long left mo ston blong Mataru Tansulsul long raet tufala ston ya istap olsem security blong big Jif long nasara. Court iharem tu se ston blong Jif Malsoklei nem blong em long kastom emi Kolkoltim.

Counter Claimant 6
Long Ameluwe nasara (mainland) CC6 emi pointem stret ston blong Morlo we isilip long northern part we emi left saed blong nasara. Emi talem tu se emi no save whether Morlo emi wan big Jif or no be emi save se emi wan Jif. Ston we CC6 emi kleim igat wan different nature long ol narafal ston insaed long Ameluwe nasara. Emi nomo talem eni narafala toktok or storian long eni activiti insaed Ameluwe.

Long nasara Sanaliu long Rano Island CC6 ino save conferemem stret ston blong Morlo long Sanaliu nasara long Rano island even whu ia irecifim em emi no save.

Long nasara Sanaliu long Wala Island CC6 isoem pasis we Morlo ikam long em we emi Lugerere pasis. Whu ia irecifimem mo wanem custom activitiy emi performem ino clear long Court.

CC6 emi confirmem se emi stret laef blad blong Morlo. Fes witness emi confirmem se pikinini blong Morlo emi Isaac. Namba tu witness Jean Louise Kombe blong Ameltra Nasara emi declarem se em nao nasara blong em irecifim nius long Melesiu se wan woman Melesiu ikat bel mo Naurel Sanaliu imas go talemaot long Morlo se pikinini ia iblong em. Pikinini ia emi Isaac we emi descendant blong CC6. Long evri claimant ino gat wan idisputem laef blad blong Morlo agensem CC6.

Counter Claimant 7
CC7 emi talemaot se emi kleim Paramount Jif blong Portvalim we emi rule ova long area blong Sanaliu.

Court blong tedei ia emi stap notem se CC7 claim blong em ino inline wetem case ia nao ia before long Malekula Island Court.

Law we Court I applaem:
CAP 167 (s.10) – Application of customary law

Subject to the provisions of this Act, an island court shall administer the customary law prevailing within the territorial jurisdiction of the court so far as the same is not in conflict with any written law and is not contrary to justice, morality and good order.
Translate:

CAP 167 (s.10) – Kot hemi mas applaem kastom
Subject long seksen blong Act ia, aelan kot hemi mas aplaem kastom we istap insaed long eria blong paoa blong hem, spos oli no gat conflict wetem eni loa we oli stap raetem, mo no gat konflik tu wetem jastis, morality mo gudfala orda.

Apply Law igo long fact:
Court emi tekem decision follem customary system blong titlelism long each area customary way.

Long this fala case Court ifinem se area in dispute blong Jifly taetol emi base long customary bladline system, meaning se taetol blong Jif emi inherited tru long laef blad.
Long case ia emi laef blad blong Jif Turatur.

Decision:
Court irule blong talem se Sanaliu emi wan boundry em wan mo Portvalim emi wan boundry em wan.

Ameluwe emi big nasara blong Sanaliu mo big/paramount Jif emi Jif Turatur we ilaef tru long bloodline blong Original Claimant.

Court istap declarem se Original Claimant Aime Bangus emi tru Paramount Jif blong Sanaliu mo tufala nasara Amelsanaliu long Rano island mo Wala island tufala istap andanit long authority/ power blong bigfala nasara Ameluwe long Sanaliu mainland.

Dated long Lakatoro this 27th dei blong September, 2010.

Before:

Jastis Douglas Fatdal

Jastis Shema Tasvaille

Jastis Endy Shem