Farasia v Yona [2004] VUIC 12; [2004] VUICB 2; Land Kes 09 of 1993 (18 March 2004)

IN THE EPI ISLAND COURT OF
THE REPUBLIC OF VANUATU
HELD AT ROVO BAY, EPI
(Lan Jurisdiction)

Lan Kes No 09/1993

BETWEEN

WILLIAM N. FARASIA
Ngala Velej, Epi
Original Kleiman

AND

SALKON YONA
Mafelao Velej, Epi
Kaonta Kleiman No. 1

Coram: Justice Avio JACK
Justice Billy SAKSAK
Justice Morris JACK
Magistrate Jerry BOE

Clerk: Shemi JOEL

Nem blong Graon: Erai or Rakava.

Tufala pati everi wan I kam long Kot.

Epi Island land Kot ibin staon long Namba 15 March, 2004, hemia long Rovo Bay, Epi. Kot ia ibin staon blong harem wan dispiut betwin tufala parties ova long wan eria blong lan we oli kolem Erai or Rakava. Tufala partis ia hemi William N. Farasia olsem Original Kleiman mo Salkon Yona olsem fes kaonta kleiman. William N. Farasia istap talem long kot ia se hem nao hemi kastomari lan ona long graon ia we igat tri pat long hem. Hemia igat:

1. Dendum,

2. Bormande, mo

3. Lemam.

Ol graon ia everi wan istap insaet long bigfala eria we oli kolem Erai or Rakava. William N. Farasia hemi stap talem se baondari we hemi stap kleimem hemi stat long wan ae blong wan drae krik we ikam aot long Big Bay mo ifolem iko antap kasem wan ples we oli kolem Lemam. Long ples ia krik ia itanem long saet blong ol hil mo iron iko antap kasem long stampa blong wan hil we oli stap kolem Bomare, mo itanem bakeken folem krik blong wota we iron ikam daon long Ngala mo ifinis klosap long wan poen we ikasem solwora klosap haos blong William N. Farasia.

Insaet long bigfala baondari ia igat trifala eria ia we hemi,

1. Dendum,

2. Bormande, mo

3. Lemam.

Ol Jastises we oli staon blong harem land kes ia.

Igat trifala Island kot Jastises we oli staon blong harem land kes ia. Igat tu wan Magistret we istaon wetem olgeta. Hemia Lo istap talem anda long Island Kots Act, CAP 167 se everi dispiut long lan bai imas kat trifala Island Kot Jastises mo wan Magistret imas staon tugeta mo harem lan kes ia. Desisen we mbai ikam aot long kes mbai decisen we everi Jastises mo Magistret nao oli mekem.

Wanem samting nao Kot Istap lukluk long hem taem hemi mekem desisen.

Igat plande samting we kot istap lukluk long hem blong jajem ol lan dispiut olsem. Fesfala samting nao se mbai Kot ia ino mas usum lo blong ol waet man or written lo blong mekem desisen blong hem. Wanem we Kot ia istap wantem harem hemi kastom storian blong wanwan parti. Long saet ia kot iwantem harem hao nao pati ia istap klemem graon ia. So kot iwantem lukluk wanem blad laen nao pati igat. Hemia iminim nomo se pati ia imas soem ol pupu blong hem mo talem hao nao blad laen ia ikivim raet long hem blong hemi onem graon ia. Hemi mas soem tu, sapos hem igat, ol nasara, kreve, nakamals or ol olfala vilijes we ol pupu blong hem oli stap long hem bifo finis ikam. Mo tu hem imas soem se long taem finis ikam ol pupu blong hem oli bin stap wok long ples ia olsem planem ol kokonas or mekem sam divilopmen long ples ia. Hem imas soem tu se raet ia we hem istap kleimem hemi karem aot long wan jif or wan man we hem nao iona long graon ia.

Hem imas soem tu se igat samfala kastom seremonis we ol man ibin witnesem long taem we wan man ikivim aot raet ia iko long wan man. Hem imas soem tu se ibin gat sam exchenj blong ol gifts mo toktok long taem ia we man ia ibin kivim aot raet ia. Mo tu se man ia we ikarem aot raet ia imas soem through long evitence blong hem se man ia we ibin kivim hem raet hem ibin stap lukaotem hem koko hemi tet. Sapos raet blong wan kleiman ibase long adopsen, then man ia imas soem se ibin gat wan seremoni we itek ples blong soem se pikinini we oli adoptem hem bambai ino save ko bak long nasara we hem ikam aot long hem. Hem imas soem tu ol witneses we oli luk adopsen seremoni ia ino imas tekem ol independent witneses ikam talem aot long kot. Man ia imas talem tu se wanem blad koneksen nao hem igat wetem man ia we iadoptem hem. Hemia ifolem nomo kastom se sapos wan man ino gat wan pikinini boe then hem imas adoptem wan we ikam aot long sem blad laen or famili be ino pikinini olbaot.

OL EVITENCE BLONG OL PATIS

Evitence blong William Nehemiah Farasia

Long saet blong William Nehemiah Farasia, Don Nehemia, we hemi pikinini blong William Nehemia Farasia, hem nao istap olsem spokesman blong famili Nehemia. Long fas toktok blong Don Nehemia, hem istap talem se hem igat trifala ples we hem istap mekem kleim long ol. Faswan hemi Dendum, we istap insaet long eria blong Erai lan. Spokesman istap talem se hem istap kleimem eria ia folem nomo wan kastom raet we jif Bob Masing mo tufala piknini blong hem, Willie mo George, ibin kivim aot long trifala jifs blong Puwalita. Olgeta ia igat Jif Taribo, Jif Kurenia mo Jif Joseph Kangurnania. Spokesman italem se Jif Bob igat wan boe we nem blong hem hemi Willie. Willie hem ibin maretem Naomi we hemi Sista blong Jif Joseph Kangurnania. Tufala ia tufala ino gat any piknnini mo taem Jif Bob Masing itet, Jif Willie mo woman blong hem Naomi, mo George olgeta everiwan iko stap long Evigeal we hemi stesen blong trifala jifs ia. Long taem ia, Spokesman italem se Jif Willie istat blong sik mo italem long woman blong hem mo of famili blong hem se bae oli ko karem aot kapa blong joj haos blong olgeta we istap long Dendum mo kasem iko antap long Evigeal. Olgeta ibin mekem olsem Jif Willie italem mo oli stap long Evigeal koko trifala jifs ia oli tet mo oli berem olgeta long Evigeal.

Spokesman italem tu se long tet blong olgeta trifala jifs ia, Jif Willie Bob Massing ikirap ikivim raet blong graon blong Dendum mo Nitawe, Ngao mo Kapo iko long tawian blong hem we hemi Joseph Kangurnania mo Ikurenia mo tufala ia nao iholem raet ia koko Ikurenia itet. Spokesman italem se taem we Iukurenia itet, Jif Joseph Kangurnania ites kivim ful raet ia long William Farasia blong hem ikam kastom ona blong graon ia Dendum.

Raet ia Jif Joseph Kangurnania ikivim aot long 13^th August, 1983. Spokesman italem tu se long taem ia Jif Joseph Kangurnania ikivm wan kastom nem tu long hem we hemi "Tom". Spokesman italem tu se long taem ia hem ibin mekem wan kastom seremoni folem nomo desisen we kam aot long Tarbumamele Kaonsel blong ol Jifs mo Varsu kaonsel blong ol Jifs. Spokesman istap talem tu se baondari blong Dendum we Jif Joseph Kangurnania ikivim long hem istat long Kapo, stret long haos blong hem (Spokesman) mo iko kasem drae krik long wan ples we oli kolem Nelick. Spokesman istap talem se graon ia istap long Varsu Eria be ino longVermaol.

Spokesman istap talem tu se kastom seremoni we hem ibin mekem iko long Jif Kangurnania plande man mo woman Ngala, Mate mo Leba oli bin witnesem mo kakae long seremoni ia. Tedei, Spokesman istap talem se inomo gat man bakeken we ilaef tedei long Dendum. Everiwan oli ted finis mo las raet ia nao Jif Willie ipassem ikam long Jif Joseph Kangurnania mo Jif Kangurnania ipassem ikam long William Nehemiah Farasia.

Spokesman italem tu se ibin gat plande raorao ibin stap. Folem hemia ibin gat wan miting long 12^th June, 1988, long Ngala we eria kaonsel blong ol jifs ibin staon blong lukluk long raet ia. Long taem ia Jif Kangurnania hem wan ibin talem aot long miting se hem nao ikivim kastom raet ia iko long William Nehemiah Farasia long 13^th August, 1983. Long taem ia igat 17 Jifs everiwan we ol ibin witnisim mo harem toktok ia. Long rikot blong miting ia we oli sabmitim ikam long kot isoem se olgeta Jifs ia nao oli bin witnisim toktok ia:

Jif John Robert - Nivenue Velej

Appie William (Secretary) - Nikura Velej

Jif Reuben Farasia - Nikaura Velej

Jif Iopa En - Nivenue Velej

Jif Kila - Nuvi Velej

Jif Daniel - Tavio Velej

Jif Keliu - Tavio Velej

Jif George - Nikaura Velej

Jif Talmakura - Moriu Velej

Jif Alick Semol - Ngala Velej

Jif Lui E. - Lepa Velej

Jif James L - Lobalis Velej

Jif Joel Tailui - Mate Velej

Jif Melang (VP councellor) - Nikaura Velej

Jif Sam Ansen - South Epi

Jif Robert - South Epi

Namba 2 graon or ples we William Nehemiah Farasia istap kleimem hemi graon ia we oli stap kolem Bamande or project Lan. Hem istap talem se hemi stap kleimem graon ia folem nomo raet we wan olfala we nem blong hem hemi Harry Mankio ibin kivim long hem bifo hem itet long 1970. Jif we hemi kivim aot raet ia long graon ia Bamande hemi Jif Semataso mo pikinini blong hem we hemi Niala mo oli bin stap long wan stesen we oli stap kolem Buribara. Spokesman italem se taem we Niala itet igat trifala olfala we oli berem hem. Olgeta olfala ia igat Harry Mankio, David mo Lango. Forom resen ia nao jif Semataso ibin pasem aot kastom raet ia blong Bomande graon iko long Harry Mankio. Spokesman italem se afta olfala David mo Lango itet, Harry Mankio hem wan nomo ilaef istap long Lemam mo long taem ia Bomande ino gat man long hem. Forom risen ia nao hem wan nomo istap lukaotem raet blong Bormande mo Lemam.

Spokesman ikontinue blong talem se taem olfala David mo Lango tufala itet Harry Mankio, hem wan nomo istap long bush. Wan taem hemi sik bikwan mo hemi sendem toktok iko long William Farasia blong ko karem hem ikam taon long haos blong hem. Spokesman italem se hem nao wetem papa blong hem oli bin ko karem hem mo kam daon long haos blong olgeta. Afta long wan manis taem we hemi stap wetem olgeta hemi harem se bai itet mo hem isingaotem sam man blong kam witnesem las toktok blong hem blong kivim aot kastom raet ia blong ol graon we hem istap lukaotem. Spokesman italem se long taem ia igat ol witneses wo oli bin lukim mo harem wanem we olfala Harry Mankio ibin talem long Nehemia William. Toktok we oli harem ikam aot long mouth blong Harry Mankio nao se kastom raet blong tufala graon ia Bomande mo Lemam hem ipasem or kivim raet ia iko long han blong William Nehemiah Farasia. Olgeta witnises ia igat Elder Willie Kora, Jif Keliu, Enaio, Gideon, Ian Silas, Tomas mo William George mo of famili blong William Nehemiah Farasia. Spokesman italem tu se afta hemi mekem toktok ia wan week afta hemi tet mo oli berem hem long graon blong olgeta mo William Nehemiah Farasia imekem kastom seremoni from beri graon blong hem folem toktok blong ol Tarbumamele kaonsel blong ol jifs.

No. 1 witnes blong Original Kleiman: Jif Iona Enaio Atai.

Fesfala witnes blong William N. Farasia hemi Jif Iona Enaio Atai. Long stetmen blong hem hemi stap talem se kastom raet we William Nehemia Farasia istap kleimem hemi stret nomo long kastom blong olgeta long aria blong Varsu. Witnes istap talem tu se Erai lan, Tarbumamele we hemi kaonsel blong ol jifs blong Epi, olgeta oli bin kivim approval blong olgeta long 1981 mo long 13^th February, 1984, ol aria kaonsel of jifs olgeta tu ibin kivim approval blong olgeta. Hemi talem tu se Varsu eria kaonsel of jifs hemi advise se jif William Nehemiah Farasia nao hemi kastom ona blong ol graon ia be ol jif olsem Lan Silas ol ino wantem akseptem desisen ia mekem se raorao istap kontinue nomo.

Hem italem tu se Harry Mankio itet long 1970 mo oli berem hem long Mate vilij long graon blong William Nehemiah Farasia. Kot ibin askem witnes weta hem ibin stap tu long taem ia we Harry Mankio ibin stap toktok laswan mo kivim raet long William Nehemiah Farasia. Long saet blong kwesten ia witnes iansa se "yes" mo hemi talem tu se long taem ia olgeta plande oli bin stap long taem ia we olfala Harry Mankio istap talem las toktok blong hem. Kot ibin askem hem tu weta Jif Joseph Kangurnania igat brata or no. Long kwesten ia hemi ansa se "no". Long saet blong kwesten weta Jif Joseph Kangurnania igat pikinini or no hem iansa se "yes" hem igat wan pikinini we nem blong hem hemi Stephen. Long saet blong kros-examinesen kwesten, Spokeman blong Yona ibin askem weta papa blong witnes ibin sendem bak wan man Lopevi blong kivim money long Yona, witnes italem se hemia hemi true. Yona iaskem wan mo kros-examinesen long witnes se sapos hemi save talem wanem language ia nao hemi Barmande or Dendum. Long saet blong kwestin ia, witnes italem se hem ino save forom nomo se hem ikam blong witnes nomo long saet blong raet we Williams Nehemiah ibin kasem.

No. 2 witnes blong Original Kleiman - Jif Dick Isaac.

No.2 witnes istap talem long kot ia se kastom raet we William Farasia hem igat ifolem Island Kot mo eria kaonsel kot blong ol jifs. Witnes istap talem se forom resen ia nao raet ia hemi stret mo folem kastom blong Varsu hemia long Epi. Mo tu se long kastom blong Epi, olgeta ino stap folem woman be oli stap folem nomo man. Hemi talem tu se sapos wan man ino folem kastom ia hemi minim nomo se hem ino folem kastom blong olgeta. Long sem fasin ia witness istap talem se sapos eni man ino akseptem raet we William Farasia igat, hemia iminim nomo se man ia ino folem kastom blong olgeta.

Long saet blong kros examinesen kwestin, Yona ibin askem se wanem nao ibin hapen long 13^th August, 1983. Long kwesten ia witnes ikonfimem se long taem ia nao Jif Kangurnania ibin kivim kastom raet blong kastomari onasip blong graon ia Dendum iko long William Farasia. Long saet blong namba 2 kross-examinesen kwestin we ikam long Yona se ol olfala ia olsem David, Lango, mo Harry Mankio se wanem kaen lanwis nao oli stap toktok long hem, witnes ise olgeta ia ol istap usim nomo Erai lanwis.

No. 3 witnes blong original kleimen: Mai Esau.

No.3 witnes istap talem long kot ia se kastom raet we William Nehemiah Farasia iholem istret nomo forom hemi folem kastom tradisen blong olgeta long Varsu eria mo tu se ol kaonsel blong olgeta jifs ol ibin approvum finis. Witnes ibin talem tu se long 1983, ol jifs blong olgeta ibin talem long William Nehemiah blong imas pem aot raet ia long wan kastom seremoni. Folem tingting ia Farasia ibin mekem kastom seremoni ia long 1983. Witnes italem tu se long 1984, Jif Ian Silas ibin mekem kastom iko long semfala jif ia we Farasia ibin mekem kastom iko long hem mekem se raorao ino save stop long saet blong graon ia Bamande mo Lemam. Witnes italem tu se igat las seremoni we William Nehemiah imekem iko long las man we hemi Harry Mankio. Hemi talem tu se taem we Harry Mankio isik istap wetem William Farasia hem ino bon yet. Be taem we hemi big wan nao hem ites harem papa blong hem italem long hem. Long wan kros-examination kwestin we ikam long Yona weta long 1983 William Farasia ibin mekem kastom iko long Jif Kangurnania blong pem aot raet ia long graon ia Dendum witnes ikonfimem se 'yes' hemia hem itru. Bakeken long saet blong wan kros examinesen kwesten se forom wanem nao Jif Ian Silas imekem kastom iko long Jif Kangurnania, hem ise hem ino save long saet ia be hem isave nomo se Jif Ian Silas ibin fosem Jif Kangurnia blong pem aot raet ia we William Nehemiah Farasia ipem finis long 1983 long wan kastom seremoni. Hem italem tu se hem ino save wanem lanwis nao Bamande istap usim.

Ol evitence blong Famili Salkon Yona: 1^st kaonta Kleiman.

Spokesman blong Famili Salkon Yona we hemi Salkon Yona hemi talem se hemi stap kleimem Rakava or Erai lan forom nomo se hemi graon blong Jif Charley Hukaka we hemi blong Meltalik, wan vilij we istap antap klosap long hil we oli stap kolem Bomare. Spokesman italem se Jif Charley nao hemi bin adoptem small pupu blong hem we hemi Amana. Hem italem tu se small pupu blong hem ia Amana hem nao ibin adoptem papa blong hem we hemi Yona long wan vilij we ol istap kolem Moukuekeivovou. Spokesman italem tu se Charley ibin kivim raet ia long Amana long 1800's mo Amana ikivim raet ia long Yona long 1900's mo Yona we hemi papa blong hem (spokesman), ibin kivim raet ia long hem long 1983. Spokesman ikontiniu blong talem se papa blong hem ibon long 1878 mo hem itet long 1983, imekem se hem igat 105 yias taem we hem itet. Spokesman istap talem tu se Rakava iwan lanwis we Charley, Amana, Yona mo hem (spokesman) ol istap toktok long hem. Spokesman istap talem tu se hem istap kleimem Rakava forom nomo se papa blong hem ibin kam luk hem long 1983 folem wan land komiti we Kavman ibin setemap afta long independence. Land Komiti ia ibin staon long Ngala long wan Satedei 12 June, 1981, mo long taem ia afta long plande toktok oli talem se graon ia iblong Salkon Yona. Spokesman italem tu se long 1984, Tarbumamele kaonsel blong ol jifs italem se graon ia iblong hem. Forom resen ia hem ikontiniu blong talem se Tarbumamele kaonsel blong ol jifs ibin folem toktok blong olgeta ia nao oli bin putum long 1990 long Akaka wan ston blong makem baondari blong hem. Spokesman istap talem tu se insaet long Rakava hem istap kleimem to Dendum, Bamande, Nedeve, Prebara mo Lemam.

Fes witnis blong 1^st Kaonta Kleiman - Sylvie Charley.

Fasfala witnis blong Salkon Yona hemi Sylvie Charlie mo hemi stret waef blong Salkon Yona. Hem istap talem se Salkon Yona nao hemi tru kastom ona blong Rakava. Witnis italem se hemi gat 6 points blong talem whae nao hemi se Salkon Yona hemi stret kastomari ona blong Rakava.

Nambawan poen nao se toktok ia 'Rakava' hemi minim se lan we iflat mo ikam aot long wan kastom lanwis blong hem.

Namba 2 poen nao se ino gat wan man mo we ilaef tedei mo istap toktok long lanwis blong Rakava, eksep Salkon Yona.

Namba 3 poen nao se Salkon Yona isoem wan ston blong ol pupu we istap pulum ol woman ikam long vilij blong hem mo tedei ston ia ilaef mo stap yet tedei.

Namba 4 poen nao se Salkon Yona ibin soem nasara blong ol pupu blong hem mo tufala spirit we ilukaotem nasara ia we oli stil laef yet tedei.

Namba 5 poen nao se Salkon Yona ibin pruvum hem plande long ol mitings mo kot blong ol jifs blong kleimem kastomari onasip long graon ia we jif Hukaka nao ikivim raet ia long hem.

Namba 6 poen nao se witnis ibin luk long ae blong hem wan ston we ol jifs ibin putum blong divaetem graon blong Salkon Yona long 13^th September, 1990.

Long saet blong kros-examinesen kwesten we Spokesman blong William Farasia iaskem se whea nao olfala Yona istap liv witnes ise hem istap liv nomo long Mafilao. Witnes italem tu se long yia 1981 nao Salkon Yona ikam bak long Rakava long taem ia we land komiti ibin staon. Bakeken long wan kros examinesen kwestin we Spokesman blong William Farasia iaskem se sapos hemi save hamas nasara nao istap long stesen, hem iansa ise igat Meltalik, Prepara mo Bamande. Hemi talem se Bawande hemi wan vilej mo hemi no long wei long Lemam forom krik nomo iseperatem tufala ples ia.

No. 2 witnes blong Salkon Yona. Jenny Yona.

No. 2 witnes blong Salkon Yona hemi Jenny Yona we hemi stret dota blong Salkon Yona. Witnes ia istap talem se Salkon Yona nao hemi ona blong graon ia folem ol trifala poens ia.

Namba wan poen nao se everi nem insaet long graon ia Rakava oli stap long lanwis nomo, exampol Levovo, we iminim white koral.

Namba 2 poen nao se ikat samfala olfala stampa blong kokonas we istap long graon we pupu blong Salkon Yona nao hemi planem.

Namba 3 poen nao se hem nao ibin gat fulap mitings finis we ol jifs oli miting forom graon ia mo everi mitings ia desisen ikam aot se Salkon Yona nao hemi raet ona blong ol graon ia.

Kot ibin askem witnes se whae nao hemi stap tokbaot ol lanwis nems blong ol ples ia insaet long Rakava Lan mo long kwesten ia witnes iansa se forom lanwis ikivim pruv se Salkon Yona nao iona long graon ia Rakava. Afta long hemia Kot ibin askem hem narafala kwesten bakeken se whu nao pupu ia we iplanem ol kokonas. Long saet blong kwesten ia hem iansa ise Amana. Long saet blong wan kros-examinesen kwesten we Spokesman blong William Farasia iaskem se forom wanem nao hem istap usum lanwis nems blong pruvum raet blong Salkon Yona, witnes iansa se ol nems ia Charley Hukaka nao ibin stap usim bifo. Long saet blong wan re-examinesen kwesten we Salkon iaskem weta itru se Yona, we hemi papa blong hem, ikivim raet ia long hem taem Yona ibin kivim $20.00 coins, witnes iansa ise 'yes' hem itru Yona ikivim raet ia long Salkon Yona taem we hemi stap givim $ 20.00 coins.

No. 3 witnes blong Salkon Yona - Johnson Tomol.

No. 3 witnes blong Salkon Yona hemi Johnson Tamol mo hemi stret tawian blong Salkon Yona, hemia iminim nomo se witnes ia imaretem stret sista blong Salkon Yona. Witnes istap talem se lan ia we hemi Rakava hemi blong Salkon Yona folem ol poens ia.

Namba wan poen nao se hem olsem witnes hem ibin stap long wan miting we ol jifs oli bin tekem desisen se lan ia Rakava iblong Salkon Yona.

Namba 2 poen nao se ol kastom nems blong ol pleses mo baondari oli stap long lanwis nems blong Salkon Yona everi wan.

Namba 3 poen nao se hem olsem wan witnes hem ibin luk wan ston we ol jifs ol ibin berem blong makem baondri blong lan we hemi blong Salkon Yona.

Long saet blong wan kros-examinesen kwesten we ikam long Spokesman blong William Farasia se Salkon Yona ikam long wan ples we oli kolem Lepomemel, witnes iansa se hem ino save forom hemi neva harem ples ia mo hem istap witnes nomo long ol nems blong ol pleses we hemi save. Afla long ansa ia Spokesman blong Farasia iaskem wan mo kros- examinesen kwesten se long wanem yia nao hem iluk adopsen we Salkon Yona istap tokabaot. Long saet blong kwesten ia Witnes iansa se hem ino save be afta hemi jenisim tingting blong hem bakeken ino talem se long 1800's. Bakeken Spokesman blong William Farasia iaskem narafala kros- examinesen kwesten se wanem kaen seremoni nao oli mekem blong makem adopsen ia. Long saet blong kwesten ia witnes iansa se oli bin kivim laef pig. Bakeken Spokesman blong William Farasia iaskem wan mo kros-examinesen weta witnes isave talem wanem yia nao Yona ikam bak long Bamande. Long saet blong kwesten ia Witnes iansa se Yona ikam bak taem ol man oli stap wantem pem graon long Bamande. Spokesman Blong William Farasia ibin kros-examinem Witnes tu blong sapos hem isave talem weta Amana imaret. Long kwesten ia witnes iansa se hem ino save. Witnes ikontiniu blong talem se wanem we Tarbumamele kaonsel blong jifs imekem blong planem ston hemia ifolem nomo ol desisen blong olgeta we oli mekem finis. Afta long ansa ia Spokesman blong Salkon Yona, long re-examinesen kwesten hemi askem witnes blong hem weta Amana ibin kivim eniting long papa blong Yona blong adoptem hem. Long kwesten ia witnes hemi se hemi kivim wan laef pig long papa blong Yona. Bakeken Salkon Yona ire-examinem witnes blong hem mo askem se wanem nao olfala Jif Joseph Kangurnania ibin talem long wan miting long yia 1984. Long saet blong kwesten ia witnes ise olfala Jif Kangumania ino talem wan samting.

No. 4 witnes blong Salkon Yona - Obed Yona.

No. 4 witnes blong Salkon Yona hemi Obed Yona we hemi stret brata blong Salkon Yona. Witnes istap talem se hem isave se Salkon Yona nao hemi ona blong graon ia we istat long Akaka mo ko kasem Burkia. Hemia ifolem nomo desisen we ikam aot long Varsu Kaonsel of jifs mo Tarbumamele kaonsel blong ol jifs. Hemi talem tu se graon ia iblong Salkon Yona folem ol poens ia.

Namba wan poen nao se Salkon Yona hemi gat wan ston blong hem blong pulum ol woman ikam long vilij blong hem.

Namba 2 poen nao se Salkon Yona hem igat wan kastom ston we igat ol spirit blong ol istap laef yiet tedei.

Namba 3 poen nao se Salkon Yona igat wan wut we taem oli planem yam afta oli sperem wut ia long wut we oli planem yam long hem blong mekem se ol yam ia mbai oli bigbig wan.

Namba 4 poen nao se Salkon Yona igat ol ples nems we oli stap long lanwis blong hem.

Namba 5 poen nao se hem olsem wan witnes hem ibin luk Tarbumamele kaonsel blong ol jifs iplanem wan ston blong divaetem baondari blong Salkon Yona.

Namba 6 poen nao se hem olsem witnes ibin stap long everi miting blong Tarbumamele mo eria kaonsel blong ol jifs mo hem isave gut ol graon ia se oli blong Salkon Yona.

Long saet blong wan kross-examinesen kwesten we Spokesman blong William Farasia iaskem se forom wanem ol jifs blong Varsu oli judgem lan kes ia be ino ol jifs we oli toktok long lanwis we witnes isave. Long saet ia hem iansa se forom nomo eria we lan ia Erai istap long hem. Afta Spokesman blong William Farasia iaskem wan mo kros-examinesen kwesten se forom wanem nao Salkon Yona bai ikam bak long Bamande we hem iko finis long lepomemel. Long saet ia Witnes iansa se forom igat krik. Bakeken Spokesman blong William Farasia iaskem wan mo kros-examinesen kwesten se wanem vilej or nasara nao hemi blong Yona. Long kwesten ia witnes iansa se hem ino save mo hem italem tu se hem ino save whea ples nao kondogo istap. Afta long ol kros-examinesen kwestens ia Salkon Yona ire-examinem witnes blong hem mo askem witnes se Lepomemel, ples we mama blong Yona ikam long hem, istap stret whea. Long saet ia witnes talem se Lepomemel istap isaet long Bamande.

No. 5 witnes blong Salkon Yona - Johnson Yona.

No.5 witnes blong Salkon Yona hemi Johnson Yona mo hemi stret pikinini blong Salkon Yona. Witnes istap talem se Rakava lan hemi blong Salkon Yona folem ol 5 poens ia.

Namba wan poen nao se ol kastom nems blong ol pleses long lan ia oli stap long lanwis nems blong Salkon Yona.

Namba 2 poen nao se hem olsem wan witnes hem tu ibin harem ol desisen blong ol jifs blong Epi, se Salkon Yona nao iona blong lan ia Rakava.

Namba 3 poen nao se olsem wan witnes hem ibin luk long eyes blong hem taem ol jifs blong Epi oli bin berem wan ston blong makem wan baondari blong Salkon Yona.

Namba 4 poen nao se Salkon Yona igat wan ston blong singaot ol woman ikam plande long vilej blong hem.

Long wan kros-examinesen kwesten we Spokesman blong William Farasia iaskem weta witnes isave talem weta ples ia lepomemel istap insaet long baondari blong Rakava. Long kwesten ia Witnes iansa se "yes". Bakeken long wan mo kros-examinesen kwesten we Spokesman blong William Farasia isakem se sapos hem isave talem weta ibin gat seremoni blong tekem ol raet blong ol graon ia we oli stap long dispiut. Long kwesten ia witnes iansa se "no". Hemi talem tu se insaet long Rakava igat 3 baondaris nomo mo Lemam wetem Dendum tufala istap insaet long Rakava lan.

Wokabaot long Graon.

Afta we kot ibin harem everi witneses blong trifala patis, olgeta jastises oli bin visitim lan ia we dispiut istap long hem. Resen blong visit ia hemi blong ol patis oli soem ol baondaris we dispiut istap long hem. Mo tu se ol patis oli save soem ol samting we ol pupu or papa blong olgeta oli mekem bifo istap insaet long ol dispiut lan. Hemia ol samting olsem ol olfala vilej, nasara, krev, nakamal, wut, ston, or eni samting we oli gat. Sapos wan pati ino gat ol samting ia mbai kot ia ino save tekem olsem pati ia ilusum kes be mbai kot ia imas usum nomo ol narafala evitence blong mekem desisen blong hem.

Wokabaot Wetem Original Klemen: William Nehemiah Farasia.

Long saet blong Original Kleimen we hemi William N. Farasia, hemi soem se baondari blong hem istat long wan drae krik we ikam aot long black sand long Big Bay mo ifolem krik ia iko antap kasem stesen blong bifo we oli stap kolem Lemam. Afta long ples ia krik itanem mo iron iko long saet blong ol hil mo kontiniu blong ko antap kasem hil blong Pomare. Long ples ia graon ia itanem bakeken mo folem krik mo kam bak kasem solwora, hemia klosap long haos blong Don William we hemi spokesman blong William Farasia.

Wanem nao Farasia isoem long Kot.

Long saet blong William Farasia, hemi soem wan stesen we trifala olfala ol ibin stap long hem bifo. Stesen ia oli stap kolem Lemam mo trifala olfala ia hemi David, Lango mo Harry Mankio. Insaet long baondari blong Lemam William Farasia ibin soem ol olfala kokonas we trifala olfala ia oli planem mo tedei oli stap usum yet long kakae. Insaet long stesen ia tu William Farasia ibin soem ol olfala kokonas mo hemi talem tu se ol buluk mo fanis blong buluk oli bin stap bifo long stesen ia. Long Lemam tu William Farasia ibin soem ol karen we ol famili blong hem oli stap mekem olsem karen blong yam, pinat, banana, sugarcane mo ol narafala samting bakeken. Hemi soem tu wan vilej we oli stap kolem Mangogo mo igat wan olfala we hemi Stephen we itet finis istap. Stephen ia nao wan dota blong hem imaretem brata blong Spokesman blong William Farasia, we hemi Roy. Afta long hemia, Spokesman blong William Farasia isoem ol graon ia we oli stap kolem Bamande. Igat wan krik we idivaetem Lemam mo Bamande. Ol samting we istap insaet long graon ia hemi ol kokonas we Spokesman istap talem se papa blong hem stret we hemi William Nehemia Farasia nao iplanem. Hemi soem tu ol fanis we naoia oli brokbrok istap mo ino gat buluk insaet. Fanis ia spokesman istap talem se hemi wan bigfala project we papa blong hem ibin mekem mo plande buluk oli bin stap insaet. Spokesman italem se ol fanis ia mo ol buluk ia Salkon Yona mo ol man Ngala mo Mafilao oli destroem everi wan. Hemi soem tu wan haos kopra we Salkon mo ol man blong hem oli bin bonem. Afta long Bamande Spokesman blong William Farasia isoem graon ia we ol istap kolem Dendum. Long ples ia Spokesman isoem wan ples we jif Bob Masing ibin mekem haos blong hem afta we hem ibin kam bak long Queensland, Australia afta ites kirap mo ko antap long stesen blong Dendum. Hemi soem tu ples we Salkon Yona ibin fes mekem haos blong hem long 1990 taem we hem ibin muv fas taem ikam long ples ia, Dendum. Hemi soem ol posts blong haos blong hem we oli stap kru mo Spokesman blong William Farasia isoem tu niu stesen antap long hil blong Bamande we Salkon istap long hem naoia. Spokesman blong William Farasia isoem tu sam kokonas we hem ibin planem mo hem ibin soem tu wan plantesen kokonas we iblong papa blong hem. Spokesman isoem tu se plantesen ia nao William Farasia ibin planem ol samting we olfala Kangurnania ibin mekem kastom long hem olsem, kokonas, breadfruit mo tarbuma. Ol samting ia Spokeman italem se hem ino save soem forom nomo se ol man Ngala wetem Salkon Yona oli katem aot everiwan. Spokesman blong William Farasia isoem tu ol kokonas blong hem mo papa blong hem we hariken Ivy ibin spolem evriwan long hil. Afta long ples ia Spokesman blong William Farasia ibin tekem ol jastises iko kasem haos blong hem. Mo long ples ia Spokes man isoem wan poen we idivaetem Ngala mo haos blong hem. Poen ia nao Spokesman italem long ol jastises se eria blong Dendum ifinis long hem.

Wokabaot wetem Salkon Yona.

Long saet blong Salkon Yona, hemi bin stat blong soem ol jastises long ples ia we hemi talem se ol jifs oli bin planem wan ston blong divaetem baondari blong hem. Hemi soem wan krek we emi talem se krek ia nao idivaetem graon ia Dendum mo iron iko kasem antap long hil ia we ol istap kolem Pomare mo kam taon bakeken folem krek ia we iron kolosap long Lemam mo kamaot long black sand bis long Big Bay. Hemi soem wan ples we wan man Paama, nem blong hem Tom istap long hem. Hemi soem tu krev blong papa blong Tom, man Paama ia. Hemi soem tu sam kokonas we papa blong man Paama ia iplanem. Mo tu hemi soem wan kokonas we ifoldaon istap mo talem se hemia hemi las stamba blong kokonas we papa blong hem iplanem. Hemi soem tu ol narafala kokonas we istanap istap we papa blong man Paama ijes planem. Afta long hemia, Salkon Yona ikarem ol jastises mo klaem antap long wan smol hil mo long ples ia hemi soem wan stesen mo ol olfala krev. Hemi soem wan krev we hem istap talem se iblong brata blong Charley Hukaka. After long hemia ol jastises oli muv smol iko mo Salkon Yona isoem ol navele tri mo talem se ples ia nao papa blong hem ibin sekomsis long hem. Afta long ples ia ol jastises oli krosem wan drae krek mo Salkon Yona isoem wan wut we hemi talem se wut ia nao ol man bifo taem we oli planem yam blong olgeta oli stap sperem wut ia wetem ol wut we oli planem yam wetem mekem se ol yam oli kam bigwan. Afta long hem ia, Salkon Yona ikarem ol jastises mo ko antap long wan stamba blong wan nabanga mo soem se hemia nao krev yat mo soem tu se ples ia ibin gat wan joj haos ibin stap. Hemi soem tu wan plan we hemi se ibin stap kro olsem flaoa raon long joj haos. Afta long hemia, Salkon Yona ibin soem long ol jastises krev blong Charly Ukaka we istap andanit long wan natapoa tri be ol jastises oli no bin manej blong ko long ples ia forom nomo hariken ibin bloem taon plande tri mo blokem road. Salkon isoem to tufala nabanga we oli stap klosap stamba blong hil ia Pomare. Hemi talem se fesfala nabanga ia nao fesfala stesen blong Charley Ukaka istap mo nem blong vilej ia hemi Melgelik. Hem isoem tu wan nabanga we istap taon lelebet mo italem se nabanga ia isoem namba 2 stesen blong Jif Ukaka. Afta long hemia Salkon Yona isoem wan krev we hemi se iblong wan jif we afta long tet blong jif Metat hem nao itek ova. Afta long hemia Salkon Yona isoem wan ston we hemi talem se iblong pulum ol woman ikam long vilij blong hem. Hem isoem tu wan ston we jif we krev blong hem istap antap hemi bin stap mekem kastom long hem.

Lukluk blong kot long saet blong ol evitence.

Long saet blong William Nehemiah Farasia, hemi stap talem se raet we hemi gat long graon blong Dendum, Bamande mo Lemam emi raet we hemi ikarem tru long ol seremoni blong ol las man taem we hemi mekem kastom iko long olgeta. Fesfala raet we William. N. Farasia ikasem hemi forom graon blong Dendum. Long evitence blong hem hemi talem se igat wan jif we hemi Bob Masing mo taem we hemi tet, hemi pasem everi raet blong hem ia iko long pikinini blong hem we hemi jif Willie mo George. Jif Willie imaretem woman ia Naomi we hem iblong Lepa mo tufala ino gat wan pikinini. Naomi igat wan brata nomo we hemi Jif Kangurnania mo taem we jif Willie istap siksik mo klosap itet hemi kolem Jif Kangurnania mo talem long hem se hem ino bin pem sista (Naomi) blong hem. Forom resen ia nao evri raet we Jif Willie igat mbae raet ia iko long Kangurnania. Hemia iminim nomo se evri raet ia nao Kangurnania iholem istap kasem 13 Okis 1983. Long taem ia nao Kangurnania ipasem raet ia iko long William Nehemiah Farasia. Folem hemia William N. Farasia ibin mekem kastom forom raet ia folem nomo desisen blong Tarbumamele mo Varsu kaonsel blong ol jifs. Graon ia Dendum istat long Kapo we istap stret long haos blong Nehemaiah Farasia iko kasem wan drae krek long wan ples we ol istap kolem Nelik. Long saet blong tufala narafala graon ia we hemi Bamande mo Lemam, hemia tu William Farasia istap talem se hem ikarem raet ia tru long kastom seremoni long las man. Hemia ifolem nomo trifala las olfala we ol ibin stap long Lemam we olgeta ia hemi David, Lango mo Harry Mankio. Taem we olfala David mo Lango itet olgeta iberem tufala long Lemam mekem se Harry Mankio hem wan nomo istap long Lemam. Taem we Harry Mankio istap long Lemam mo stap harem se hemi stap siksik mo harem tu se mbae hemi tet hemi sendem toktok iko long William Farasia blong kam luk hem. Taem William Farasia ikam hemi karem olfala Harry Mankio aot long Lemam mo ko stap long vilij blong hem hemia long Mate. Taem we sik istap kam bigwan mo klosap itet, Harry Mankio, ibin kivim kastom raet ia iko long William Farasia long 1968. Ol witneses we oli harem wanem we Harry Mankio italem igat Elder Willie Kora, Jif Keliu Enaio, Gideon, Ian Silas, Thomas mo William George. Igat tu William Farasia mo ol famili blong hem oli bin stap long taem ia we olfala Harry Mankio ibin pasem raet ia iko long William Farasia. Taem we Harry Mankio itet William Farasia ibin mekem kastom seremoni forom beri graon blong hem folem desisen we ikam aot long Tarbumamele Kaonsel blong ol Jifs.

Wanem nao lukluk blong kot long saet ia.

Long saet blong kastom blong Epi, taem we wan man ino gat pikinini boy emi save mekem tufala samting blong pasem raet blong hem. Feswan hemi save adoptem pikinini blong sista blong hem blong kam stap wetem hem forom se taem we hemi tet mbae boy ia nao mbae itek ova long ol raet ia. Namba tu samting we man ia isave mekem blong pasem raet blong hem hemi tru long seremoni blong las man. Nao long ples ia kot ibin harem se William Nehemaiah Farasia ibin mekem kastom seremoni long 13 Okis 1983, iko long Kangurnania forom kastom raet ia long graon ia Dendum. Kot isave tu se Kangurnania hemi kat wan boy we nem blong hem hemi Stephen. Forom wanem resen nao Kangurnania ino kivim raet ia long pikinini blong hem Stephen. Resen forum nomo se graon ia Dendum ino graon blong Jif Kangurnania, be hemi graon blong Bob Masing mo pikinini blong hem Jif Willie. Jif Willie nao ikivim raet ia long Kangurnania mo sem raet ia nao Kangurnania ipasem iko long William Farasia. Long lukluk blong kot birth raet blong graon blong Dendum hemi blong Bob Masing mo pikinini blong hem jif Willie. Kangurnania hemi karem raet ia ino long birth raet be tru long seremoni blong las man mo sem raet ia tu William Farasia ikarem tru long seremoni blong las man. Hemia isemak wetem tufala graon ia Bamande mo Lemam. William Farasia isoem aot long ol evitence blong hem se hemi karem raet long tufala ples ia thru long ol seremonis blong ol las man be ino long birth raet. Long ol evitence blong hem hemi soem iklia se William Farasia ibin berem mo mekem seremoni blong las man blong Lemam mo Bamande we hemi Harry Mankio.

Ol Witneses we oli luk ol las seremoni ia.

Long saet blong graon blong Dendum seremoni blong pasem raet ia ikam long William Farasia ibin tekem ples long 13 Okis 1983. Hemia ifolem nomo ol desisen blong Tarburnamele Kaonsel blong ol jifs mo Varsu Konsel blong ol Jiffs. Afta long seremoni ia Varsu eria konsel of jifs oli bin mekem wan miting long 31 Okis 1988 mo long taem ia 17 jifs oli bin harem stret toktok we ikamaot long maot blong Jif Joseph Kangurnania mo talem se hemi givim raet ia iko long William Farasia long 13 Okis 1983 finis. Olgeta jifs ia nems blong olgeta istap antap. Mo long saet long graon blong Bamande mo Lemam igat eight (8) fala witneses we oli harem mo lukim olfala Harry Mankio taem we hemi stap kivim raet ia iko long William N. Farasia mo olgeta ia nems blong olgeta tu ikam aot antap. Ol las seremoni ia everi witneses blong William N. Farasia oli confimem taem we oli stap kivim evitence long kot.

Luk luk blong kot long saet blong Salkon Yona

Hemi impoten blong luk save se long saet blong Salkon Yona hem ino basem kleim blong hem long saet blong seremoni blong ol las man be hemi base plande nao long saet blong adopsen we Charley Ukaka ibin adoptem Amana mo Amana ibin adoptem Yona we hemi papa blong Salkon Yona. Salkon Yona hem ino karem raet we hem istap kleimem long saet blong adopsen be hem istap talem se hem istap karem raet ia taem we papa blong hem ibin kivim raet ia long hem taem papa blong hem ibin kivim $20.00 coins long 1983. Long saet blong kastom blong Epi, taem we wan man ino gat wan boe, hemi mas adoptem wan pikinini blong sista blong hem forom nomo se sapos hem itet mbae hem ipasem raet ia iko long boe ia. Long saet blong Salkon Yona kot ikarem se Jif Hukaka hemi bin adoptem Amana mo hemi bin swapem wan laef pig iko long stret brata blong Amana we hemi Aman. Hemia blong mekem se Amana ikam adopted pikinini blong Jif Charley Hukaka. Long 1878 Yona ibin bon mo long taem ia Amana ibin mekem wan seremoni iko long Aman blong adoptem Yona we hemi papa blong Salkon Yona. Long seremoni ia Amana ibin swapem wan laef pig iko long Aman we hemi papa blong Yona mo sem taem stret brata blong Amana. Yona ipasem raet ia iko long Salkon Yona we istap tedei hemia long 1983 taem we papa blong hem ibin kivim $20.00 coins.

Long lukluk blong kot igat trifala samting we kot ino klia long hem. Fas samting nao se wanem blade laen or famili konekson nao Jif Charley Hukaka igat wetem Makal mo waef blong hem Emakal blong mekem se hem iwandem adoptem pikinini blong tufala ia we hemi Amana. Kwesten nao se wanem relasonsip blade laen nao jif Hukako igat wetem Makal mo Emakal blong mekem se hemi mas adoptem Amena. Kwesten ia hemi impoten forom se long kastom blong Epi, wan man ino save adoptem pikinini olbaot. Hemia ifolem kastom nomo se man ino save adoptem boe olbaot be imas folem ol raet we man ia iwantem kivim long boe ia. Long saet ia kot iwantem talem se hem ino klia wanem relesonsip or blade laen nao jif Hukaka igat wetem mama mo papa blong Amana. Salkon Yona ino soem long famili tri blong hem mo ol evitence blong hem ino soem klia relesonsip ia. Hemia hem impoten forom se raet we hem istap kleimem imas kam long Jif Hukaka we Salkon Yona yiet hem istap talem se Jif Hukaka nao hem igat birth raet long ol graon ia we dispiut istap long ol mo raet we pupu blong hem Amana mo papa blong hem Yona igat oli pass through nomo long adopsen we jif Charley Hukaka ipasem long ol.

No 2 samting we ino klia hemi ol seremoni we Salkon Yona istap talem se jif Hukako ibin swapem wan laef pig iko long stret brata blong Amana we hemi Aman. Ino gat wan independen witnes we Salkon itekem ikam long kot blong confimem storian blong swapem ol pig ia. Forom storian blong Salkon isoem se Jif Charley Hukaka ibin adoptem Amana long 1800s mo Amana ibin adoptem Yona long 1900s long lukluk blong kot long taem ia Salkon Yona mo ol brata blong hem oli no bon yiet. Hemia iminim nomo se Salkon Yona imas provaedem long kot wan independen witnes blong konfimem storian blong hem ia.

Namba tri (3) samting we kot ino klia long hem nao hemi wan seremoni we Salkon Yona italem se papa blong hem ipasem raet ia ikam long hem long 1983 taem hemi kivim $20.00 coins long hem insaet long haos blong olgeta. Hemia tu kot iwantem talem se ino gat wan independen witnis blong talem se "yes" papa blong Salkon ibin mekem wan kastom blong kivim raet ia long Salkon Yona long 1983. Folem hemia Kot iwandem talem se hem ino andastanem toktok blong Salkon Yona forom long 1983 yumi independen finis mo yumi gat own money blong yumi we hemi Vatu mo hao nao mbae papa blong hem we hemi Yona ikivim $20.00 coins olsem we hem istap talem. Kot ibin askem tu Salkon Yona se whu nao iwitnes long seremoni ia hemi talem se ol pikinini blong hem mo waef blong hem nomo.

Long lukluk blong kot Salkon Yona hemi fail blong tekem ol independen witneses blong oli konfimem ol evitence blong hem. Long rikod blong kot hemi soem se Salkon Yona ibin tekem ol witneses we oli stret famili blong hem. Olgeta ia igat waef blong hem we hemi Sylvie Charley, tufala stret pikinini blong hem we hemi Jenny mo Johnson Yona, stret brata blong hem we hemi Obed Yona mo stret tawian blong hem we hemi Johnson Tomol. Hemia imekem se ol evitence blong hem we kot irikotem istap antap isoem nomo se oli no heavy mo iluk olsem Salkon ibin storian gut long olgeta bifo oli kam long kot.

Samfala obsevasons blong Kot.

Taem we kot ibin stap harem kes ia, kot ibin stap observem se Salkon Yona, Amana or Jif Charley Hukako olgeta ia ol ino gat wan konfimisen se ol man ia oli bin stap long Malgelik, Bomande, Dendum mo Lemam long taem bifor ikam. Sapos itru, Salkon Yona imas pruvum hemia mo wei blong pruvum nao se hemi mas karem ol witneses we oli save gut long ol storian blong jif Charlie Hukaka, Amana mo Yona. Kot imas talem long Salkon Yona se hem ino bin pruvum blong satisfaem kot ia se jif Charlie Hukako, Amana mo Yona nao oli bin stap bifor long ol ples ia we hemi stap kleimem. Mo tu se sapos ol storian blong hem ia ol itrue mbae ol olfala long Mafilau, Mate, Lepa, Nikaura, or eria blong Varsu mbae olgeta everiwan oli save storian blong Jif Charley Hukaka. Wanem we kot iharem nao se ol pikinini blong Salkon Yona nomo oli save storian blong Jif Charley Hukaka. Wanem we iklia long kot tu se olfala Yona we hemi papa blong Salkon Yona hem ineva stap long ol pleses ia we dispiut istap long ol forom long whol laef blong hem hemi stap nomo long Mafilau koko itet. Kot ibin harem tu se Salkon Yona ibin muv iko long ol graon ia nomo taem we ibin gat dispiut long 1984. Long taem ia nao Salkon Yona ibin atendem wan miting we land komiti ibin mekem. Kot ibin harem tu se hem ibin muv iko long graon ia Dendum long 1990 nomo taem we hemi aot long Mafilau wetem ol pikinini blong hem. Forom risen ia nao kot ifaenem aot se Salkon Yona ino gat eni kokonas, fenis blong buluk or eni developmen long ol graon ia we bai isoem se "yes" hemi tru Salkon Yona wetem papa blong hem mo ol pupu blong hem oli bin stap ia long taem finis ikam.

Kot ifaenem aot tu se Salkon Yona istap traem blong talem long kot ia se ol lanwis nems blong ol pleses nao imekem se hemi kastom ona long ol graon ia. Kot ino save akseptem toktok ia forom nomo se ol lanwis nems long ol pleses ibase bigwan nao long ol lanwis we ol man ples ia oli stap toktok long hem mo man narafala ples ino save karem lanwis blong narafala ples blong nemem ol narafala ples.

Forom ol poens ia, kot iwandem samarisem ol faendings blong hem iko olsem, se William Nehemiah Farsaia, kot ifaenem se raet we hem igat long Dendum hemi raet we ino kam long birth raet be raet we Kangurnania ikivim long hem taem we William N. Farasia imekem las kastom iko long hem. Mo tu se Jif Bob Massing mo pikinini blong hem Jif Willie tufala nao igat birth raet long graon ia Dendum mo Jif Willie nao ipassem raet ia iko long Kangurnania mo Kangurnania nao ipassem raet ia iko long William N. Farasia. Everi raet ia ipas thru long ol seremoni blong las man mo ol witneses blong William N. Farasia oli confimem everiwan long kot ia. Hemia hemi semak wetem graon ia we oli stap kolem Lemam mo Bomande. Tufala graon ia evitence isoem se olfala Harry Mankio we emi las olfala long ples ia we oli kolem Lemam se hem nao ibin traem aot long fes blong plande witneses long taem ia we hemi stap blong tet.

Long saet blong Salkon Yonah kot istap gat plande kwestens long ol kleims blong hem.

Nambawan kwesten nao se wanem relesensip nao Charley Hukaka igat wetem Makal ino waef blong hem Emakal blong hemi adoptem Amana we hemi stret pikinini blong tufala.

Namba tu (2) kwesten nao se forom wanem Jif Charley Hukaka mbae mekem kastom iko long Aman we hemi stret brata blong Amena blong hemi adoptem Amana.

Namba tri (3) kwesten nao se ino gat evitence or ol independen witneses blong talem se Amana iadoptem Yonah we hemi papa blong Salkon Yona mo imekem kastom iko long Aman we hemi stret brata blong Amana.

Namba four (4) kwesten nao se ino gat evitence or ol independen witneses blong talem se Yonah ikivim raet ia long Salkon Yonah long 1983 taem we hemi kivim $20.00 coins.

Namba faev (5) kwesten nao se forom wanem olfala Yonah ino bin stap long ol graon ia we dispiut istap long ol be iko stap long Mafilau mo hem ineva tokbaot ol graon ia kam kasem 1984 nomo taem we hemi atendem wan miting we land komite ibin kolem.

Namba six (6) kwesten nao se forom wanem Salkon Yona mo ol pikinini blong hem oli stap long taem long Mafilau mo tes muv nomo iko long ol disputed lan ia nomo long 1990.

Forom ol resens ia kot iwandem mekem dekleresen tedei namba 18 March, 2004, se William Nehemiah Farasia nao hemi kastom ona long ol graon ia Dendum, Bomande mo Lemam. Folem dekleresen ia kot istap mekem oda iko olsem:

KOT ODA

1. Graon ia Dendum, Bomande mo Lemam hemi blong William Nehemaiah Farasia mo ol pikinini mo famili blong hem we oli stap tedei mo olgeta we mbae oli kam afta.

2. Eni developmen we eni man imekem insaet long baondari blong trifala graon ia olgeta imas askem autorisesen long William N. Farasia or sapos hemi tet, long ol pikinini blong hem we oli stap tedei mo olgeta we mbae oli kam afta.

3. Ol man Lopevi or Paama we oli stap liv mo mekem karen mo copra insaet long trifala graon ia, olgeta imas toktok wetem William Nehemiah Farasia or ol pikinini blong hem or ol famili blong hem we mbae oli kam afta blong mekem wan agrimen blong kontiniu blong wok.

4. Sapos eni man we istap long trifala baondari ia be ino wantem folem oda namba tri (3) antap, mbae William N. Farasia or ol pikinini blong hem or ol famili blong hem we mbae oli kam afta, mbae oli gat raet blong movum aot olgeta or tekem wan disesen we oli ting se hemi stret. For example olgeta isave mekem se olgeta ia isave leasim ol graon iko long William N. Farasia or ol pikinini blong hem or ol famili blong hem we mbae oli kam afta.

5. Long saet blong Salkon Yonah, kot isave se hem istap wok long trifala graon ia. Forom risen ia kot iwantem talem long hem se hem mo ol famili blong hem olgeta imas stap andanit long autoriti blong William N. Farasia mo ol pikinini blong hem mo oli mas stopem fasin ia blong stap brebrekem or distroem ol properti blong William N. Farasia mo ol pikinini blong hem.

6. Sapos Salkon Yonah ino respectem oda namba five (5) antap mbae William N. Farasia or ol pikinini blong hem or ol famili we mbae oli kam afta mbai oli gat everi raet blong talem long hem mo ol pikinini blong hem blong oli mas muv aot long ples ia or talem long olgeta blong oli leasim ol ples ia, sapos ol ino wandem muv aot.

7. Tufala paties igat 30 deis blong apeal akensem desisen ia.

Dated long Rovo Bay Namba 18 March 2004.

Jastis: Billy Saksak
Jastis: Morris Jack
Jastis: Avio Jack
Magistrate: Jerry Boe