Kalmatalu v Wit [2003] VUIC 7; [2003] VUICB 3; Land Case 01 of 2001 (3 October 2003)

IN THE EFATE ISLAND COURT
HELD AT PORT VILA
(LAND TRIBUNAL)

Land Case No. 1 of 2001

BETWEEN

SOPE KALMATALU & FAMILY OF
PANGO VILLAGE - EFATE
Original Claimants

AND

NAFLAK WIT AND FAMILY
OF PANGO VILLAGE - EFATE
Counter Claimants

NAME AND LOCATION OF LAND CLAIMED: ETASRIK LOCATED AT PANGO POINT

JUDGMENT

Efate Island Court ibin sitaon long namba 22 mo 23 Septemba blong harem lan kes namba 1 blong yia 2001. Sope Kalmatalu mo famili, we oli orijinal kleimen, oli stap talem se olgeta nao oli lan ona long plesia we oli stap kolem Etasrik. Folem kleim ia klerk blong Island Court ibin putum pablik notis blong mekem se everi wan we oli tingting se olgeta tu oli gat raet long graon ia blong oli putum kleim blong olgeta. Notis ia ikam aot long namba 26 Julae mo ifinis long namba 26 Ogis. Folem notis ia Naflak Wit mo famili oli mekem kleim blong olgeta blong talem se olgeta nao oli raet ona blong graon ia Etasrik.

Ples whea graon istap

Etasrik hemi wan ples we hem istap long poen blong Pango. Graon ia hem istat daon long solwora long wan ples we oli kolem Eknarof mo imuv iko antap kasem stamba blong nabanga we oli kolem Emeltakel mo iko kasem stamba blong wan hil we oli kolem Esel. Hemi kontinue blong ron andanit long stamba blong hil ia kasem wan ples we oli kolem Eluk Per mo itanem iko kasem solwora bagegen long wan ples we oli kolem Eroilep. Insaet long graon ia ikat ol karen we ol difdifren man oli planem. Samfala karen ia ol pati we oli despiut nao oli mekem be samfala ol man we oli askem blong mekem karen.

Komposision blong kot

Long wan Amendment Act No. 35 blong 1989, Paliament ibin pasem se anda long sekson 2 blong Islan Kot Act, Cap. 167, taem we Island Kot istaon blong harem dispiut long lan bae wan Magistret imas staon wetem 3 fala Islan Kot jastises. Anda long sekson 2(a) bae wan Magistret olsem bae ino save staon sapos Jif Jastis ino kivim autoriti long hem. Folem hemia Kot iwandem talem long ol patis se olgeta we oli harem lan kes blong Etasrik oli qualifae everi wan.

Ol weis we kot ibin usim blong harem lan kes ia

Kot imas mekem iklia long ol patis se ol storian we bae oli talem long Kot blong pruvum se whu nao iraet ona blong graon ia bae kam aot nomo long ol kastom blong yumi long Efate mo Pango. Hemia imin se ol patis oli no save tokbaot loa blong waetman blong pruvum kes blong olgeta. Oli mas tokbaot nomo wanem we kastom italem se olgeta nao oli tru kastom ona long graon ia Etasrik. Forom resen ia nao loa istap provaedem anda long Oda 18, rul 2 se ol patis imas faelem ol stetmen blong ol witnisis blong olgeta wan wan. Forom resen ia Kot ifinem aot se ol witnisis blong Naflak Wit mo famili oli no bin mekem wanwan stetmen olsem we loa italem. Olgeta oli mekem wan stetmen nomo mo ol witnisis ia everi wan isaen long wan stetmen ia.

Storian blong Sope Kalmatalu mo famili blong hem

Long stat blong toktok blong hem, Kolrib Sope, we hemi tekem kes long behaf long famili Sope, hem italem se hem nao pupu blong hemi Kalmatalu Sope mo hem nao kastomari ona blong land ia Etasrik. Hemi talem se pupu blong hem we hemi Pastor Sope Taunauen Kalmatalu hemi bon long Epangtuei, hemia long IDS long Pango poen sam taem long 1872. Hemi talem tu se ol famili blong hem oli inheritem graon ia thru long kastomary raet blong olgeta thru long tribal nem we oli kolem Noaii Tau (yam) we olgeta ibin stap mekem karen long eria ia mo fis long solwora klosap long taem finis ikam.

Hao nao famili Sope itekem ful raet long graon ia Etasrik

Kalorip Sope italem se taem we Chief Kalotrip ibin stap sherem graon long 1930s emi kivim raet long Etasrik ikam long Pastor Sope Taunauen Kalmatalu. Hemia forom nomo ifolem onasip blong kastomari raet we ikam aot long olgeta famili blong hem wei onem graon ia bifo christianity ikam long Efate.

Kalorib Sope ikontinu blong talem se Fred Kaltabang hemi wan adopted pikinini blong Kalonsem. Hemi talem tu se Kalonsem iwandem mekem karen long ples ia Etasrik be hemi no ples blong hem afta hemi askem Pastor Sope blong imekem karen long graon ia. Pastor Sope iletem hem blong wokern karen nomo long ples ia be ino blong hemi planem ol kokonas. Kalorib Sope italem se forom Kalonsem ino folem toktok blong Pastor Sope mo iplanem kokonas tedei Fred Kaltabang mo ol narafala man oli stap kleim graon ia. Hemia nao resen forom wanem famili Sope iwandem challensem kes ia long Efate Island Court.

Kaluat Kalotiti, first witnis blong Sope famili

Long toktok blong hem olsem wan witnis long saet blong Sope famili, Kaluat Kalotiti iconfirmem se ibin kat 2 man we oli stap pas long foret blong council of Jifs blong Pango vilej we ikonsonem graon ia Etasrik. Hemia ikat Kalsaf Sope mo Fred Kaltabang. Hemi se resen forom wanem bae oli kam long kot forom nomo se Fred Kaltabang istap kleim se hem nao kastom owner long graon ia. Kaluat ikontiniu blong talem se ol olfala kokonas Kalonsem nao iplanem be graon ia ino blong hem. Hemi blong Pastor Sope. Hemi talem se ol kaonsel blong ol jifs blong Pango oli bin sitaon 2 taem forom lan ia Etasrik mo oli akri se kastom ona nao hemi Kalsaf Sope. Hemi talem se long taem ia Jif Andy Reman II mo ol kaonselas blong hem oli bin talem long Fred Kaltabang se lan ia ino blong hem mo hemi mas stopem wok long ples ia mo no tasem ol propeti we oli stap long hem. Kaluat isave gut forom we hem ibin stap olsem sekretari blong kaonsel long taem ia.

Mr. Kaluat italem tu se Fred Kaltabang hemi wan adopted son blong Kalonsem. Forom resen ia nao hemi stap folem Kalonsem long whea ples nao Kalonsem imuv mo iwok long hem. Kaluat italem tu se long taem we Jif Kalotrip ibin stap distributim ol graon Fred Kaltabang ino bin kat wan pis land we chif ibin kivim long hem forom long taem ia hemi wan smol pikinini nomo mo istap folem Kalonsem. Long kwesen se ol pikinini we oli adoptem olgeta bae oli gat lan or no Kaluat italem se hemia idepen long man we iadoptem hem. Sapos hem iwandem kivim bae hemia istap long on ting ting blong hem.

Sope Kalsrap Kiriau, sekon witnis blong famili Sope

Sope Kalsrap hemi talem se long taem ikam pupu blong hem, Kalsrap Kiriau, hem nomo wetem olfala Sope ikat eria long ples ia Etasrik. Hemi talem se olfala Sope nao hemi tru kastom ona long ples ia forom se olgeta oli olfala blong Pango. Hemi talem se hemi wan long ol kaonsel memba blong chif Andy Reman II we oli bin tekem desison se graon ia Etasrik hemi blong Kalsav Sope we papa blong hem nao olfala Pastor Kalmatalu Sope. Hemi talem tu se taem we oli bin tekem desison ia olfala Kalsei Kaltabang blong Ifira hem tu ibin stap long taem ia. Mr. Kalsrap italem se long taem ia Kalsei Kaltabang ibin talem long Fred Kaltabang se hem ino kat raet nating long graon ia Etasrik forom olfala Kaltabang hemi blong Ifira. Hemi talem tu se ol paties olsem Lewi, Frank Maleu Kalpoi, Keneth Kalomtak mo Kalkot Kaltabang olgeta oli bin mekem kleim long taem we vilij kot ibin kivim raet long Kalsav Sope. Hemi talem tu se Chif Andy Reman II hem tu iwan long olgeta we oli mekem desison ia blong kivim kastomari onasip long Kalsav Sope. Hem istap talem long Kot ia se resen forom wanem bae kes ia ikam long Kot forom nomo se Jif Andy Reman II mo ol kaonsels blong hem oli stap ko agensem ol desison we olgeta yiet oli mekem. Hemi talem se hemi luk olsem chif Andy Reman II igat konflict blong interes forom se long las taem we vilij kot ibin sitaon, hem ino mekem wan counta kleim agensem famili Sope be hem itanem hem mo alaoem lan kes ia blong oli harem bagegen long yia 1999.

Patas Paton, namba 3 witnis blong famili Sope

Patas Paton istap talem long kot ia se graon ia long Etasrik ino blong Frank Maleu Kalpoi, Fred Kaltabang, Kenneth Kalomtak, Jif Andy Reman II mo Leiwi Kalpoi. Resen blong hem ifolem nomo desison blong Andy Reman II mo ol kaonselas blong hem long 1980s we oli kivim ful raet long famili Sope. Hemi talem tu se ol kokonas we we Leiwi Kalpoi istap kleimem ino blong Kalran Kaltabang be oli blong ol famili Sope. Mo tu se Jif Andy Reman II ino save kleimem ol kokonas ia forom we hem ino planem be hem igat wan residential project long ples ia. Famili Sope oli bin kivim kokonas ia blong oli kakai nomo be ino blong onem lan. Long saed blong Kenneth Kalomtak, Patas istap talem se hemi folem famili blong Sope nomo blong kam wok mo planem kakai long graon ia be ino blong onem land. Hemi talem tu se Kalonsem hemi karem rekwest blong Sope Kalmatlu blong luk aftarem karen nomo be ino blong planem kokonas olsem we hem istap kleimem tedei. Long saet blong kewsten se why nao bae Leiwi bae kleim long ples ia Patas italem se igat wan olfala we nem blong hem Kaltogor se hem nao ikivim graon ia long hem. Hemi talem se Kaltogor hem ino ona blong graon mo hemi ino save whae nao bai olfala ikivim graon ia long Leiwi.

Namba 4 witnis blong famili Sope we hemi Pastor John W. Kalotiti hem ino kam blong kivim evidence.

Storian blong Naflak wit and family

Long saet blong Naflak wit Lewi Kalpoi we hemi woman blong Frank Kalpoi Maleu nao hemi redim aot openin toktok blong Frank Kalpoi. Hemi talem se folem histri blong graon ia Naflak Wit nao hemi ona. Hemi se Kalotrip wetem Kalpoi tufala ibrata. Long 1920 nao jif Kalotrip istat dividem olgraon ia long ol strensa mo hem istap kleim nomo forom se pupu blong hem oli stap ia befo. Tufala olfala ia tufala tugeta inaflak wit. Hemi talem se ikat wan stetmen we oli bin raetem long 30 Ogis, 1933, we isoem se igat 3 naflak nomo istap long Pango. Ol naflak ia igat Naflak Wit, Naflak Kram mo Naflak N'drau Miel Nrau mo hemi talem tu se igat 5 man nao oli witnisem se igat tri naflak nomo. Kot wandem talem se Frank ino provaedem ol documentari evitence blong pruvum kleim blong hem ia.

Lewi Kalpoi, fesfala witnis blong naflak wit mo famili

Mrs Lewi Kalpoi hem ino bin faelem eni stetmen long kot olsem we Oda 18, rul 2 istap talem. Oda ia istap talem long ol patis se bae oli mas raetem stetmen blong olgeta wan wan long ol evidence we oli wandem talem blong supotem kleim blong man we olgeta istap witnis blong hem. Kot bae ino save talem weta hemia hemi failia blong kot klerk we hem ino explenem gud long hem or hemi wan failia blong hem nomo. Wanem nao resen, kot bae ino save talem be kot isave nomo se hem ino gat wan fael stetmen. Folem failure ia kot istap alaoem hem anda long Oda 5, rul 3 blong ikivim oral evidence long oath.

Hem italem se taem we hemi sam wea araon 12 mo 15 yias hem istap harem olgeta istap tokbaot Etasrik lan. Hemi talem se hem isave se 2 olfala ia we hemi Fred Kaltabang mo Sope tufala nao istap faet forom graon mo korel long Etasrik lan. Hemi talem tu se abu wuman blong hemi ikam long Erakor mo oli istap wok long ples ia long taem kasem tedei. Resen ia nao jif Kalotrip ikivim raet ia long olgeta. Hemi talem tu se long taem ikam ol olfala oli gut long olgeta be tedei oli ino olsem mo hemi sapris blong luk se Sope iwandem tek ova. Hemi se hem igat ol nasara olsem Emeltakel, Eluck mo wan well blong pruvum. Hemi talem tu se hemi kleim forom hat wok blong abu wuman blong hem. Long kwestem se hemi kleim long saed blong blad lin or Naflak hemi se long blad mo tu se forom jif ikivim lan ia long apu wuman blong hem. Kot iwandem talem se long kastom blong Efate Jif ino save kivim graon long wan wuman.

Kenneth Kalomtak, sekon witnis blong Naflak Wit mo famili

Long saet blong witnis Kalomtak hem tu ino faelem wan witnis stetmen olsem Oda 18, rul 2 istap talem. Kot ialaoem hem blong mekem oral stetmen nomo anda long oath folem Oda 5, rul 3. Hemi talem se long taem befo ol man oli liv tugeta nomo forom fasin blong tribol faet. Hemia nao imekem se tribol Wit oli stap liv tugeta mo onem lan tugeta. Tedei taem we Christianity ikam ol man oli stap wan wan. Long kwestem se supos Naflak hemi wan grup forom wanem nao bae oli wandem salem graon hemi talem se hemia idepen sapos ol famili oli wandem salem. Hemi talem tu se sapos Naflak istap finis long graon ia bae oli mas ko bagegen long jif blong karem raet ia blong wok long graon. Hemi talem se long saet blong mekem seremoni long jif taem hemi kivim graon hem ise hem ino sua. Long kwesten se sapos hemi save pruvum se ol man bifo oli liv long grup hemi se hem inogat pepa blong pruvum be hem iharem nomo oli stap talem. Hemi confimem tu se hem igat wan registered taetol long ples ia mo vilej kaonsel nao ikivim long hem. Hemi talem tu se long taem ia kaonsel ibin kivim taem long eni man blong putum apil be inogat man iapil. Long kwesten se hao nao hemi kleim graon long ples ia hemi se thru long apu Lel we hemi maret 2 taem mo long aunti blong hem we hemi Rer. Apu Rer hemi Naflak noai. Kot iwandem talem se Kalomtak hem ifel blong pruvum se pupu Lel mo aunti Per tufala iona blong graon ia Etasrik.

Kalkot Kaltabang, namba 3 witnis blong Naflak Wit and famili

Kalkot Kaltabang hem tu ino bin faelem eni witnis stetmen olsem we Oda 18, rul 2 istap talem. Kot ialaoem hem blong ikivim evidence anda long Oda 5, rul 3. Long saet blong hem hemi talem se hemi sapotem Naflak Wit forom olgeta nao oli divaedem lan long pupu blong hem. Long wan kwesten se forom wanem nao hemi stap dispiutim Sope hemi se olgeta ino dispiuting hem be forom nomo desison blong vilij kaonsel we ikam aot mo Sope ino bin apil. Hemi talem tu se stret pupu man blong hem emi Kalonsem. Long kwesten se forom wanem nao hem ino usim nem ia Kalonsem be istap usim nomo Kaltabang hemi se forom nemi ia nao oli stap usim. Hemi talem tu se olgeta oli stap folem blad blong Kaltabang be ino kalonsem. Long kwesten se sapos oli folem blad bae Kaltabang ino gat graon long Pango hem italem se pupu Kalotrip nao ikivim graon taem we hemi faenem se oli stap wok long hem finis ikam. Hemi talem tu se ol pupu blong hem oli kam long Epau vilij long Est Efate mo oli kam stap long Boufa bifo oli kam taon long Pango.

Ol wokbaot we ol patis oli mekem long graon

Afta we kot ibin harem ol patis evri wan ibin ko wokbaot long graon ia. Ol jastises oli bin folem fastaem famili Sope. Long wokbaot blong famili Sope iluk olsem olgeta istap kleimem whol baondari ia blong Etasrik be ino wanwan plot olsem we Naflak Wit mo famili oli stap mekem. Baodari we famili Sope istap kleimem hemi stat long wan ples we oli kolem Eknarof mo ikatem kros long rot iko kasem wan nabanga we oli kolem ples ia Emetakel. Long banyan tri graon igat kona long ples ia mo ikontinu blong ko kasem stamba blong hil we oli kolem Esel mo ifolem stamba blong hil ia mo ikam kasem wan ples we oli kolem Eluk Per. Afta itanem bagegen mo ikasem sanbis long wan ples we oli kolem Eroilep.

Long saed blong Naflak Wit mo famili eria we oli stap kleimem istat long solwora klosap long kwari we masta Than istap digim mo ikam kasem wan pek we oli kleim se hemi stap klosap long rot we ol hevi machin oli stap pas mo hemi krosem rot mo ko kasem sem banyan tri we olgeta famili Sope iko kasem. Long ples ia ol patis oli tekem ol jastises ifolem ol ples we oli stap mekem karen long hem mo soem long ol jastises ol eria we oli stap wok long hem. Oli soem tu ol pleses we oli kleim se oligat lis taetol long ol. Lewi Kalpoi hemi karem ol jastises mo ko soem long olgeta se graon blong hem istat long wan eria we iko kasem sem hil (Esel) ia we Famili Sope ikleimem.

Wanem samting nao kot imas lukluk long taem blong wokbaot

Resen blong wokbaot long graon ia iblong mekem se ol jastises oli lukim saes blong graon ia mo whea nao graon ia istap. Ol patis oligat evri raet blong soem long ol jastises wanem nao oligat insaet long Etasrik lan blong helpem ol evidence blong olgeta we oli mekem long kot. Oli save soem ol ting olsem nasara, krev, ol ston, ol mak, or eni samting we oli ting se oligat. Ol samting ia bae idipen nomo sapos ol patis oligat be sapos oli no gat bae kot ino save tekem olsem se bae oli lusum kes.

Lukluk blong kot long saet blong ol evidence we ol patis oli mekem

Afta we kot ibin harem ol evidence blong ol patis kot iwandem mekem ol obsevasons ia:

a. Se Pastor Sope Taunauen, papa blong hem hemi Savi mo pupu man blong hem hemi Malokusa. Pastor Sope ibin maret 3 taems mo lasfala wuman blong hem hemi Leivapup we hemi blong Mele. Wan pikinini blong tufala hemi Kalsav mo hemi maretem Leiraru we tufala ibonem Kalorib Sope wehem nao irepresentem ol famili Sope long land kes ia.

b. Kot ifaenem tu se ol witnises blong famili Sope olgeta everiwan oli mekem witnis stetmen olsem we Oda 18, rul 2 italem mo oli kivim evidence blong sapotem forom wanem nao Sope istap kleimem graon ia Etasrik.

c. Long saet blong famili blong Frank Maleu Kalpoi we hemi representem Naflak Wit mo famili kot ifaenem se papa blong hem hemi Kalpoi. Kalpoi ibin maret 2 taems mo fesfala wuman blong hem hemi Toufabun. Taem we Toufabun hemi tet Kalpoi imaretem Quevira we hemi wuman Ambae. Tufala ibonem wan boi we hemi Tarus mo Tarus imaret mo bonem 5 pikinini we wan long olgeta ia nao hemi Frank Maleu Kalpoi.

d. Long saet witnis blong Frank Kalpoi olgeta everiwan oli ino mekem witnis stetmen olsem we Oda 18, rul 2 istap talem. Long lukluk blong kot ol witnises ia oli ino kivim evidence blong sapotem Frank Kalpoi be oli mekem ol toktok ia blong sapotem Naflak Wit mo wanwan eria we oli stap wok long hem. Long lukluk blong kot se olgeta ino stap kleimem ol boandri be ol smol smol eria ia nomo we oli stap mekem karen long hem mo ko kasem sanbis. Samfala eria ia olgeta yiet oli sub divaedem mo salem long ol man.

e. Long saet blong Naflak, kot ifaenem se Jif Roimata nao istatem mo tingting behaen long naflak iblong putum pis istap oltaem wetem ol man Efate. Hemia forom we istap kat raorao tumas wetem ol man Efate. Polisi ia imekemse ol man oli save muv fri olbaot forom oli save se oligat ol Naflak blong olgeta istap whea ples oli ko mo pis isave stap oltaem. Folem tingting ia kot iwandem talem se Naflak hem ino wan polisi we man Efate isave kleim graon thru long hem be man isave kleim graon long tugeta saet hemia Naflak wetem blad.

f. Kot iwandem talem tu se taem we ol jastisis oli bin wokbaot wetem ol patis oli bin obsevem olpatis taem we oli stap soem olgeta ol eria we oli stap kleimem. Kot iwandem talem se long saet blong famili Sope ol jastisis oli faenem se taem we oli wokbaot oli bin faenem se olgeta ibin mekem rere ol ples finis we oli wandem soem ol jastisis. Oli bin makem stret whea ples nao oli wantem soem ol jastisis. Taem we ol jastisis oli bin wokbaot oli bin harem ol toktok blong olgeta taem we oli stap soem wanem oli kat. Long lukluk blong kot se Sope famili isave whea nao graon istat mo end. Mifala iluk tu se olgeta oli kat confitens long wanem olgeta istap soem long ol jastisis.

g. Long saet blong Naflak Wit mo famili kot iluk se olgeta oli ino bin preperem ol ples we bae oli karem ol jastisis iko luk. Long lukluk blong kot iluk olsem olgeta ol ino sua tumas whea nao eria we oli stap kleimem istap mo iko kasem whea ples. Long stat blong wokbaot oli traem blong karem ol jastisis iko thru long ol eria we oli kleim se iblong olgeta be ol jastisis ino reli sua whea nao eria ia forom olgeta ino soem eni mak or baondari. Olgeta ibin traem blong soem ol jastisis wan pek we oli talem se oli bin putum samtaem long 2000 or 2001. Olgeta ibin fel blong soem pek ia. Long lukluk blong kot se sapos ibin tru se ikat wan pek istap bae hemi soem klia nomo forom olgeta istap kleim se pek ia oli putum long 2000 or 2001. Ol jastisis oli luk se inogat wan saen nating blong soem long olgeta se olgeta blong sovei oli bin mekem sovei mo putum pek long ples ia forom se sapos itru se pek ia oli putum long 2000 or 2001 bae imas kat sam wud we bae olgeta blong sovei iputum mak. Hemia ino gat wan saen blong soem se sovei ibin kam. Folem hemia Kenneth Kalomtak hemi traem blong soem long kot se hem ikat ol pek be taem we ol jastisis oli luk long ples whea hemi se ikat pek long hem be inogat pek. Ikat ol hol nomo we hemi kleim se ol pek ibin stap long hem mo ol man nao oli pulum aot. Ikat sam lukluk tu we ol jastisis oli mekem folem wan pek we oli bin luk long eria we Kaltabang famili oli stap kleimem. Fes samting nao se oligeta oli istap talem long kot se wan pek ia oli putum long 2000 mo 2001. Long lukluk blong kot pek ia hemi niu nomo mo bae ino tru se oli putum long yia 2000 or 2001. Mo tu graon we oli digim blong putum pek ia, ol pein we oli usum blong pendem tap blong pek mo lukluk long pek ia isoem se ino tru se olgeta ibin putum long yia 2000 or 2001. Lukluk blong kot se olgeta oli tes putum pek ia ino long taem. Ol jastisis oli luk tu wan yad we sem samting oli mekem wetem ol pek ia mo fanis. Long saet blong Leiwi Kalpoi iluk olsem se hem tu ifel blong soem wan pek we hemi kleim se hemi ikat mo hemi felt tu blong soem wan ples blong wel we istap long graon.

h. Long saet blong ol documentary evitence Kalorib Sope ibin presentem wan famili tri blong hem we isoem se hemi namba 5 generesen blong famili Sope. Forom resen ia taem we kot ilukluk long saet blong blad hemi stret blad blong Malokusa we ipasem ikam long pikinini blong hem Savi mo Savi ipasem ikam long Pastor Sope Taunauen we hemi karem Kalsav we hemi papa blong Kalorib Sope.

i. Long saet blong famili tri blong Frank Maleu Kalpoi, kot ifaenem se hem pupu man blong hem hemi Kalpoi mo pupu wuman blong hem hemi Quevira we hem iblong Ambae. Papa blong hem hemi Tarus mo mama blong hem hemi Touliu. Kot isave tu se Kalpoi brata blong hem nao hemi Jif Kalotrip we hem nao istap divaedem ol graon. Hem istap kleimem graon forom se hemi graon blong tufala pupu blong hem ia. Be Kot iwandem talem long Frank se hemi ino kat wan prove se graon ia iblong pupu blong hem. Ol resen whae kot imas talem olsem forom:

(i) Long leit 70s mo erli 80s igat tufala olfala nomo we oli stap faet forom Etasrik lan hemia olfala Kalsav Sope mo Fred Kaltabang be ino Kalpoi or Tarus. Kaltabang hemi wan adobted pikinini blong Kalonsem.

(ii) Long Wenesdei 11 Februari, 1976, vilij kot ibin staon wetem, Mr. Henderson, we hemi Britis Distric Agen mo long taem ia Mr. Henderson ibin talem long Fred Kaltabang se graon in oblong hem. Long taem ia tu jif Andy Reman II ibin stap mo hemi iwan long olgeta we oli deklarem se Sope nao hemi kastomari ona long graon ia Etasrik. Long taem ia tu Kalsei Fred, we hemi blong Ifira mo brata blong Fred Katabang tu istap mo confimem se lan hemi blong Pastor Sope. Frank Maleu ineva dispiutim ol evitence antap mo kot itekem se hemi save se ol storian ia oli tru.

(iii) Ikat wan olfala execis buk we Kalorip Sope ibin soem long kot we Pastor Sope Taunauen nao ibin raetem evri toktok abaot lan ia Etasrik stat long 1930 ikam. Insaet long buk ia tu igat wan map we isoem stret graon ia mo ikat sam rekod blong ol miting we itek ples long yias we ipas finis.

j. Long saet blong famili Kaltabang kot iwandem talem se famili ia ikam long Epau Est Efate mo long lukluk we istap Fred Kaltabang hemi adobted son blong Kalonsem. Long kastom blong yumi ol man Efate taem wan man iadoptem wan pikinini man ia imas kivim graon long hem. Kot imas talem long ples ia se raet we Kalonsem igat blong wok long graon ia Pastor Sope nao ikivim. Hemia imin se Kaltabang bae folem Kalonsem nomo mo bae hem ino save kleim graon ia sapos Kalonsem inogat raet long hem. Antap long hemia hem ino pruvum long kot se Kalonsem nao hemi ona long graon ia mo ikivim raet ia long hem. Long narasaet kot iluk se bae mo gut sapos Kaltabang ikam wan kleiman long lan ia forom se hem istap kleim tu se hemi lan ona. Be tedei longkot hem istap talem se hemi stap witnis long naflak wit we Frank Kalpoi nao istap lidim olgeta.

k. Long saet blong Leiwi Kalpoi Kot ifaenem aot se hem istap witnis blong Naflak Wit mo kot iluk se hemi stap witnis blong graon we hemi stap wok long hem. Kot iwandem talem se Leiwi hemi maretem Frank Kalpoi mo long kastom blong yumi ol man Efate wuman we imaretem narafala man hem imas folem man ia mo ko wok long graon blong man ia. Sapos papa blong wuman ia iwandem kivim lan long gel blong hem hem igat raet blong givim blong wok longhem. Kot ifaenem se graon we Leiwi istap wok long hem hemi se hemi karem raet ia folem pupu wuman blong hem we istap mekem meresin long ol man mo raet ia olfala man Kaltugor nao ikivim. Sapos olsem bae ino tru forom everiwan isave se jif Kalotrip nao ikivim graon. Wanem famili blad laen nao Kaltugor igat, Leiwi ino mekem iklia.

l. Long saet blong Kenneth Kalomtak kot ifaenem se hem inogat eni relasonsip wetem famili Kaltabang or famili Kalpoi. Hem ino pruvum long kot se hem tu ikat raet blong wok long ples ia. Kot iluk olsem hemi stap toktok blong soem se hem igat wan projek be kot imas talem long hem se hem ino pruvum long kot se hemi wan lese taetol forom ino gat pek.

Sumari

Afta kot ilukluk long ol poens antap kot iwandem talem long ol patis se famili Sope hemi pruvum inaf blong talem se hem nao hemi kastomari ona long ples ia. Hemia forom ol resens ia:

(a) Famili Sope ibin soem long kot se faet we istap long graon ia hemi stat long taem ikam mo faet ia hemi bitwin Kalsav Sope mo Fred Kaltabang nomo be ino bitwin Frank Kalpoi, Lewi Kalpoi, Kenneth Kalomtak mo Kalkot Kaltabang.

(b) Famili Sope ibin soem long kot se igat 2 vilij kot we istaon long leit 70s mo erlie 80s forom ples ia Etasrik mo faenem se Sope nao hemi ona long ples ia.

(c) Famili Sope ibin soem long kot se jif Andy Reman II we hemi jif tedei long Pango hem nao ol kansel blong hem oli deklarem se Sope nao hemi ona blong graon ia Etasrik. Kot isave tu se afta hem ibin deklerem lan ia samtaem long 1999 hemi kolem wan mo miting mo tekem nara desison we iko akensem desison blong hem blong bifor we italem se Sope nao hemi raet ona blong graon. Kot isave tu se hem ikat wan projek long ples ia we Naflak Wit mo famili oli kivim long hem.

(d) Famili Sope ibin soem long kot se ikat wan Britis Distric Agen we nem blong hem hemi Mr. Anderson we hem tu long 1976 hem ibin staon long vilij kot mo talem long Fred Kaltabang se graon ino blong hem be hemi blong Sope.

(e) Famili Sope ibin soem long kot tu se stet brata blong Fred Kaltabang we hemi Kalsei Kaltabang blong Ifira, ibin talem long Fred Kaltabang se graon ino blong hem.

(f) Famili Sope ibin kivim wan olfala execis buk we isoem se Pastor Sope ibin mekem map blong ples ia long taem finis araon 1930s ikam. Insaet long buk ia igat ol storian we irelat long lan ia mo wan map blong lan ia Etasrik.

Forom ol resens ia kot iwandem talem se bae ino save akseptem Naflak Wit mo famili forom se:

(a) Olgeta ino bin faelem ol witnis stetmen we isapotem Frank Kalpoi olsem representative blong olgeta mekem se ol evitence blong olgeta oli ko blong sapotem nomo wanwan long olgeta imekem se ol evitence blong olgeta ino stret mo ikonfus blong save weta hemi stap toktok long interes blong hem wan or interes blong Naflak.

(b) Sapos oli wandem se oli witnis blong olgeta nomo bae olgeta imas faelem stetmen olsem kleimen be ino olsem witnisis.

(c) Mo tu kot iwandem talem se Naflak hemi wan polisi we jif Roimata nao iputum mo hemia iblong mentenem pis nomo be hem ino blong desaed long kastomari onasip blong wan graon. Kastomari onasip long wan graon hem ikam aot nomo long blad wetem Naflak mo tufala samting ia imas ko tugeta.

(d) Mo tu se olgeta ino bin provaedem documentari evidence blong soem se olgeta oligat rekods long sam diling we oli bin mekem long pas olsem mitings or ol nara samting we irelat long graon ia Etasrik.

Dekleresen blong kot

Forom resens nao kot istap deklerem tedei se:

(1) Famili Sope nao oli kastomari ona blong graon ia Etasrik we istat long Eknarof, hemia long sanbis, iko kasem long Emeltakel we stamba blong nabanga istap mo ifolem stamba blong hil ia Esel kasem Eluk Per mo itanem bakeken kasem taon long sanbis.

(2) Forom resen ia kot istap talem long Frank Kalpoi, Lewi Kalpoi, Keneth Kalomtak mo Kalkot Kaltabang se olgeta inogat raet long lan ia Etasrik. Olgeta oli mas save se olgeta oli stap naoia long autoriti blong Famili Sope. Olgeta projeks we oli stap finis olsem ol les taetol mo sam narafala divilopmen bae oli mas ko thru long famili Sope bifor oli save karem aot. Olgeta we oli gat les taetol finis eni ren we blong pem imas kam long famili Sope.

(3) Ol patis we oli kat karen long Etasrik or olgeta we olino patis be oli mekem karen insaet long Etasrik land bae oli mas kat pemison blong famili Sope blong kontinu wok long ples ia.

(4) Folem sekson 22 blong Island Kot Act Cap. 167 paties oli gat 30 deis blong appeal sapos oli no hapi long desison ia.

Deted long Port Vila dei ia 3 Oktoba, 2003.

Magistret Jerry Boe
Jif Raymond Morris Marongoe
Jif Esron Manapanga Rasikai
Jif Makoulova Maraki-Vanua